Dizionari de Lenghe Furlane

viertidure  /-ù-/  vier|ti|du|re  [AF]

1. s.f. il vierzi, il vierzisi e il lôr risultât:  e sclopave la Vierte e si disniçave cun viertiduris di cisignocs e pestelacs (Maria Forte, Cjase di Dalban)
   Var. vierzidure
2. s.f. puest par là che si pues passâ di un spazi sierât intun altri spazi:  tal sotscjale dal cjast, che al faseve part de cjamarate e jere une viertidure (Checo Tam, Sense)
   Sin. buchere , buse , busoc , crepe² , crevadure , fal¹ , fressure , lûs , passaç , passadôr , passalizi , sclap , sfese , slambri , spacadure
   
   1. puarte o barcon:  la sô cjase, cul mûr divisori cence viertiduris fin al cuviert, e voltave une schene dure aes cjasis di là (Maria Forte, La rive di Sant Pieri); da une viertidure che e cjape mieze parêt cu la vereade a cuadrei di cristal e jentre une lûs sflandorose (Pieri Somede dai Marcs, Un pugn di moscjis)
   2. tai di un vistît che al lasse viodi ce che al è sot:  vistîts di sede plens di camufs e viertiduris (Pieri Somede dai Marcs, Timp di infier)
3. s.f. (fig.) scomençament:  la tierce fase e je segnade di une gnove viertidure dal dialic cu la Europe e cu lis istituzions continentâls (Marc Stolf, Corsiche, Scozie, paîs Basc, Catalogne, Friûl… Europe); e jere une zornade di tancj agns indaûr, un par di dîs dopo de viertidure de cjace (Enea De Colle, Une storie di cjace)
   Sin. inaugurazion , inviament , scomençament , scree
4. s.f. il sei viert pal public:  lis primis taulis di concertazion […] a àn confermât la domande par une limitazion des viertiduris des buteghis tes zornadis festivis (Redazion Radio Onde Furlane, Cumierç concertazion par vierzi tai dîs di fieste)
5. s.f. spazi viert, libar, larc:  dute la viertidure dal cîl e jere pal strît di cualchi corvat (Maria Forte, La tiere di Lansing); un mont piçal serât dentri trê cunfins di cresti e una viertidura di plan, ma grant grant par me (Novella Cantarutti, Pesteli)
   Sin. largjece , largjure , larc , estension
   
   1. distance o angul jenfri doi elements articolâts:  regolâ la viertidure dal compàs
6. s.f. (fig.) buine disposizion a acetâ, a confrontâsi:  al cors dai agns otante il Moviment Friûl al varà dai moments di viertidure viers de emitente, […] ma insom la linie de radio e restarà indipendente ancje di chel partît (Max Mauro, Un Friûl difarent: i 90 mhz di Onde Furlane); Suns Europe al è la dimostrazion concrete dai valôrs dal plurilinguisim e di trop che lis tantis lenghis minoritariis che si fevelin in Europe a pandin viertidure e modernitât. (Redazion Radio Onde Furlane, Suns Europe 2018)
7. s.f. [TS] zûcs intai scacs, primis mossis di une partide
   
   1. in cualchi zûc di cjartis, pontis o cumbinazion di cjartis necessariis par tacâ il zûc
8. s.f. [TS] ot. rapuart tra il diametri e la distance focâl di un obietîf o di une lint
9. s.f. [TS] sport massime tal balon e tal rugby, slargjament dal zûc tes fassis laterâls
10. s.f. [TS] fon. posizion dal sisteme fonic che i permet al aiar di passâ libar
    
    1. carateristiche des articolazions fonichis