Dizionari de Lenghe Furlane

fonts  /-ó-/  fonts  [FO]

1. s.m. part inferiôr di alc, spec. di un recipient o di un ingjâf:  al sarès stât dut nuie, se Betilde no ves cjatât i sclopets sui fonts des sachetis (Maria Forte, La cotule di none Betilde); un grumon di veris a tocs […] Butiliis cence cuel, o cence fonts, miezis tacis e tocs di damigjanis (Maria Forte, La fortune di Folope); il capelan i disè che la aghe nete e jere razionade e masse preziose par lavâsi, e i indicà une poce pantanose tal fonts de trincee (Checo Tam, La trombe)
   Sin. bas , base , cûl , sot
   Var. font²
2. s.m. superficie de tiere sot di une masse di aghe:  la aghe e jere ancjemò tant limpie […] che si viodeve tal fonts de ledre jerbis e claps (Agnul di Spere, Il puint de ledre); la fuarteça di Maran cu lis sôs muraiis e i soi turions plantâts dentri al font de la imensa laguna (Federigo Comelli, Il me paîs)
3. s.m. porzion basse di alc:  al è di firmâ tal fonts dal sfuei
   Sin. sot , pît
   
   1. ôr di vistîts:  il fonts dai bregons
      Sin. ôr
4. s.m. part plui interne o lontane di alc:  ti ricuardistu chel cjanat di vuardie che i miei a tignivin incjadenât intal fonts dal curtîl? (Catarine Percude, La plui biele)
   
   1. (fig.) part plui intime:  si sintive a sconsortâ fin in fonts da la anime (Maria Forte, La fie çuete)
5. s.m. part di une imagjin, di une rapresentazion, riproduzion e v.i. là che a son lis robis plui lontanis rispiet a cui che al cjale:  al passave un eletrocardiogram continui, in vert suntun fonts neri (Agnul di Spere, I prâts des Savodagnis); su la tele di siôr Dree si podeve viodi un cosac a cjaval […] il troi, là che il cjaval al cjaminave, si pierdeve tal fonts dal cuadri (Roberto Ongaro, Cretevierte)
6. s.m. part plui lontane dal cjamp visîf:  un di chei burlaçs di Primevere che a lassin […] il cîl tant lampit che al pâr di viodi il fonts (Roberto Ongaro, Il muc); une lusigne e svolave sul fonts neri dai arbui di agacie, insom dal curtîl (Franca Mainardis, Il sium di Lissandri)
7. s.m. (fig.) ambient storic, culturâl che al forme il contest di alc:  o vin riclamât avonde in sintesi chest fonts storic par podê setâ in maniere plui autentiche il significât e la puartade dal ûs de lenghe furlane in Friûl (Adrian Cescje, Memoriis di politiche linguistiche)
   Sin. teatri
8. s.m. cuantitât vanzade di materiâl, spec. licuit, tun recipient:  a restarin su la taule lis scudielis cui fonts di mignestre e lis tacis sporcjis di vin (Maria Forte, Cjase di Dalban)
   Sin. fece , feçum , fondacj , morcje , puinte , scartum , vanzum
9. s.m. (fig.) sensazion che e reste sot vie:  in me al restave un fonts di dubi e di maljessi (Carlo Sgorlon, Il dolfin)
   Sin. ombre , rest , sfont , vanzum , vene¹ , fonde
10. s.m. part profonde dal caratar:  il vin al cjape lis lidrîs dai gnerfs, tal cerviel, e alore si piert la tramontane, si molin lis redinis e al torne a saltâ fûr chel fonts di besteate che si crodeve di vê scjafoiade (Josef Marchet, Lis predicjis dal muini)
    Sin. base , fonde , naturâl
11. s.m. (fig.) part essenziâl:  rivâ al fonts de cuistion
    Sin. centri , cûr , essence , mieç , nusel
12. s.m. (fig.) fase finâl:  tal fonts dal procès […] la forme «il» si imponè, […] fûr che inta cierts dialets, dulà che si cjate «lu» (Zorç Cadorin, Cualchi ipotesi sul furlan di prin di scrivilu)
13. s.m. cjamp, toc di tiere:  sielzût il puest, 'Sebio al comprà il fonts e al scomençà i lavôrs [par fâ la cjase] (Alan Brusini, Un om di mont)
    Sin. campagne , tiere , cjamp , teren¹
14. s.m. estension di tiere che e forme une proprietât:  si po calcolâ che dut il plan, di ca dal Tiliment e fintremai da pît dai cuei, al sei stât dividût in tancj «fonts» di un 35 cjamps; trê mil fonts di 35 cjamps furlans di vuê (Josef Marchet, Cuintristorie dal Friûl fin sot la Italie)
    Sin. ben , campagne , colonie³ , domini , possès , possession , proprietât , sostance , tignude
15. s.m. [TS] fin. complès di titui proponût tant che invistiment di une societât di intermediazion, daûr di ciertis carateristichis e ciertis garanziis:  fonts comuns che a invistissin dome in cierts setôrs, lassant altris (par un esempli, chei cun produzions che a ofindin la dignitât dal om, dai siei dirits fondamentâi, de salût e dal ambient o che a operin tal cjamp dai armaments) (Buteghe dal Mont, Luche Nazzi, Guide par un consum just e solidâl)
16. s.m. [TS] econ. complès di bens o sume di bêçs a disposizion intune cierte dade di timp e destinade a cierts fins:  daspò che e jere stade fate buine la leç 29 tal 2007, al 2012, si viôt che i fonts a pro dai mieçs di comunicazion a son diminuîts a fuart (Erika Adami, La lenghe furlane tai mieçs di comunicazion)
    Sin. bêç , risorse , sostance
    
    1. bêçs:  al jere restât cence fonts par tignîsi in grim une lipare come te! (Sandri Di Suald, Ah! la provincie)
       Sin. bêç , risorse , sostance
17. s.m. [TS] bibliol. complès di volums, libris, manuscrits e documents di une biblioteche, riunîts par autôr o argoment o massime parcè che a divegnin di une stesse donazion:  la ricognizion dai fonts de Biblioteche Civiche e je stade inviade dal 1999, aromai, e di in chê volte e à puartât ae segnalazion di un numar pardabon significatîf di documents in volgâr furlan, tra Tresinte e Cuatricent (Federico Vicario, Documents de Ete di Mieç pal studi dal furlan antîc)
18. s.m. [TS] sport resistence al sfuarç lunc
19. s.m. [TS] sport gare o complès di garis di distance lungje

Polirematichis e espressions idiomatichis

• a fonts loc.adi.inv., loc.av.
• a fonts pierdût loc.adi.inv., loc.av.
• da fonts loc.av.
• da fonts di loc.prep.
• tocjâ il fonts loc.v.

Proverbis:

• il bon al sta sul fonts
• il dolç al è sul fonts
• vueli in cime, vin tal mieç, mîl sul fonts