Dizionari de Lenghe Furlane

vueit  /-é-/  vueit  [FO]

1. adi. cence contignût, cence nuie dentri o parsore:  «Ah, ce bon!… ce bon chest vin…» e ti bute vie la butilie vueide che si spache cuintri une lapide pôc lontan (Pieri Menis, Doi pizighets e un lari); la casse e dave un sun çondar di robe vueide (Maria Forte, La cjase dal Murat); e va tal armâr a cjoli la padiele di tiere dal cicin. Le cjol e e sint che no pese. I alce la covertorie e e je vueide (Meni Ucel, Il cicin)
   Var. vuêt
   
   1. cence vê mangjât:  Jacum che al jere a panze vueide, al tacà […] (Angelo Covazzi, A gustâ dal plevan); no si varès mai di bevi a stomi vueit (Guglielmo Pitzalis, Mole il bevi!)
   2. (fig.) cence bêçs:  chê di tornâ a cjase ogni an cu lis sachetis vueidis e no rivâ a parâsi, i lave al cûr (Riedo Pup, Vigji Brusin)
2. adi. cence personis:  al tornà indaûr e al le dentri in glesie. E jere vueide e scure (Carlo Sgorlon, Prime di sere); al ere di pouc començât il dopumisdì e lis stradis a erin cuasi vueidis (Stiefin Morat, Kebar krossè); in paîs a 'nd jere plui di cualchi cjase vueide, che i parons di agnorums a jerin migrants, cuissà indulà (Gianni Gregoricchio, Trê feminis)
   
   1. ancje cence bestiis o altris elements che pal solit a son:  e jere lade, spirtade, di une stanzie a chê altre, po intal curtîl, tal granâr, te vecje stale vueide (Franca Mainardis, Il sium di Lissandri)
3. adi. di puest, spazi e v.i., che al è viert e libar:  a son dismontâts ducj i doi e si son metûts a cuistionâ in chel toc di strade che e restave vueide tra il cjar e l'automobil (Josef Marchet, Lis predicjis dal muini)
   Sin. libar
   
   1. di puest di stâ impins o sentât, no ocupât di nissun:  Doro al jentrà e si sentà su la prime cjadree cjatade vueide sot il mûr (Pieri Menis, Doro)
4. adi. cence robis di fâ o cence robis interessantis:  par tant che al procuràs di concentrâsi, tes oris vueidis de mieze matine o dal dopomisdì sul tart, nol rivave a lei (Amedeo Giacomini, Tal ospedâl); Guri si sgrisulave de sô zornade vueide, cence une vôs che e cjanti, cence un fat che al cjapi un moment il pinsîr fissât (Dino Virgili, La aghe da pît la cleve); Nart al veve passât i cuarante e la sô vite e jere vueide e grise tant che une zornade di Invier (Roberto Ongaro, Cretevierte)
5. adi. (fig.) cence sens, cence contignûts di significât, cence impuartance e cence consecuencis:  lis argomentazions che a tirin fûr a son vueidis di ogni sostance (Josef Marchet, Sturm und Drang); i ai fevelât di cemût che o viodìn noaltris de Aidlcm la tutele, di ce che e à di contignî se no si vûl che e sedi une peraule vueide (Adrian Cescje, Memoriis di politiche linguistiche)
6. adi. di cdn. o di espression, che nol somee pensâ o che nol pense nuie, che nol à snait, gnerf, o interès:  Guri cul cjâf su la scudiele al finive di cenâ e chê sô muse cence sens, vueide, cui voi distudâts, e veve la muart tal aiar (Dino Virgili, La aghe da pît la cleve); siôr Ernest, il fi, al fumave pacjific, cui voi pierdûts daûr i cerclis dal fum. Une cjaladure vueide dulà che no podevin comparî pinsîrs ni bogns ni triscj (Maria Forte, La tiere di Lansing)
   Sin. çondar , insuls , lami , mauc , biât
7. s.m. [TS] fis. dome sing., spazi e cundizion dal spazi cence materie o cun gas une vore rarefats:  il prin che al à sperimentât il vueit cun sucès al è stât Evangelista Torricelli inte metât dal XV secul in maniere une vore semplice, ven a stâi cul stes moviment che si fâs cu la clessidre (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
8. s.m. [TS] filos. dome sing., te filosofie atomistiche, spazi cence materie postulât par motivâ il moviment dai atoms:  i mîts de antichitât nus contin une storie dal mont terestri dulà che nol è puest pal vueit, intindût come vueit assolût o il nuie (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   
   1. assence di materie postulât in ete moderne dai vacuiscj
9. s.m. spazi libar, cence personis o ancje cence bestiis o robis:  lis mês peraulis si slargjin tal vueit dal locâl (Alan Brusini, Gian Paolo Linda, I forescj); dal vueit dal tor […] al vignive jù a colp […] un ciulâ di argagns che a movevin il martiel des oris (Maria Forte, La rive di Sant Pieri); sui mûrs e tra il vueit dai portons, si implantin frascjis e ogni borc al si cambie in un biel stradâl di vert (Pieri Somede dai Marcs, Corpus Domini)
   
