meti a puest
[AF]
-
loc.v.
disponi alc dulà che al à di stâ:
"Sveait Zuanin, che al puarti lis viscjadis te bressane; intant lis metarà a puest Radeschi" (Maria Forte, L'aventari pal barcon)
-
loc.v.
fâ jessi o fâ tornâ intun bon stât, in buinis cundizions, in ordin:
"Cjare tu, Matie, tu tu âs voie di fâmi lavorâ masse, par meti a puest dute cheste cjasone… Madone, viôt chi cetancj pacs di disfâ… Ce ise dute cheste robe?! …" (Pieri Menis, Sul agâr);
cu la scuse di meti a puest, di netâ, al curiosave ca e là (Roberto Ongaro, Cretevierte);
al veve vût la incarghe di meti a puest i archivis (Pierluigi Visintin, Friûl e furlans te Histoire de ma vie di Giacomo Casanova)
Sin. meti in ordin
, meti in sest
, meti in fîl
, sistemâ
, comedâ
, regolâ
-
fâ che alc al funzioni o che al torni a funzionâ:
al tocje rangjâsi ancje a comedâ il tratôr, se tu vûs doprâlu subit: se tu vadis dal mecanic e covente une setemane par che tal metin a puest (Marta Vezzi, Ravasclêt. Aziende agricule di Edda De Crignis)
-
fâ che cdn. al stedi ben di salût:
"Nuie di serio, siore, e je dome un fregul fruiade, cun cualchi midisine le metìn a puest" (Giuliana Pellegrini, Gotis)
-
cjatâ une soluzion, fâ che alc al ledi a finî ben:
il plevan al minace di no benedî il cuadri, anzit, mio marît al è lât in canoniche par chest motîf, par meti a puest lis robis (Costantino Smaniotto, Co l'amôr al cimie)
-
loc.v.
dâ a cdn. une buine posizion economiche, professionâl, sociâl, sentimentâl e v.i.:
e invidave chês personis in grant par rivâ a meti a puest i fîs (Maria Forte, Cjase di Dalban)
Sin. sistemâ
-
loc.v.
tratâ cdn. cemût che si merete, soredut cun severitât:
"Gjigji lu ai metût a puest! … Lele la cuinçarai ben ancje chê! Figuraitsi!" (Arturo Feruglio, Un grop sul stomi);
"Tilde, isal cualchidun che ti disturbe?" al bruntulà cun vôs che e voleve jessi di menace. "No." E rispuindè jê a colp. "E ancje se al fos, o soi buine di metilu a puest di bessole" (Gianni Gregoricchio, Trê feminis)
Components: