beorcje
/-ò-/
be|or|cje
[AF]
-
s.f.
puest indulà che une strade si divît in dôs stradis o li che dôs stradis si cjatin intune:
Tresesin in chei agns al jere un distacament militâr su la beorcje de strade Bariglarie che e vignive sù de Marsure e de Julie che e vignive sù da Udin (Alan Brusini, Amîs come prime);
cuant che al rivà li de beorcje al cjalà il Crist de ancone (Angelo Covazzi, Jacum in tribunâl par un piçut di fen)
Sin. bivort
Var. bevorcje
-
part di prât o teren jenfri dôs stradis, dôs stradelis o doi trois che si dividin o che si cjatin:
al reste su la beorcje di tarabane dome chel rôl vieri (Dino Virgili, La aghe da pît la cleve);
e alore al vanzave timp di polsâ, massime la sere, dopo cene, butâts su la jerbe fresculine de beorcje (Riedo Pup, I furlans e lis feriis)
-
s.f.
(fig.)
pont di division o di incuintri di elements diviers:
il destin al à volût che il paîs dai Carnics al deventàs la beorcje indulà che si trussin altris trê razis vignudis dopo: la gjermaniche, la latine e la sclave (Josef Marchet, Cuintristorie dal Friûl fin sot la Italie);
cualchi alc - ma ce mo? - al jere stât çoncjât. Nissun saveve dî ce. Ognidun al veve sielte la sô strade, in cidin: la beorcje ju veve dividûts, dislontanâts (Dino Virgili, Ombrenis sul liston);
la cunvigne dal 1999 si metè intune sorte di beorcje tra la linguistiche academiche, autoreferenziâl e inutile pe nestre politiche linguistiche, e chê extraacademiche in vie di formazion, ma in cressi e produtive (Adrian Cescje, Memoriis di politiche linguistiche)