   1. puest indeterminât o cence nuie che al vegni calcolât interessant:  al cjalave fûr dal barcon, tal vueit, cui siei voi clârs che a slusivin, cence ni viodi, ni sintî (Alan Brusini, La cartuline); Pieri al butà la cjiche tal vueit e, vint sintût a colp un sgrisul di frêt, al decidè di tornâ dentri (Amedeo Giacomini, Tal ospedâl)
10. s.m. estension di tiere cence culturis e cence arbui:  la int che a lavoravin li dongje a lassarin dut impastanât e a scjavaçarin cjamps e vueits e palûts e si inzenoglarin sul agâr cu lis mans par aiar (Dino Virgili, Cuel Valâr)
11. s.m. (fig.) incompletece intune situazion, intune competence, intun argoment, intun test e v.i.:  oltri a jemplâ un vueit, cheste vore [Storie de art in Friûl] puedie judâ i furlans a jessi cussients de lôr identitât? (Erika Adami, O ai scrit pal gno popul); i vueits inte legjislazion a permetin aes autoritâts locâls di slontanâ a fuarce lis comunitâts rom dai lûcs là che a vivin par trasferîju in alozaments fûr man (Carli Pup, Romanie: slontanaments sfuarçâts di rom)
    Sin. mancjance , buse
12. s.m. (fig.) mancjance di alc o di cdn.:  cumò che [mê mari] no je vicin di me o sai cetant vueit che e à lassât te mê vite (Pieri Menis, Agnulat)
    Sin. mancjance
    
    1. mancjance di un sens profont, di alc che al sedi impuartant:  si fidìn di lui ancje par jemplâ in cualchi maniere il vueit de nestre vite (Francesc Placerean, Crist resurît al colme dute la sperance dal om); i pareve come di sei in spiete di un cualchi event, un alc di dolç, di grant, che al jemplàs il vueit de sô vite (Roberto Ongaro, Il muc)
13. s.m. recipient, spec. butilie o sim., cence il so contignût:  riciclâ i vueits de aghe minerâl
    Cfr. veri
14. s.m. [TS] tipogr. spazi blanc tra lis peraulis, cence letaris o simbui:  contis che a zirin ator des 2000 batudis, comprendûts i vueits (Raffaele Serafini, CONTECURTE stagjon 2011-2012)
    Sin. spazi

Polirematichis e espressions idiomatichis

• a panze vueide loc.av.
• a vueit loc.av., loc.adi.inv.
• mandâ a vueit loc.v.
• saltâ siet scudielis vueidis par cjapâ chê plene loc.v.

Proverbis:

• il cjaldîr che al ciule al è chel vueit
• l'om al cjante cuant che al è plen e la bote cuant che e je vueide
• la canicule se e cjate vueits i agârs ju implene, se ju cjate plens ju disvuede
• miôr un cjâf vueit che no mâl jemplât
• panze plene no i crôt a panze vueide
• stale plene e cjast plen, stale vueide e cjast vueit
• un sac vueit nol sta in pîts