Dizionari de Lenghe Furlane

marcjât¹  mar|cjât  [FO]

1. s.m. puest, cun dut il so complès di ativitâts, là che si dan dongje, ogni dì o in zornadis fissadis, vendidôrs o produtôrs interessâts a mostrâ e a vendi marcjanzie e compradôrs:  al veve passade dute la buinore ator pal marcjât, fermantsi a cjalâ ogni banc di cocis, cirint la plui "juste" (Christian Romanin, Taiant la coce); Jacum al jere cognossût in dut il Friûl par vie che al zirave cu la sô marcjanzie par ducj i marcjâts (Angelo Covazzi, Foncs); [lis feminis africanis] a viodin de cjase, dai fîs, a fasin di mangjâ, a van a cjoli la aghe tai poçs e dispès a van a marcjât a vendi ce che a produsin (Erika Adami, La fuarce de Afriche che no si viôt: lis feminis)
   Sin. fiere² ipon.
   
   1. ancje in riferiment dome al puest, cence lis ativitâts di comprâ e di vendi, e ancje tant che microtoponim:  sagre a Martignà, bal sul marcjât sot i lens grancj (Dino Virgili, La aghe da pît la cleve); Basâr al jere famôs zuiadôr di balon sul marcjât cun partidis che a duravin de matine fin che al vignive scûr (Alan Brusini, Amîs come prime); un locâl infet che al dave sul marcjât des jerbis, par Pieri la place plui biele e, di sigûr, la plui scjassose di dute la citât (Amedeo Giacomini, Tal ospedâl)
2. s.m. [TS] econ. complès di ducj i scambis che si riferissin a un setôr o une aree gjeografiche determinade:  i vins DOC dal Friûl a son in dì di vuê preseâts sul marcjât talian e su chel internazionâl (Enrico Peterlunger, Storie curte de vît in Friûl); dome i bens che a son vendûts e comprâts sul marcjât a puedin jessi valutâts tal lôr valôr su la fonde di presits che a nassin di une negoziazion (Marzi di Strassolt, Dal Prodot Interni Lort aes misuris dal benstâ)
3. s.m. [BF] (fig.) confusion o puest plen di confusion:  intant al municipi, cu la fiere / des grandis circostancis, dentri e fûr / e fûr e dentri, un mercjât, un sussûr, / ordins, disordins e mes a cariere! (Pieri Corvat, El cuarantevot); […] un tibidoi e fasin e un marcjât / che ven la ploie (Enrico Fruch, La roseane)
   Sin. desio , disio , infier , casin , cjadaldiaul , tananai
4. s.m. (fig.) il marcjadantâ ancje in robis che no si podaressin comprâ e vendi par resons di morâl, onestât, dignitât e v.i.:  [vie pe vuere] tancj a vevin fat marcjât cu la cussience stant in belance fra lis parts, stant atents a no fâ mai calâ un plat plui dal altri a favôr di nissun in chel comercio di compromès, ingredeôs e slichiot, che al po puartâ ancje a no vê plui rispiet di se stes (Roberto Ongaro, Il muc)

Polirematichis e espressions idiomatichis

• a bon marcjât loc.av., loc.adi.inv.
• marcjât neri loc.s.m.

Proverbis:

• adore a marcjât e tart a la vuere
• al va plui di un mus a marcjât
• dôs feminis e une ocje a fasin un marcjât
• no bisugne fâsi fâ gole de robe a bon marcjât
• no si vent dutis lis pioris che a van a marcjât
• ogni marcjât al dure trê dîs
• ognidun cul so sac che al ledi a marcjât
• prin ton a soreli jevât, cjol il sac e va a marcjât; prin ton a soreli a mont, cjol il sac e va pal mont
• sul ultin dal marcjât si à la robe simpri a plui bon presit