Dizionari de Lenghe Furlane

bocje  /bò-/  bo|cje  [FO]

1. s.f. viertidure de muse, o tal music dai animâi, par li che al jentre il mangjâ, il bevi, tai vertebrâts ancje il respîr, formade cjape dentri lavris, dincj, cîl de bocje e lenghe:  al cjol fûr la borse dal tabac e une cjartine e a 'nt fâs un [spagnolet] e sal met in bocje (Meni Ucel, Culumie); cualchidun al passave inviât, ca sù insom, e ur zigave cu lis mans di ca e di là de bocje (Dino Virgili, La aghe da pît la cleve); un fîl di bave che i colave di un cjanton de bocje stuarte (Gianluca Franco, Cuant che l'Istât al finìs - Ogni etât la sô maravee); lu cjalà, cuntune sclese di ridi in bocje (Fabian Ros, Un piçul particolâr); Anute […] i leve intor come par câs al fantat e i stampave su la muse une bussade cun chê sô bocje frescje e cjantarine (Alan Brusini, Come tai romançs)
   Cfr. lavri , dint , zenzie , lenghe , cîl de bocje
2. s.f. espression de muse fate mudant la posizion dai lavris:  la bocje ridinte e i voi plens di lagrimis, lagrimis di gjonde (Roberto Ongaro, Il muc)
   
   1. esclamazion zigade a fuart:  se Zuan al saltave fûr pe puarte grande, al jere dome par cridâ ai fruts che a fasevin bocjis, li denant, e a zuiavin di cavalete (Maria Forte, La rive di Sant Pieri); e po, sù claps, e jù veris rots; e blestemis e bocjis. Un cjadaldiaul (Maria Forte, "Nossent")
3. s.f. (fig.) sensibilitât ai guscj, ai savôrs, persone che e à une cierte sensibilitât ai savôrs:  a Sant Denêl, in bande dal persut, la trute fumade e sa concuistâ lis bocjis plui delicadis (Sandri Carrozzo, Une regjon di cerçâ)
4. s.f. (fig.) persone, calcolade pal fat che e mangje, soredut intune famee o intun grup:  te sô cjase, polente e formadi no jerin avonde par dutis lis bocjis (Lucio Perès, Mê none Miute); la lôr e jere simpri stade une fameone fin di trente o cuarante bocjis (Dino Virgili, La aghe da pît la cleve)
5. s.f. (fig.) espression verbâl, vôs, sedi tant che lengaç, che tant che argoment, pussibilitât di espression di ideis e v.i.:  ogni an, il profete Jeremie al fevelà te grande glesie de plêf par bocje di Zuan (Riedo Pup, Zuan Gjeremie); nus à pandût la agne Lalie ce che al vignive dopo, che e jere la plui sclete e francje di bocje (Meni Ucel, Messe a straoris); cuistions une vore impuartantis, presentadis par bocje des autoritâts plui altis al plui alt sorestant dal guvier (Josef Marchet, Lis scjalis dal cjiscjel)
6. s.f. persone che e fevele, spec. che e fevele disint mâl:  e capive […] che un borc al scuen nudrîsi di peteçs se no nol vîf. E no si po stropâ dutis lis bocjis… (Maria Forte, La tiere di Lansing)
   Sin. lenghe , lengate , male lenghe , lenghe di lipare , lenghe lungje
7. s.f. viertidure di un recipient o di alc di vueit:  al cjapave la borse vueide, le voltave cu la bocje injù, le spalancave inmò une volte (Riedo Pup, I furlans e il muini); i contadins a stavin sui cjars, cul façolet peât su la muse, e a butavin balçûi te bocje de trebie, che ju gloteve intun lamp (Carlo Sgorlon, Prime di sere); in Gjermanie, par un pêl, nol jere finît dentri une bocje de fornâs impiade (Pieri Somede dai Marcs, Ta la ombre dal santuari)
   Sin. imbocjadure
8. s.f. jentrade o jessude di une ciert spazi o di une cierte struture:  insom e jere la bocje dal tunel, e dut al jere gnûf di scree, pront (Agnul di Spere, Fieste di inaugurazion); su lis bocjis dal puint, di une bande e di chê altre, a son dut il dì di vuardie intes garetis i Cosacs (Ivano Urli, Storie di Min); Deline e trote dut il dì pe cjase, pal curtîl, pal sedim, e Zuantoni le cjale de bocje dal toblât, dal cjanton de lobie, dal puartel dal ort (Dino Virgili, La massarie)
   Sin. jentrade , viertidure
   
   1. s.f. [CO, TS] arm. buse di une arme di fûc par dulà che al ven fûr il proietil:  lis monts dulintor a vevin butât fûr fûc cence soste de bocje di cent canons (Pieri Menis, Funerâl a Pâl Piçul)
   2. s.f. [TS] tecn. dispositîf che al è te terminazion di un condot par fâ cressi la velocitât di jessude di un fluit
   3. s.f. [CO, TS] gjeogr. ultin trat di un flum, dulà che si bute tal mâr o tun lât:  la barcje […] si slontanave di Noiâr dilunc sù viers la bocje dal flum (Barbara Battel, La biele puaretât)
   4. s.f. [CO, TS] gjeogr. jentrade strente intun trat di mâr o intun bacin:  la nâf e lave maestose viers la bocje de insenadure (Agnul di Spere, Int no consumade)
   5. s.f. [CO, TS] gjeogr. estremitât di un cjanâl:  la bocje dal Cjanâl dal Fier a Sud di Pontebe e jere presidiade di doi grups di oparis fortificadis (AAVV, Val alpin dal Litori: oparis difensivis di Sant Roc e di Perteade)
   6. s.f. [TS] vulcanol. viertidure terminâl dal cratêr di un vulcan
9. s.f. (fig.) cualsisei viertidure o buse:  l'an dal sut, che la tiere e spalancave grandis bocjis di sêt, il lât si secjà, e i pastôrs e lis mandriis a cjaminavin tal vueit (Dino Virgili, Cuel Valâr)

