Dizionari de Lenghe Furlane

sac  sac  [FO]

1. s.m. recipient flap, pal solit di cjarte, tele o plastiche, in gjenar lunc, stret e viert di une bande, doprât par tignî o puartâ alc:  [Nadalin] al cjate il copari Min che al lave di une cumiere in chê altre a robâi panolis, cul sac (Meni Ucel, Mangjativis); su la place al slargjave i sacs dai bagjigjis, chei des carobulis e chei de cevole cu la come ravaiade e po i zeis cu lis pomis di stagjon (Pieri Menis, Chei di Muraie)
   Sin. borse
   Cfr. bocje , cûl , fonts , come²
   
   1. cuantitât contignude tal sac:  i siôrs a vevin inmò sacs di forment e di patatis e piecis di formadi su la bree dal camarin (Dino Virgili, La aghe da pît la cleve)
   2. [TS] milit. recipient di tele jemplât di tiere, savalon, claps e v.i. doprât tant che ripâr:  nus mandavin tes galariis cui fusîi e cu lis bombis a man, pronts a saltâ fûr al prin chic che la sentinele, imbusade tune cabine di sacs plens di grave, e ves sberlât (Pieri Menis, Cemût che o soi restât caporâl)
2. s.m. recipient di tiessût o altri materiâl, ancje cun imbotiduris, scomparts, tiracjis che si puedin justâ e v.i., doprât pal plui dai soldâts, dai escursioniscj o, plui piçul, di scuelârs e students:  a cjaminin sù e jù par un troi de bande Nord dai Pireneus, come doi escursioniscj, ognidun cuntun sac biel pesant daûr schene (Spirt Anonim, Iñaki e Aitor)
3. s.m. (coloc., fig.) grande cuantitât:  dîsii che se lu brinchi, i doi un sac di legnadis (Sergio Jacuzzi, La furmie e la ciale)
   Sin. barcje , bataion , cjadaldiaul , cos , cuinç , davoi , disio , fagot , flum , mont¹ , palade¹ , palote , pleton , sdrume , sglavin , sglavinade , slac , svuaç , tasse¹ , vore
4. s.m. tiessût grês e tonie grese doprade une volte dai penitents e dai eremitis, vuê doprade dai fraris di cierts ordins:  [fra Silvio] al tirave fûr, pai frutins di cjase, des sôs sachetonis, che a si pierdevin tal sac de tonie, une medaiute o un santut benedît sul altâr di Sant Francesc (Pieri Somede dai Marcs, Fra Silvio)
5. s.m. scherç in caserme o in grups che a duarmin insiemi, fat pleant i bleons di maniere che no si rive plui a jentrâ tal jet:  i zûcs e lis berechinadis a jerin inocents come chei agns: […] si faseve il sac intal jet dal vicin, si metevin dentifrici e urtiis intal jet di un altri (Cristina Noacco, Faliscjis)
6. s.m. [TS] sport tal pugjilât e in altris sports di contat, sorte di bersai grant, pesant e imbotît, pal solit di forme cilindriche, doprât par alenâsi
7. s.m. [TS] mus. il toc plui grant dal fagot
8. s.m. [TS] pescj., venat. part finâl de rêt, cu lis mais plui stretis
9. s.m. [TS] biol. ingjâf anatomic o patologjic tai organisims animâi o vegjetâi
   Sin. ingjâf
   
   1. membrane che e cuvierç chel ingjâf
10. s.m. il puartâ vie i bens cun violence, ancje cun consecuencis di fûcs e distruzion, di bande di fuarcis in vuere:  [Zuan di Udin] prime dal sac di Rome [dal 1527] al à lavorât in plen cui stucs, e i siei a jerin considerâts i miôr, come tal Palaç Medici, a pene ristruturât dal Michelangelo (Bepi Agostinis, Storie de art in Friûl)
    Sin. fisc

Polirematichis e espressions idiomatichis

• disvuedâ il sac loc.v.
• fâ sac loc.v.
• implantâ sac e râfs loc.v.
• meti a sac loc.v.
• meti tal sac loc.v.
• pierdi sac e râfs loc.v.
• plantâ sac e râfs loc.v.
• svuedâ il sac loc.v.
• tignî il sac loc.v.

Proverbis:

• a semenâ un sac di plume, no si racuei mai plui
• al è lari cui che al robe e cui che i ten il sac
• al è lari tant cui che al robe che cui che al ten il sac
• al è tant lari chel che al robe che chel che al ten il sac
• bisugne semenâ cul pugn e no cul sac
• cui che al bastone che al ledi cun doi sacs
• cui che i insegne al mus a butâ jù il sac e a mangjâ la farine si ridûs a dovê lâ a mulin bessôl
• il brâf contadin al semene cu la man e no cul sac
• il lat al è la ruvine dal sac
• il mus al puarte il sac ma al mangje ancje la semule
• in vuere si va cun doi sacs: un par dâlis e un par cjapâlis
• no bisugne cjoli une gjate tal sac
• no si compre la gjate tal sac
• no si dîs doi, fin che nol è tal sac
• no si varès mai di disvuedâ il sac
• no stâ dî vuac fin che nol è tal sac
• no stâ mai cjoli une gjate intun sac
• no stâ mai dî tac fin che nol è tal sac
• ognidun cul so sac che al ledi a marcjât
• par vê la pâs in chest mont a vuelin trê robis: une femine par cjase, une passare par vile, une cocule par sac
• prin ton a soreli jevât, cjol il sac e va a marcjât; prin ton a soreli a mont, cjol il sac e va pal mont
• sac forât nol ten farine
• se si semene un sac di plumis, al è dificil di racueilis
• soreli a mont tal sac, di ploie dut un slavuac
• tes barufis si va cun doi sacs: un par dâlis e un par cjapâlis
• un sac vueit nol sta in pîts
• une femine par cjase, une passare par vile, une cocule par sac
• va a mulin cul carnîr se no tu pûs lâ cul sac