Dizionari de Lenghe Furlane

pecjât  pe|cjât  [FO]

1. s.m. [TS] teol. at contrari aes regulis divinis:  cui che al rispiete so pari al cuistarà il perdon dai pecjâts (Francesc Placerean, Cemût tirâ sù i fîs in cheste ete); la Madone e cjalave cu la stesse dolcece bogns e triscj, fortunâts e disfortunâts. Cui jerial tal just? Cui cence pecjât? Vadì nissun cun dute la colpe e nissun cence colpe (Maria Forte, La Madone de Pâs); Sant Zuan dizun e nût nol veve pôre a condanâ i pecjâts di Erode (Catarine Percude, La rosade di sant Zuan)
   Sin. fal¹ , mancjament , scapuç
   
   1. (eufem., par anton.) relazion sessuâl prime o fûr dal matrimoni:  [a àn obleât] lôr fie a rimedeâ in presse al so pecjât cul sposâlu […]. Cussì […] a àn crodût di stropâ la bocje ae int che e cjacarave (Josef Marchet, Lis predicjis dal muini)
   2. cundizion li che si è daûr a vivi fûr des regulis religjosis, massime in câs di relazions fûr dal matrimoni:  il plevan […] i veve fat intindi che cheste convivence e jere fûr di ogni regule e che lui al jere in pecjât mortâl (Gianni Gregoricchio, Trê feminis)
2. s.m., inter. ce che al è mâl, che nol conven, che al displâs e v.i.:  il mestri […] al conseave, lui, di fâlu lâ indenant cu lis scuelis, che al jere un pecjât fâi fâ il contadin (Lucio Perès, Gno barbe Sisto); al sarès un pecjât se ancje nô no doprassin pal miôr lis potenzialitâts grandis che o vin (Erika Adami, Partît il tren des lenghis); viodint chei biei fîcs i vignì la aghegole […] "Al è un pecjât straçâ tante gracie di Diu. A Udin a costin un voli dal cjâf!" (Angelo Covazzi, I fîcs)
   
   1. (antifr., iron.) in espressions par sorâ o par pandi sodisfazion ironiche:  ce pecjât: tante teorie introdutive strassade! (Adrian Cescje, Memoriis di politiche linguistiche)
3. s.m. (ancje scherç.) compuartament falât, colpe:  a coltivâ, ancje tal mistîr e te forme de produzion, lis costumancis e lis carateristichis locâls, in Carintie nol è un pecjât cuintri la nazion (Josef Marchet, Di ca e di là de stangje); al faseve in public, cence vergogne, il pecjadat di lei il gjornâl (Riedo Pup, I furlans e i gjornâi)
4. s.m. [FÛ] sintiment di compassion:  el mi ven di te pecjât / di abandonâcji per altrui (Anonim, Bielo dumnlo di valôr)

Polirematichis e espressions idiomatichis

• fâ pecjât loc.v.
• pecjât che loc.coniun.
• pecjât di gole loc.s.m.
• pecjât mortâl loc.s.m.

Proverbis:

• a preâ nol è pecjât
• a provâ nol è pecjât
• a robâ là che a 'nd è, nol è pecjât
• a robâur ai laris nol è pecjât
• al è miôr pôc cun justizie che no trop cun pecjât
• al è tant pecjât robâ che lassâsi robâ
• cui che si scuse cence jessi interogât al fâs clâr il so pecjât
• grant sant che al è sant jude, pecjât che in chest mont si lasse viodi di râr
• il pecjât al ingjenere la muart
• il pecjât dal von, il nevôt lu compon
• il pecjât nol sta mai scuindût
• il pecjât nol vûl lûc
• pecjât confessât, al è mieç perdonât
• pecjât vieri e pinitince gnove
• prin il pecjât e po la pinitince
• si dîs il pecjât ma no il pecjadôr
• si pant il pecjât ma no il pecjadôr
• un pecjât fat int une ore, in cent agns no si ripare