Polirematichis e espressions idiomatichis

• a bocje loc.av.
• a bocje strente loc.av., loc.adi.inv.
• a bocje sute loc.av., loc.adi.inv.
• a bocje vierte loc.adi.inv., loc.av.
• a bocje zune loc.adi.inv., loc.av.
• a mieze bocje loc.av., loc.adi.inv.
• a plene bocje loc.av.
• aghe in bocje loc.inter., loc.s.f.
• amâr in bocje loc.s.m.
• bagnâ la bocje loc.v.
• bocje ce vûstu loc.inter.
• bocje da ridi loc.s.f.
• bocje dal stomi loc.s.f.
• bocje di ridi loc.s.f.
• bocje tâs loc.inter.
• cîl de bocje loc.s.m.
• cjoli la peraule di bocje loc.v.
• cu la bocje vierte loc.adi.inv., loc.av.
• cul cûr in bocje loc.av.
• dal nâs a la bocje loc.av.
• fâ bocje da ridi loc.v.
• fâ bocje di ridi loc.v.
• fâ bocjis loc.v.
• fâ vignî la aghe in bocje loc.v.
• gjavâ la peraule di bocje loc.v.
• jessi di buine bocje loc.v.
• lassâ l'amâr in bocje loc.v.
• lassâ la bocje amare loc.v.
• lassâ la bocje garbe loc.v.
• leâ in bocje loc.v.
• leâ la bocje loc.v.
• meti in bocje loc.v.
• murî in bocje loc.v.
• netâsi la bocje loc.v.
• par bocje loc.adi.inv., loc.av.
• par bocje di loc.prep.
• restâ a bocje sute loc.v.
• restâ cui dincj in bocje loc.v.
• saltâ in bocje loc.v.
• saurî la bocje loc.v.
• saurîsi la bocje loc.v.
• sierâ la bocje loc.v.
• spudâ dolç cu la bocje amare loc.v.
• stropâ la bocje loc.v.
• tignî la lenghe in bocje loc.v.
• vierzi bocje loc.v.
• vierzi la bocje loc.v.
• vignî la aghe in bocje loc.v.

Proverbis:

• a 'nd volarès di macarons par stropâur la bocje a ducj
• a cjaval donât no si cjalii in bocje
• a taiâsi il nâs, si insangane la bocje
• a tignî i dincj sierâts in bocje, al è simpri un bon consei
• a tignî la bocje sierade, no jentrin lis moscjis
• bisugne lassâi la sonze in bocje ai gjats
• bisugne misurâ il cûl cu la bocje
• bocje e fum a consumin dut
• bocje onzude no fevele mâl
• bocje onzude no po dî di no
• bon pe bocje, trist pe borse
• buine bocje a fâs bon ardiel
• cortesie di bocje no coste bêçs
• cui che al à amâr in bocje nol po spudâ dolç
• cui che al à in bocje fêl nol po spudâ mêl
• cui che al taie il nâs al insangane la bocje
• cui che nol à bêçs te borse che al vedi mîl in bocje
• dispès la bocje a spude fûr cemût che al judiche e che al sint il cûr
• dutis lis bocjis a son sûrs
• e je la ultime gote chê che a lasse il savôr in bocje
• fin che a son i dincj in bocje no si sa ce che nus tocje
• fin che un al à dincj in bocje nol sa ce che i tocje
• il biel e il bon a jemplin la bocje
• il cjan al à i dincj in bocje
• il lat al ven pe bocje
• il miôr piruç i cole in bocje al purcit
• infin che si à dincj in bocje, no si sa ce che al tocje
• l'uciel al va di çope in çope tant che il sossedâ di bocje in bocje
• l'uciel in man al frut, la surîs in bocje al gjat, lis disgraciis in man al avocat
• la aghe in bocje a distude il fûc
• la bocje e mangje stâts
• la bocje le vin ducj par traviers
• la maleperaule e va di bocje in bocje tant che la sossedarie
• la mê bocje e je plui vicine de tô
• la mîl in bocje e il curtìs sot de cimosse
• la prime digjestion si le fâs in bocje
• la reson dai prepotents a sta su la bocje dai canons
• la salût e à l'aur in bocje
• larc di bocje, strent di borse
• larc di bocje, strent di man
• mangjio stran o mangjio fen, ce che mi va in bocje mi sta ben
• miôr patafâ la bocje che no mangjâ dute la robe
• no bisugne gjavâi lis surîs di bocje ai gjats
• no si cjalii in bocje al cjaval donât
• no si sa tant lavorâ che la bocje tant mangjâ
• no vierzi bocje se no ti tocje
• o mîl in bocje o bêçs in borse
• o mîl in bocje o bêçs te sachete
• ogni bocje il so pistum
• ogni cjâf la sô idee, ogni cjase il so costum, ogni bocje il so pistum
• ognidun al mangje cu la sô bocje
• par fâ il predi al covente: orele di marcjadant, bocje di purcit e schene di mus
• pe bocje al mûr il pes
• pe bocje si scjalde il for
• se no ai reson, a sparagnâ la bocje o pâr plui bon
• se reson no ai, miôr che o sparagni la bocje e che o pai
• se si file dal nâs a la bocje, no torne su la rocje
• se si file mai tant che al rivi dal nâs a la bocje, e je une glagn che no torne su la rocje
• se tu ti tais il nâs, il sanc ti va in bocje
• tu âs plui grancj i voi che no la bocje
• une nuviçute co a va a marît cu la bocje e vai e cul cûr e rît