Dizionari de Lenghe Furlane

tiere  /-èr-/  tie|re  [FO]

1. s.f. materie componude pal plui di minerâi e di residuis organics che e forme il strât superficiâl dal mont:  i plasevin lis grandis machinis che a sgjavavin o a splanavin la tiere, i camions che di matine fin sere a puartavin claps par fâ il pedrât (Carlo Sgorlon, Prime di sere); su lis radrîs [dal cocolâr] che e jessin de tiare gropolosis e scuris si po sintâsi in ombrene. (Catarine Percude, La rosade di sant Zuan); dai veris spalancâts al jentrave un bon profum di fen, di rosis e di tiere bagnade (Franca Mainardis, Aiar di cjase); [il sclopit] e je un specie che si cjate dispès intai pustots, in tieris magris (Giorgio Pascoli, Il Litum: jerbis salvadiis te cusine)
   Var. cjere
2. s.f. complès de superficie dal mont componût des regjons che no son mârs o aghe:  miârs di imigrâts scjampâts de Asie e dal Medi Orient par stradis di tiere traviers i paîs Balcanics o de Afriche traviers il mâr Mediterani (Guglielmo Pitzalis, Nissun pericul dai forescj)
   Sin. sut
3. s.f. spec. cun iniz. maiusc., tierç planet dal sisteme solâr:  par vie de azion combinade de fuarce di gravitât produsude dal soreli e de lune su la Tiere, il so as di rotazion nol è fis intal spazi, ma al zire (Nando Patat, Archeoastronomie in Friûl)
   
   1. il mont, in confront o oposizion cun ce che al è metafisic, divin:  a crodevin intun sôl Diu, come i Ebreus, ma a sostignivin che chest Diu si fos manifestât in Tiere e al fos muart su la crôs cualchi an prime (Checo Tam, Conversions)
   2. [BF] la umanitât interie:  se ducj ju onôrs la tiare ti concêt / […] / si po doncje dî: "Evviva, o Colorêt / tu sês la otave maravee dal Mont" (Ermes di Colorêt, II, 184)
      Sin. mont²
4. s.f. part limitade de superficie dal mont:  dutis lis razis dai umigns, di ducj i colôrs, di ducj i costums, di dutis lis tieris, si cjatisi dongjelaltris, come fradis (Josef Marchet, Lis predicjis dal muini); la Domenia di Pasca che dut il mont al cjanta / a rivin nemorâts ta la cjera di Fransa (Pier Paolo Pasolini, Il soldât di Napoleon)
   Sin. contrade
   Cfr. regjon , teritori , zone , bande , lûc , sît , puest¹
   
   1. part limitade de superficie dal mont calcolade proprie di une nazion o di une comunitât cuntune sô identitât:  cun chestis ideis o soi partît […] par une bataie umanistiche e dal dirit, pe mê Tiere, pe mê int, par dut ce che o ai amât, par mê fie, par me (Adrian Cescje, Memoriis di politiche linguistiche)
      Sin. patrie
5. s.f. superficie che e fâs di base, paviment:  i butave su la taule zumielis di bêçs: plene la taule, a colavin par tiere, a lavin ator pe cjase (Dino Virgili, La aghe da pît la cleve); un dopodimisdì le àn cjatade par tiere, in cjamare. Delicui (Gianni Gregoricchio, Trê feminis)
6. s.f. estension calcolade daûr de prospetive agricule o daûr de proprietât:  i plui siôrs di Cortâl a jerin i Gobets, che a vevin un grum di tiere (Cristina Noacco, Faliscjis); Nardine invezit e varès puartade in dote dute chê biele tiere nere e grasse là jù sul ôr dal Cuar (Pieri Menis, Sul agâr)
   Sin. campagne
7. s.f. in espressions par dî colôr maron che al tire sul ros:  si tirà sù la manie par viodi il colp che al veve cjapat. Une striche rosse e sglonfe i taiave il braç colôr tiere (Carlo Sgorlon, Prime di sere)
   
   1. cualsisei polvar doprât tant che colôr:  sinopie - colôr sul ros di tiere naturâl, doprât pal dissen preparatori tai afrescs (Bepi Agostinis, Storie de art in Friûl)
8. s.f. [TS] eletr. teren tant che condutôr di potenziâl zero
   
   1. par metonimie, fîl di colegament a tiere
9. s.f. [TS] filos. te filosofie antighe, un dai cuatri elements fondamentâi dutune cun aiar, aghe e fûc:  Aristotel al fonde la realtât dai fenomens sul jemplament infinidementri penç dal spazi cun cinc elements (tiere, aghe, aiar, fûc e cuintessence) (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
10. s.f. [TS] astrol. element dai segns zodiacâi dal Capricorni, dal Taur e de Vergjine

Polirematichis e espressions idiomatichis

• a fîl di tiere loc.av.
• a fîl tiere loc.av.
• cjapâ tiere loc.v.
• cui pîts par tiere loc.av., loc.adi.indef.
• cul cûl par tiere loc.av.
• fâ tiere di bocâi loc.v.
• fâ tiere di citis loc.v.
• lâ a fâ tiere di bocâi loc.v.
• lâ a fâ tiere di citis loc.v.
• paradîs in tiere loc.s.m.
• râs tiere loc.av., loc.adi.inv.
• restâ par tiere loc.v.
• sot tiere loc.av., loc.adi.inv., loc.s.m.
• vê tiere ferme loc.v.
• vê tiere ferme sot i pîts loc.v.

Proverbis:

• aghe sante e tiere a fasin pantan
• al è miôr cjaminâ trê dîs par tiere che no miezore par la aghe
• bisugne volêi ben a la tiere parcè che o vignìn di li
• ce che al è scrit in cîl, nissun no lu disfe in tiere
• farine blancje a fâs bon pan, tiere nere e fâs bon gran
• i bogns che a vadin in paradîs in tiere no si sa ce fâ di lôr
• la pale e à la ponte di aur parcè che la tiere vergjine e je un tesaur
• la ploie cuiete e travane la tiere
• la tiere no vûl ni puars ni avârs
• laude il mâr e tenti a la tiere
• nol è negozi in tiere che al puarti plui dam de vuere
• pericul in mâr, pericul in tiere, pericul te barele
• pocje tiere e ben coltade
• se al plûf Vinars Sant, la tiere no je mai sazie
• tiere nere a fâs bon pan, tiere blancje e fâs ledan
• tiere nere e fâs bon gran, farine blancje a fâs bon pan
• tiere nere e fâs bon gran, tiere blancje a lasse murî di fam
• tiere nere e fâs bon gran, tiere blancje e fâs murî di fam
• tiere rosse e fâs bon gran, tiere blancje a lasse murî di fam
• tiere sante e aghe sante a fasin pantan