Dizionari de Lenghe Furlane

buse  bu|se  [FO]

1. s.f. viertidure, pal solit plui o mancul taronde, che e passe alc di une bande a chê altre:  o plati la buse tai bregons de tute e la maiate di cjase cul capot (Francesca Gregoricchio, La dentiere pierdude); di une buse tal mûr e jentrà une surisute (Checo Tam, Sante); cuntun baston di fier spiçât al jere za rivât a fâ une biele buse tal solâr de sô cele, sbusant trê strâts di breis e un di marmorin, par la cuâl la vie di scjampâ e jere biele che pronte (Pierluigi Visintin, Friûl e furlans te Histoire de ma vie di Giacomo Casanova); so pari al jere stât operât tal cuel e al veve une buse o pensi par respirâ (Mario Beltramini, Jo e Graziella)
   Sin. bûs
2. s.f. orifizi dal cuarp:  il so Spirit al soflà tes busis dal nâs une soflade di vite e l’om al deventà une creature vivente (Gaetan Cogôi, Nadâl doi mil e disevot); nol sint chel alì ve, siôr, se no i berle te buse de orele (Meni Ucel, La visite dal vescul)
   Sin. orifizi , bûs
   
   1. orghin gjenitâl feminin
3. s.f. viertidure te tiere, plui o mancul largje e fonde:  sgjavâ une buse; colmenâ une buse; la ploie e tornave a jemplâ lis busis de strade (Carlo Tolazzi, La salamandrie tal fûc); al cjapà un troi plen di claps e di busis glaçadis (Carlo Sgorlon, Prime di sere)
   Sin. bûs , cunete , fondon , fuesse
   
   1. [CO, TS] milit. jentrance sgjavade par tiere par protezion di un o pôcs soldâts:  il cjapitani […] al veve dite di preparâ lis busis par passâ la gnot sul puest (Alan Brusini, I ribei)
4. s.f. puest ingjavât dulà che si ingrume materiâl che no si dopre plui o che al à di restâ fer o di jessi lavorât:  une volte so pari le veve gjavade mieze muarte de buse dal ledan […] dulà che e jere colade (Pieri Menis, Pascute); te "buse dai veris", monument di ogni paîs, [di tocuts di veri par zuiâ] a 'nd è tancj che si po tornâ a cjase cu lis sachetis plenis (Lucia Scoziero, Zûcs di fruts furlans)
   Sin. bûs
5. s.f. zone di teren, ancje une vore grande, che e je plui basse des zonis dongje:  il Dacian al à proponude la buse jù insom dal ort di Lenot [par fâ sù une scuele gnove] (Riedo Pup, Il façolet dal Dacian)
   
   1. ancje in toponims:  la Buse di Pinçan; la Buse dal Garde
6. s.f. pont o zone dal fonts dal mâr che si sbasse rispiet al rest
   Sin. bûs , fondon , foran
7. s.f. piçule jentrance intune superficie, ancje se no le travierse di une bande a chê altre:  dopo vêle lavade [une panarie] ben e no mâl, e stropât lis busis dai carûi cul stuc, le slicà cu la cjarte di veri e i de di lustrifin (Carlo Sgorlon, Prime di sere)
   Sin. bûs
8. s.f. [CO, TS] sport ingjâf dulà che in plui sports si à di mandâ une bale:  lis sîs busis dal biliart; un cjamp di golf di 18 busis
9. s.f. [TS] teatr. puest dulà che al sta chel che al sofle lis batudis
10. s.f. ingjâf, çondar plui o mancul profont che al covente di ripâr pes bestiis salvadiis:  la buse dal tac; la buse de surîs; sgjarfe, sgjarfe te buse cul fros, / sgjarfe, sgjarfe… ma il gri reste là (Francesco Musoni, Il gri)
    Sin. cove , tanâr , tane
11. s.f. jentrade o jessude di un spazi soterani o parât:  si jes su la buse dai rifugjos [cuintri dai bombardaments] (Pieri Somede dai Marcs, La ultime baronade)
    Sin. bocje
12. s.f. (fig.) lûc platât:  cuissà in ce buse che al è finît il telecomant; cirî in ogni buse; Bastian l'è un om che al à la sience infuse, / ma che la ten scuindude in cualchi buse (Pieri Çorut, Bastian)
    Sin. bûs
13. s.f. ambient sierât, strent, scûr e v.i.:  une buse di ostarie cun puce di fum e di bago (Alan Brusini, Come tai romançs)
    Sin. busigatul , cabere , caboite , cabôt , cjaponarie , cove , gjatarie , scrosop , scus , taboghe , taniç , tutubie , bûs
    
