Dizionari de Lenghe Furlane

place  pla|ce  [FO]

1. s.f. intune citât, paîs o borc, zone vierte e libare plui o mancul grande, par solit contornade di cjasis, dispès sît pal marcjât e ativitâts publichis:  sot i teis de place, il marcjât al jere un mismàs, une milizie di int, di bestiis, di caretis, di refis (Dino Virgili, La aghe da pît la cleve); e cjaminà vie a man çampe. Une glesie… po la place Sant Jacum cu la sô zoie di sotpuartis un pôc scrofâts e, tal mieç, i colôrs des barachis (Maria Forte, La tiere di Lansing)
2. s.f. personis che si dan dongje o a stan in place:  chê voie di meti dut in biel e veve sveât la curiositât de place (Maria Forte, Cjase di Dalban); e vierzeve i barcons di cjase ogni buinore cjantant che dute la place le sintive (Alan Brusini, Par stradis lungjis)
   
   1. il popul, la int in gjenerâl:  la sentence de place e jere che Selmo se veve volude chê brute fin: se al ves ubidide la femine… (Pieri Menis, Il fi de Rosse)
      Sin. int¹ , popul¹
3. s.f. puest larc e libar par ciertis ativitâts o servizis specifics, spec. par traspuarts o par lassâ par un pôc di timp grandis cuantitâts di materiâl:  intant che il bus lu puartave te place des corieris, Toio al cjalave la citât cu lis sôs cjasis bassis, lis viucis stretis, lis roiis, i pontesei (Alan Brusini, Il mâl dal tor); su la place [de fornâs], nete come un libri, lis riis di modon crût si slungjavin tal soreli (Dino Virgili, La aghe da pît la cleve)
   Sin. plaçâl
4. s.f. puest libar, che al permet di movisi, di passâ, di stâ e v.i.:  al podeve manovrâ di ce bande che al voleve, che a 'nd jere place di vendi (Antoni Beline, Pre Pitin); a vivevin bessôi tune cjase tant grande che e varès vût place par vincj di lôr (Meni Ucel, I Catanas)
   Sin. puest¹ , sît , spazi
5. s.f. (scherç.) çurie cence cjavei:  vê une biele place te çurie
6. s.f. [TS] cum. sît dulà che si davuelzin contratazions comerciâls e finanziariis e il complès des contratazions e des cundizions di marcjât:  ce presit fasie la place?
   Sin. marcjât¹
7. s.f. [TS] bancj. sît che al à servizis di bancje e di operazions finanziariis
8. s.f. [TS] milit. centri fortificât o localitât cuntun comant militâr:  la fantaçute, si capìs, no saveve ce rispuindi, ma e pensà che al comandant de place nol sarès stât prudent dîi di no (Roberto Ongaro, Il muc); ridots i difensôrs in confusion, / disperâts di podê plui fâ difese, / bandere blancje alçant tratin la rese, / e la place si rint a discrezion (Ermes di Colorêt, I, 74)
9. s.f. lûc di une cierte estension caraterizât de presince vualive di ciertis plantis:  di Vierte, la braùre di puartâ un macet di violis ae mame o ae mestre nus faseve cori a cirîlis tai rivâi dai Cuarnats in ricès. O savevin ben nô là che a jerin lis placis justis (Lucio Perès, Tal Cuar)
   Sin. puest¹ , sît
   
   1. puest just par cjatâ une cierte bestie, puest li che dispès une bestie e sta incovade:  cuant che al tacave tor i sghirei, la sô place [par pescjâ gjambars] tal indoman al jere il Gambarin sot la ombrene lizere dai gjatui (Maria Forte, Il vivi al è chel rangjâsi); là che e jere une tacule blancje, blancje pai claps monts, cence muscli di aghe e cence teraç, e dongje di un clap grant, li e jere la lôr place [des passaris] (Lucio Perès, A pescje tal suei)
10. s.f. [TS] agr. toc di prât dongje di stradis o stradelis che si incrosin o che si dividin
    Sin. beorcje , plaçute

Polirematichis e espressions idiomatichis

• automobil di place loc.s.m.
• baron di place loc.s.m.
• fâ place loc.v.
• lâ in place loc.v.
• lâ jù in place loc.v.
• meti in place loc.v.
• su la place loc.av.

Proverbis:

• brut in fasse, biel in place; biel in fasse, brut in place
• cjase che si fâs in place o masse alte o masse basse
• ducj à gust di viodi mats in place ma no dai siei
• Nadâl in cjase, Pasche in place; Nadâl in place, Pasche in cjase
• nissun che al disi mâl in place se in cjase ind à in fasse
• se o lin a puartâ la nestre crôs in place, o tornìn a cjase cu la nestre