Dizionari de Lenghe Furlane

metisi a puest    [CO]

1. loc.v. meti a puest alc di se stes, par se stes, intor di se stes e v.i.:  si metè a puest un çuf sgardufît che i colave sul cerneli (Fabian Ros, Eivissa mon amour); il Poete si met a puest i ocjâi e al fâs di sì cul cjâf (Davide Ballaminut, Une storie piçule)
2. loc.v. disponisi dulà che si à di stâ:  Cjandot e i coriscj si metin a puest sot, a man drete (Alviero Negro, La cjase); i pareve che ogni tessare dal misteri si metès a puest (Raffaele Serafini, Contis sot spirt)
3. loc.v. tornâ intun bon stât, in buinis cundizions, in ordin, in salût, in stât di funzionâ e v.i.
   Sin. meti in ordin , meti in sest , meti in fîl , sistemâ , comedâ , regolâ
   
   1. vê une soluzion, lâ a finî ben:  i siei compagns i vevin tant dit di no lâ vie bessôl, di spietâ almancul une dì o dôs che lis robis si metessin a puest, ma lui nol veve volût scoltâju (Jolanda Mazzon, Di là de rêt)
4. loc.v. cjatâ une buine posizion economiche, professionâl, sociâl, sentimentâl e v.i.:  al veve tacât cun so pari il discors sul lâ vie di cjase: al veve motivât che in Friûl al varès metût masse agns par metisi a puest (Agnul di Spere, I prâts des Savodagnis)
   Sin. sistemâsi
5. loc.v. (ancje fig.) fâ in mût di no vê debits, credits o cuistions impins:  il plevan i domande ancje alc de ultime volte, i da la assoluzion, ma par altri bisugne riparâ cuntune pinitince e metisi a puest ancje cul Signôr (Angelo Covazzi, La pinitince)

Components:

• metisi v.pron.intr., v.pron.tr.
• puest¹ s.m.