Dizionari de Lenghe Furlane

lûc  lûc  [FO]

1. s.m. zone o pont individuât tal spazi pe sô posizion gjeografiche, ambientâl, o pe sô funzion o par cualchi sô carateristiche:  al po stâi che in tancj lûcs de penisule i talians si contentin di cussì: ma noaltris furlans, tes nestris cundizions gjeografichis, no podìn contentâsi (Josef Marchet, Diferencis); zoventût come a Udin / no si cjate in nissun lûc (Popolâr, O ce biel cjiscjel a Udin); la scuadre dai coridôrs di Tresesin e rivave al lûc de partence des corsis (Alan Brusini, I coridôrs di Tresesin); i zovins dal paîs si jerin cjatâts sot dal chiosc dal prât: lûc di sagre e di incuintri de comunitât (Cristina Noacco, Faliscjis)
   Sin. localitât , posizion , puest¹ , sît , bande
   
   1. part di un test, di un discors, di un resonament e v.i.:  Livius intun lûc al dîs che culì no cjatarin nissun abitant, e intun altri al lasse capî che a vevin puartade vie un grum di robe ai abitants (Josef Marchet, Cuintristorie dal Friûl fin sot la Italie)
      Sin. puest¹ , bande , pont
   2. specificât di un ordenâl, pont di un resonament metût in ordin logjic:  e je stade une ricostruzion no esaustive. In prin lûc par vie che no jerin disponibilis dutis lis fonts diretis che a coventaressin par un vêr lavôr di ricercje storiche (Max Mauro, Un Friûl difarent: i 90 mhz di Onde Furlane)
2. s.m. cjase grande, pal solit isolade, di possidents o di int abenade in campagne:  la famee di Pelôs e jere tornade a stâ a Tresesin ai prins dal '700, comprât il lûc dai conts di Conti, palaç dal '500 (Alan Brusini, Come tai romançs); Talico cu la briscje al leve pai cjasâi, […] tai lûcs dai bolpats che a àn il curtîl denant e la braide daûr (Alan Brusini, Il colôr dal marcjât)
   
   1. cjase in gjenerâl:  vêso savût che Cuartut al à vendût il lûc? (Roberto Ongaro, Cretevierte)
   2. costruzion isolade, in mont, par stâ di Istât e fâ i lavôrs pes bestiis e pal fen:  gno pari a i de in afit ai nuviçs la cjasa e il louc da la Muntuça (Novella Cantarutti, "Uta, Ututa improntiti")
      Sin. stali
3. s.m. [BF] stanzie, ognidun dai ambients separâts di une cjase, di un edifici:  e je une cjase piçulute, ma che e à cuatri lûcs a plan tiere (Giulio Andrea Pirona, Novo vocabolario friulano)

Polirematichis e espressions idiomatichis

• a timp e lûc loc.av.
• dâ lûc loc.v.
• fâ lûc loc.v.
• lûc comun loc.s.m.
• tignî lûc loc.v.
• vê lûc loc.v.

Proverbis:

• cui che nol sa sbassâsi a timp e lûc le finìs cul cjâf sbûs
• dut a timp e lûc
• i scherçs a vuelin fats a timp e lûc
• il pecjât nol vûl lûc
• la aghe e il fûc a stan in pôc lûc
• lis maledizions a van trê dîs par lûc, po a colin là che e je la colpe
• ogni cjosse a timp e lûc