Dizionari de Lenghe Furlane

lavôr  la|vôr  [FO]

1. s.m. ativitât destinade a fâ o a otignî un ben, un prodot, un servizi e sim.:  a asfaltavin la Pontebane. […] Dîs oris in dì di lavôr par trê e cuarante in dì, sot un soreli che al inçonderave (Meni Ucel, Ideis); il lavôr [su la fornâs] a Martrent al començave denant dì e al finive dopo lât a mont soreli (Riedo Pup, Chei di Martrent)
   Sin. vore
   Cfr. ativitât , cefâ , funzion , incarghe , mansion , ocupazion
   
   1. il vê un implei, une posizion contratuâl che e permet di fâ une ativitât produtive e di jessi paiât:  Renzo, par vie de situazion economiche e de mancjance di lavôr, al scuen lassâ la femine e emigrâ intal forest (Fabian Ros, Ritornerò per Natale); une manifature […] che e deve lavôr a plui di 30 mil operaris (Erika Adami, Cjargne, tiere di tiessidôrs)
      Sin. ocupazion , vore , puest di vore
   2. puest o timp li che si puarte indevant chê ativitât:  a vevin fevelât tantis voltis insiemi cuant che a restavin bessôi, tal curtîl o sul lavôr (Roberto Ongaro, Il muc)
2. s.m. tal pl., complès des ativitâts par tignî in ordin une cjase o par fâ dut ce che i covente ae cjase e ae campagne:  a jerin lis bestiis di viodi, i lavôrs di distrigâ adalt, abàs e fûr… La cjase, il curtîl, la braide a someavin plui grancj, cumò, cul soreli parsore (Dino Virgili, La massarie); il mês di Avost la int e polsave, parcè che Avost al è simpri stât un mês che i lavôrs si cangjin; in campagne e tai vignâi al è cuasi dut fat (Riedo Pup, I furlans e lis feriis); passade la colme dai lavôrs, i fantats si metaran a tirâ sù i mûrs: si son impegnâts di fâ un pâr di oris di vore ogni sere (Josef Marchet, Lis predicjis dal muini)
   Sin. vore
3. s.m. tal pl., insiemi di ativitâts coordenadis, spec. par rivâ a un risultât complès, tant che la costruzion di un edifici, la realizazion di un progjet e v.i.:  il cont Checo al veve za dât in man i lavôrs al inzegnîr Polverosi (Riedo Pup, Il façolet dal Dacian)
   
   1. ancje in riferiment ae realizazion di alc che nol sedi un prodot materiâl o economic:  dopo la fin dal istitût monarchic (1946), la assemblee costituente e scomençà i lavôrs par butâ jù la gnove Cjarte fondamentâl de Republiche (Odorico Serena, Il furlan tes scuelis e te universitât)
4. s.m. risultât che al ven fûr de ativitât lavorative:  a sagre, te cooperative, tu podevis amirâ ducj i lavôrs di chê manifature [di scus] (Cristina Noacco, Faliscjis)
   Sin. opare , prodot , manufat , vore
   
   1. risultât di une creazion artistiche, leterarie e v.i.:  cui siei colôrs e cui siei pinei, al passave lis zornadis, lis setemanis, i mês a cjareçâ chê Sante Madalene che pareve destinade a deventâ il plui biel dai siei lavôrs (Zuan Lurinçon, La Madalene)
5. s.m. il doprâ une cierte cuantitât di energjie par un fin determinât:  la energjie e je par solit definide tant che la capacitât di davuelzi un lavôr (Dario Bianchini Giaiotti, Fulvio Stel, Energjiis rinovabilis in Friûl-Vignesie Julie: ce che al è disponibil e a cualis cundizions)
   Sin. ativitât , vore
6. s.m. [TS] fis. cuantitât di energjie che e passe tra doi sistemis cuant che al sucêt un moviment par vie di une fuarce
7. s.m. (coloc.) in espressions che a comentin une situazion negative e dificile di justâ:  ribaltâts cul automobil, e jere une robe di fâ pôre. […] «Ce lavôrs, eh, ce robis! La zoventût di vuê!».
   Sin. berdei , imbroi

Polirematichis e espressions idiomatichis

• lavôr neri loc.s.m.
• puest di lavôr loc.s.m.

Proverbis:

• a lâ daûr dai lavôrs dai altris, a van in discapit i siei
• a palâ nêf e a spacâ coculis, dut lavôr dibant
• cui che al vûl vê lavôr mâl fat, che lu pai denant trat
• cul timp e cul lavôr il morâr al devente sede
• dal lavôr si cognòs il mestri
• finide la zornade, finît il lavôr; finide la gnot, finît il ripôs
• lavôr fat si lu cjate
• lavôr fat si lu cjate fat
• lavôr fin si mangje fin
• lavôr mâl fat al è timp pierdût
• lavôr mieç fat al è biel finît
• ogni plat il so savôr, ogni man il so lavôr