Dizionari de Lenghe Furlane

puest¹  /-è-/  puest  [FO]

1. s.m. spazi che al pues sei ocupât de bande di personis o cun robis:  stant che o sin in centri, nol è tant puest par meti la machine e alore vignît a pît (Guglielmo Pitzalis, Doprâ la lenghe dai lûcs in sanitât); [la analisi dai spetrograms di chês altris peraulis] no si le ripuarte in chest articulut parcè che e puartarès vie masse puest e no zontarès nuie di impuartant (Paolo Roseano, La division in silabis dai sufìs -sion e -zion tal Grant Dizionari Bilengâl Talian - Furlan)
   Sin. buse , place , sît
   Var. post
   
   1. (ancje fig.) spazi o situazion li che cdn. o alc a cjatin acet:  la parone soi jo… sarai jo, e tô gnece e po tornâ a Barbane, che a cjase mê nol è plui puest (Pieri Somede dai Marcs, Barbane)
      Sin. buse , place , sît
2. s.m. pont intal spazi fisic:  al indreçà il cavalet e al tornà a meti dut tal puest di prime (Zuan Lurinçon, La Madalene); o ai butât un voli al puest là che une volte e jere une fontane (Cristina Noacco, Faliscjis)
   Sin. lûc , sît
3. s.m. (ancje fig.) spec. cuntun possessîf o un complement di specificazion, sît stabilît, destinât o solit par cdn. o par alc:  e puartà sù di cene a so pari che al jere tal jet. Lu cjapà a bracecuel come par difindilu e po e poià ogni robe tal so puest (Maria Forte, La fie çuete); restâts cussì convignûts, si incovarìn ognun tal so puest, in spiete (Roberto Ongaro, Il muc); i bastave il mangjâ e la salût, e lis robis de vite simpri tal lôr puest, come lis stagjons (Maria Forte, "Nossent")
   Sin. buse , lûc , place , sît , volte
   
   1. part di spazi, spec. cuntune sente, dulà che une persone e sta intun ambient, tant che tor de taule, a scuele, al cine, tun mieç di traspuart e v.i.:  il vieli cu la vôs indolcide si sentà tal so puest di simpri da cjâf dal fogolâr (Dino Virgili, La aghe da pît la cleve); tal gno scompartiment une zovine alte e secje e veve ufiert il puest a une muinie (Checo Tam, Cocteau Twins su Netun (ma no il planet))
      Sin. place
   2. posizion ocupade intune serie, intun ordin e v.i.:  il Pordenon si manten tal otâf puest in classifiche, juste daûr dal Lecce, a doi ponts di distance (Marc Stolf, Pordenone - Lecce 1-1); il santificâ la fieste nol è un consei […] ma un comandament […] scarpelât al tierç puest su la piere dai comandaments (Riedo Pup, No sin bogns di fâ fieste)
      Sin. lûc , place , volte
4. s.m. in ambients, machinis o altris mieçs di traspuart, capacitât di tignî o puartâ une persone:  tal vignâl di Ramandul si leve di Vendemis no cul cjaval, ma cu la veture, une Adler dodis cilindris e sîs puescj (Alan Brusini, Come tai romançs); a Cortâl a vevin fat sù un tendon di tresinte puescj, par ospitâ dutis lis mascaris dal comun (Cristina Noacco, Faliscjis)
5. s.m. localitât:  "Sâstu dulà che a son i prâts des Savodagnis?". "Lis Savodagnis? Sì, ju cognòs. Al è un biel puest, ancje vuê" (Agnul di Spere, I prâts des Savodagnis); culì ducj a van in puescj cjadaldiaul in biciclete. Patagonie, Istambul, […] (Laurin Zuan Nardin, Migjee)
   Sin. ambient , localitât , regjon , sît , zone
6. s.m. locâl public:  mi à puartât a Grau, li di un so amì che al gjestive un ristorant. Il puest al jere sierât e nô o vin tucât su la vecje puarte di rôl (Checo Tam, Don Franziskus e Iskander)
   Sin. ambient
7. s.m. ativitât professionâl o funzion puartade indevant:  une VAL, une Verifiche Analitiche Lavorative, par stabilî se i ves ancjemò i recuisîts par chel puest (Stiefin Morat, Kebar krossè); al pâr di strani che, vint ocupât puescj di responsabilitât ancje politiche, nol fos stât considerât un element di slontanâ (Giovanni Pillinini, Zuan Batiste Cavedalis - Une vite esemplâr)
   Sin. implei , lavôr , ocupazion , posizion
   
   1. unitât disponibile par puartâ indevant une cierte ativitât, profession, funzion e v.i.:  di puescj pal dotorât a 'nd jere cuatri: doi cun borse di studi e doi cence (Sandri Carrozzo, Piçulis storiis di mafie furlane)
8. s.m. (fig.) cundizion, situazion:  "Ten a ments che usgnot, tal gno puest al veve di jessi un altri… ma nol à vût coragjo, chel stupit…" (Pieri Menis, Sul agâr); meti ae prove chei che nus vevin criticâts, par viodi ce che a jerin bogns di fâ lôr tal nestri puest (Adrian Cescje, Memoriis di politiche linguistiche)
   Sin. situazion

Polirematichis e espressions idiomatichis

• a puest loc.av., loc.adi.inv., loc.adi.
• fâ puest loc.v.
• meti a puest loc.v.
• meti il cjâf a puest loc.v.
• metisi a puest loc.v.
• puest di bloc loc.s.m.
• puest di comant loc.s.m.
• puest di lavôr loc.s.m.
• puest di onôr loc.s.m.
• puest di vore loc.s.m.
• puest di vuardie loc.s.m.
• sul puest loc.av.
• tignî i gnerfs a puest loc.v.
• tignî lis mans a puest loc.v.
• vê lis cjartis a puest loc.v.

Proverbis:

• il prin puest si scuen lassâjal a chei di cjase