Dizionari de Lenghe Furlane

fal¹  fal  [AF]

1. s.m. spazi vueit, buse:  o cjaminavi durmint, ingrampât ae code dal mûl; e mi sveavi a scjas co il pît al cjatave un fal (Alan Brusini, I ribei); tal mûr de façade, in bande de puarte, al jere un fal, un slambri insot, come se, no sai, e mancjàs une piere (Dino Virgili, La aghe da pît la cleve)
   Sin. bûs , buse , vueit
2. s.m. azion fate mâl, che e va cuintri di ce che al è ben, just, coret e v.i.:  "Eh, i grancj oms a fasin grancj fai!" (Roberto Ongaro, Cretevierte); se cualchi volte o ves scoltât i bogns conseis, dal sigûr no sarès colade in cierts fai che mi brusin ancjemò (Gianni Gregoricchio, Trê feminis)
   Sin. erôr , falope
   Cfr. colpe , pecjât
   
   1. element, detai che al è fat mâl, che al è un difiet:  sfueis di cjarte celestine cun poesiis scritis cu la machine. Lis leiei dutis. No vevin nancje un sôl fal (Agnul di Spere, Visâsi di chel puint radio); si capìs di mancul il fal di p. 13, là che si fevele di President dal Consei Giulio Andreotti: nol jere lui, in chel an, ma Giuseppe Pella (Laurin Zuan Nardin, Recension di Roberto Meroi, Storie dal balon e de Udinese)
      Sin. erôr , mende , difiet , falope , pecje
3. s.m. [TS] sport azion contrarie al regolament:  si fâs butâ fûr ancje il pisan Pinato par un brut fal su Burrai (Marc Stolf, Pisa - Pordenone 2-0)
   Sin. iregolaritât

Polirematichis e espressions idiomatichis

• cence fal loc.av.
• meti il pît in fal loc.v.

Proverbis:

• di un fal ind nas mil
• i plui grancj fai a vegnin dai plui grancj sapients