Dizionari de Lenghe Furlane

imbroi  /-òi/  im|broi  [AF, BF, CO]

1. s.m. [BF] il jessi fat sù intun grop complicât:  dut un imbroi di spali
   Sin. garbui , grop , imberdei , ingredei , intric , involuç , voluç
2. s.m. [AF] situazion complicade, dificile di frontâ:  "Ce pretesis, chestis robis son simpri plenis di imbrois, e no si po distrigâlis tun bati di voli" (Pieri Somede dai Marcs, Un pugn di moscjis); "No stâ a fidâti, no stâ a crodi masse… No stâ a lâ a cirî imbrois… " (Maria Forte, Cjase di Dalban); "Tu ti sês metût tun biel imbroi, tu. No sâstu che al è il tribunâl di vuere?" (Pieri Menis, Cemût che o soi restât caporâl)
   Sin. complicazion , intric , grop , probleme , cuistion , cantin , fastidi , dificoltât
3. s.m. [CO] il fâ crodi a cdn. alc che nol è par vê un vantaç in so dam:  in dut ce che a fasin o ce che a disin e je sot vie une baronade, e in dut ce che a viodin o che a sintin, a nulin un imbroi (Josef Marchet, Dongje e lontan); e co i vignive in orele ne carognade o un imbroi, ce soflades e ce peraulones: «Rompiur la schene cu la belance de justizie!» (Vico di Cec, Un furlan di onôr)
   Sin. broi , imbroiade , imbroiadure , imbroieç , imbroionarie , imbroioneç , ingjanizie , rangjade , razîr , trabossigne , trapel , truc¹ , trufarie , ingjan

Proverbis:

• feminis, lambretis e orlois a son trê imbrois