Dizionari de Lenghe Furlane

cove  /cò-/  co|ve  [AF]

1. s.f. puest parât li che al polse o che si plate o che al ten i piçui un animâl, o li che e pon i ûfs une uciele:  el lôf intant vaìnt al rive ta sô cove (Dolfo Zorzut, No si devi mai ridi prime da la ore); Jacum sore sere, aromai sigûr di cjatâ come simpri un doi ûfs di zornade, di scuindon vie tal gjalinâr e cence cjalâ, dentri cu la man inte cove (Angelo Covazzi, Ûfs e fasûi)
   Sin. buse , côf , nît , tanâr , tane , taniç
   Cfr. place
   
   1. puest o struture fate di pueste par bestiis dumiestiis, par che si parin dentri o par che a polsin:  la cove dal cjan (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
      Sin. cuce , cuç , cuço
   2. ripâr ingjavât, ancje par personis:  lu vevin metût in vuaite uns dusinte metris prin dal flum, tune cove sgjavade tal teren clapignôs (Agnul di Spere, Cjalant la rive)
2. s.f. puest li che a cressin fissis dome ciertis plantis o cierts foncs, o cuantitât di plantis o di foncs che a cressin insiemi:  i vivevi cu la cjera: il prât e i lens, i trois e i salts da li aghi, e dopo il ciel, i gorcs da la Miduna, i puçuts cidins là che a mateavin li vriis, e li covi di duti li rosi (Novella Cantarutti, Pesteli)
   Sin. place
3. s.f. (fig.) puest li che si dan dongje personis che a puartin indenant ativitâts no legâls o no ben viodudis o segretis:  di cualchi bande, come a Cosean, a olsarin dî di no, lassantsi remenâ de massonarie, che e veve la cove a Sant Denêl (Francesc Placerean, Cuintristorie dal Friûl dal 1866 fint in dì di vuê)
   Sin. buse , côf , tanâr , tane
4. s.f. grup di piçui di animâi nassûts intune stesse volte:  [la frute sfolade] e jere un pôc avilide, ma un bon gustâ, la mê frutine, e une cove di gjatuts nassûts sot la scjale il dì prin, le àn fate subit deventâ legrute (Pieri Somede dai Marcs, Fieste in famee)
   Sin. covade
   
   1. (fig.) grup di fîs o di fruts piçui:  la femine […] e puartà cun se la ultime de cove, che e veve - an plui an mancul - la stesse etât di Miriam (Gianni Gregoricchio, Trê feminis)
   2. (fig.) grup di personis o ancje di robis che a vegnin fûr di un stes ambient, di un stes percors di formazion, intun stes timp e v.i.:  une cove di autôrs di nivel une vore alt (Walter Tomada, Pierluigi Cappello: «L’om plui concret? Il poete»)
5. s.f. (fig., ancje scherç.) puest di durmî o jet puar o rangjât cemût che si pues o ancje jet in gjenerâl:  si meterin dacordo di tornâ a cjase insiemi pe plui curte. Partint sul lâ a mont dal soreli, pes dîs a podevin jessi te cove (Pieri Menis, Tal bosc di Kebespok); ce fasevino i paisans dopo lâts te cove? Di sigûr a durmivin dongje la femine. E lui invezit, jessût de gjonde di chel mont di ostarie fat di fufignis e di ridadis, la gnot e jere un desert di pôre (Alan Brusini, La ultime partence)
   Sin. lodar
6. s.f. (fig.) struture ingjavade o plui o mancul taronde:  il cîl al jere piturât di nûi e di seren e il bosc, viers la mont, al jere a covis di colôrs secont la cualitât dai lens (Alan Brusini, Par stradis lungjis)
7. s.f. (fig.) puest o sistemazion comude:  Il Friûl al è la mê cove, il puest che mi fâs stâ ben (Erika Adami, Lis mil musis de Cine contadis di Giada Messetti)
   Sin. nicj , nicje , nît

Polirematichis e espressions idiomatichis

• meti in cove loc.v.

Proverbis:

• ancje il lôf al cîr la sô cove