    1. cjase malmetude, piçule, sporcje e v.i.
    2. puest o ambient in gjenerâl:  no soi stât bon di brincâ la strade juste de locande cussì che o scugnût passâ la gnot te prime buse che o ai incontrât (Arturo Feruglio, Viaç a Vignesie)
14. s.f. puest o localitât o paîs piçul e fûr di man:  "O viôt che al à scuviert l'unic puest di sest ta cheste buse di paîs" (Alan Brusini, Gian Paolo Linda, I forescj)
    Sin. bûs
15. s.f. puest di vore:  al veve sì strussiade la vite, ma ancje cjatade la buse juste lavorant tal petroli e alì cjatade la sô vocazion (Alan Brusini, Alpin jo mame!)
    
    1. puest di vore convenient, dulà che si vuadagne e si lavore mancul pussibil:  un santul i à cjatât une buse in comun
16. s.f. puest li che si sepulìs un muart:  le metevin te buse e ducj intor a vaìvin (Alan Brusini, Par stradis lungjis); un an di lavôr di pizighet, fâ busis, taiâ la jerbe, tignî net, sapâ i stradoncins pal dì dai muarts (Pieri Menis, Un macet di sanmartinis)
    Sin. fuesse , tombe , sepulture , foran , sepulcri
17. s.f. (fig.) interval di timp libar:  [al lavorave tant] dome par sbaldî la sô vite, par no lassâ busis, tal timp, a cjalâsi masse tal cûr (Maria Forte, La tiere di Lansing)
    Sin. nuie , padin , polse , vueit , bûs
18. s.f. (fig.) spese che si à di frontâ o mancjance di bêçs o di altri che si à di comedâ:  e faseve saldo conts, tal so cjâf par doprâ ben ducj chei bêçs; che i comodavin ancje par cualchi buse di stropâ (Maria Forte, Cjase di Dalban); la Regjon e leve a cuvierzi cence fastidis e cence fâ compliments i 14 milions di euros di buse dal Teatri liric di Triest (Walter Tomada, Gibelli: «No son bêçs pal teatri furlan». Ma pai teatris di Triest a 'nd è simpri)
19. s.f. (fig.) mancjance te preparazion scolastiche e valutazion negative di chê mancjance:  vê une buse in matematiche
    
    1. mancjance ancje in altris setôrs, te culture, te atenzion, te cure tal fâ alc e v.i.
20. s.f. [TS] eletron. posizion lassade libare di un eletron te bande di valence di un semicondutôr che si compuarte tant che une cjarie eletriche positive:  i puartadôrs di cjarie de sostance eletronegative donadore D (eletrons) o eletropositive acetore A (busis), liberâts dal leam cul atom di partignince dai fotons avonde energjetics […] a mantegnin un cjamp eletric stabil (Lorenzo Marcolini, Lis celis organichis nanostruturadis)

Polirematichis e espressions idiomatichis

• buse ta la aghe s.f.
• cul pît te buse loc.adi.inv.
• fâ une buse ta la aghe loc.s.f.
• gjavâ un gri de buse loc.v.
• gjavâ un ragn de buse loc.v.
• intune buse di mûr loc.av.
• sul ôr de buse loc.av., loc.adi.inv.
• vê un pît te buse loc.v.

Proverbis:

• a volê trai il ves plui grant de buse o che il ves nol passe o che la buse si sprece
• cuant che e je scure la buse di Pinçan, e ven la ploie, co e je clare al ven bon timp
• cui che al prepare la buse pai altris se fâs par se
• cui che nol comede la piçule buse al comede la grande
• ducj use e ducj met la buse
• falade la prime buse si lis fale dutis
• lis cicimbelis no son dutis cu la buse
• miôr il clap che no la buse
• nissun nol va te buse, ogni muart e à la sô scuse
• no bisugne tirâ il pêt plui grant de buse
• ogni pâl la sô buse
• ogni scuse e tapone une buse
• ogni surîs e à dôs busis
• par taponâ la buse si met une rose
• puare chê surîs che e à nome une buse
• un vuarp che al mene un altri vuarp a colin ducj i doi te buse