sepulture
/-tù-/
se|pul|tu|re
[AF]
-
s.f.
puest li che si met un muart, o plui muarts, in gjenar formât di une buse, che dopo e ven taponade o ancje di une costruzion funerarie di valôr artistic:
chel forest lu salude [il pizighet] e po i domande dulà che e jere la sepulture di Ane Tovin. «Ane Tovin? … Ane Tovin?! … No le ai metude sot jo… e devi jessi un grum di agns che e je muarte… E je sigûr là…» (Pieri Menis, Un macet di sanmartinis);
al jere un dopomisdì: une fumate grise, frede, sirocâl e infagotave i pins alts e neris e i monuments blancs des sepulturis (Pieri Somede dai Marcs, I "resti")
Sin. tombe
, buse
, fuesse
, foran
Var. sapulture
Cfr. sepulcri
, monument
-
s.f.
il sepulî, il jessi sepulît e la lôr ritualitât:
Rosute, in façolet neri, e scovà la cjase daûr la usance, e si sentà su la puarte, scunide cu lis cjampanis a dilunc pe Cleve. Dopo sepulture a tornarin sù a mangjâ la fave dai muarts, cu la cjadree di puare Catin vueide insom la taule (Dino Virgili, La aghe da pît la cleve);
[nol covente fâ masse] ma nancje dismenteâsi dal pari o de mari l'indoman de sepulture! (Josef Marchet, Lis predicjis dal muini)
Sin. funerâl
, sepuliment
-
s.f.
(fig.)
la muart, la fin de esistence:
par dî la veretât di piçule mi lu àn insegnât [il furlan] / e cun grant onôr lu ai simpri cjacarât / pensant che al fos une ricjece e une braùre / invezit il mont moderni al vûl metilu a sepulture (Mara Puppo, A Merêt, par imparâ il furlan a menedêt)
Proverbis:
- aiar di fressure al puarte in sepulture
- cui che al è in sepulture al sa cui che al è muart
- difiet di nature si puarte in sepulture
- l'aur al è la sepulture dal om vîf
- soreli di veri e aiar di fressure a menin l'om in sepulture
- une femine e à vierte la sepulture par cuarante dîs daspò dal part
- vizi di nature si puarte in sepulture
- vuê in figure, doman in sepulture