Dizionari de Lenghe Furlane

opare  /ò-/  o|pa|re  [FO]

1. s.f. ativitât o azion che e prodûs cierts risultâts:  il prefet, mancul mâl, nol faseve altri che laudâ la mê opare [di podestarie] e il comun (Pieri Somede dai Marcs, Lis nestris rosis); a spandin il lôr tuessin indulà che e larès fate opare di pacificazion e di concuardie (Josef Marchet, Di vicin e di lontan)
   Sin. at¹ , azion¹ , ativitât , vore , lavôr
   
   1. [TS] religj., teol. azion fate dal om, calcolade impuartante tant che espression volontarie de fede che e puarte a salvece:  i predis furlans no àn mai vût la manie des discussions teorichis, si son simpri contentâts dai fats, a àn simpri abadât a lis oparis (Riedo Pup, I furlans e i predis)
2. s.f. risultât di une azion:  chei cuatri piveluts ambiziôs […] che no stein a contâle a nissun che la regjon furlane, ancje cussì spadade e ramondade come che e je, e je dute opare lôr (Josef Marchet, Di bessôi)
   Sin. prodot , risultât
3. s.f. struture edilizie o ativitât di costruzion di une struture:  ancje conservant buine part des oparis di difese medievâls, il complès al fo trasformât di plante fûr tal Cinccent (Consorzi pe difese dai cjistiei storics dal Friûl - Vignesie Julie, Voleson); lavôrs publics, contribuzions, sovenzions par une opare o par chê altre (Josef Marchet, Di vicin e di lontan)
   Sin. lavôr , prodot , vore
   
   1. ativitât di costruzion, spec. di une struture religjose:  la opare dal domo di Mortean
      Sin. lavôr , vore
4. s.f. prodot di une ativitât artistiche o inteletuâl:  tal 1560 e comparì - dedicade a Badoer - la Fabrica intellectualis dal udinês Marcantonio Luigini […]. Si trate di une oparute enciclopediche dividude in sîs parts (Mario Turello, Il brevet); tal 1995, Onde Furlane e darà une man ancje ae publicazion dal CD "Colôrs", la seconde opare dai Mitili FLK (Max Mauro, Un Friûl difarent: i 90 mhz di Onde Furlane); [Afro Basaldella] al jentrà, cu lis sôs oparis, tes colezions dai museus plui prestigjôs dal mont (Luca De Clara, Afro Basaldella)
   Sin. vore
   
   1. produzion di un artist:  scuasit dute la sô opare leterarie [di Pieri Çorut] e je stade scrite par furlan (Roberto Iacovissi, Pieri Çorut)
5. s.f. gjenar di rapresentazion artistiche li che la recitazion si fâs cjantant cun acompagnament de orchestre:  apassionâsi di opare
   
   1. singul lavôr che al fâs part di chel gjenar:  e cjantuçave a bocje sierade une romanze de Manon, la uniche opare che e ves viodude cul so om (Carlo Sgorlon, Prime di sere); la valîs plene incolme di discs a trentetrê zîrs di tangos e di dutis lis oparis di Verdi che al jere stât a viodi e sintî (Ivano Urli, La musiche)
   2. teatri là che si metin in sene spetacui di chel gjenar
6. s.f. persone cjapade a lavorâ sot paron, a zornade, par une stagjon o in câs ancje par timp plui lunc:  o ai dodis oparis a svangjâ la vigne (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. vore
7. s.f. [CO] decorazion in tiessûts o intais cun figuris in rilêf di motîfs vegjetâi o animâi:  un façoleton di lane tiessût a opare (Giulio Andrea Pirona, Novo vocabolario friulano)
   Sin. lavorîr

Polirematichis e espressions idiomatichis

• a opare loc.av., loc.adi.inv.
• meti in opare loc.v.

Proverbis:

• opare ben comandade e je mieze fate