scus
scus
[FO]
-
s.m.
rivistiment, pal solit dûr, che al cuvierç ûfs, pomis o ancje il cuarp di ciertis bestiis:
gjavâ il scus dal ûf dûr;
rompi il scus de cocule;
i fruts a mateâ tal curtilut plen di scus di cais e di plumis di ucieluts (Maria Forte, Il vivi al è chel rangjâsi);
la tartarughe […] i ten ancjemò bot [al gjal], cu lis çatis grampadis par tiere par no molâ e dute sierade tal so scus (Giovanni Battauz, Flavio Cossar, Renato Iacumin, I mosaics de basiliche di Aquilee)
Sin. sglof
, sglofe
, cape1
Cfr. scusse
, corace
-
rivistiment protetîf ancje artificiâl:
un scus di fibre di carboni
-
s.m.
(fig.)
in espressions di comparazion, par dî che alc al è plen o straplen:
a scrupulavin, in buine fede, che al fos cjamât di bêçs come un scus (Antoni Beline, Pre Pitin);
le gleisie plene come un scus e, a le fin, un batimans che a nol finive pui (Latino, Mandi Italo, ti impensistu…?)
-
s.m.
(fig.)
in espressions di afiet, par indreçâsi a une persone che si vûl ben:
scus gno, o ai pinsîr che si torni a sglonfâ il dedon grues dal to pît. Curiti ben (Agnul di Spere, Chê dì che al neveà a Vignesie)
-
s.m.
rivistiment vegjetâl ancje no dûr
-
complès des fueis che a cuvierzin la panole, ancje tratadis e secjadis par deventâ materiâl di doprâ tal artesanât o par altris robis:
però ce bielis che a jerin chês pipinutis di scus che si cjatavisi in man (Cristina Noacco, Faliscjis);
[i puars sotans] a muerin tal lôr jet di scus, cui budiei ingropâts o di un colp e amen,… cence che il miedi ju judi (Alviero Negro, Int di masnade)
Sin. scartòs
, scusup
, scurubùs
, scussul
, scatùs
, scjatùs
, scuful
-
rivistiment de vuaìne
Sin. cosul
-
piel dal gran di ue
Sin. cuful
-
s.m.
(fig.)
vite parade, protete o passive o cence responsabilitâts:
a chestis personis [di valôr] si volarès dî une peraule: che a jessin fûr dal scus, che a metin al servizi de lôr tiere la lôr capacitât (Josef Marchet, Fûr cui che i tocje)
Sin. nît
-
s.m.
(fig.)
aparence, esterioritât che e pues platâ une sostance diferente o che e pues protezi:
al veve simpri mostrât une muse ruspie come un scus. Cumò, il vin i faseve mossit il cjacarâ cun ducj (Maria Forte, La tiere di Lansing)
Sin. scusse
-
s.m.
[TS]
arch.
sacomadure cuntun ingjâf a cuart di cercli, tipiche dal stîl doric e cjapade de architeture baroche:
doi barcons semicircolârs si vierzin de bande çampe e une curnîs a scus e cor sot de linde (Aministrazion Publiche, Glesie di Sant Carli Borromeo)
