Dizionari de Lenghe Furlane

mont²  /-ò-/  mont  [FO]

1. s.m. l'univiers e dut ce che i sta dentri:  cuant che il Signôr al creà chest mont, dopo di vê sfladassât par sîs dîs, si cjatà avonde content di ce che al veve metût in stât (Josef Cjargnel, Il Friûl al è nassût cussì)
   Sin. creât , creazion , marimont , univiers
2. s.m. il planet Tiere, sedi in gjenerâl, sedi soredut te sô dimension antropiche, dispès ancje in espressions iperb.:  i reperts [di pterosaur] de Dolomie di For a son alore tra i plui antîcs dal mont (Francesco Gobbo, Gjeologjie e paleontologjie ator di Preon); emigrants lâts a cirî fortune ator pal mont (Max Mauro, Un Friûl difarent: i 90 mhz di Onde Furlane); un franzel al zornave e chê sô fieste e jemplave il mont intîr (Pieri Menis, Chei di Muraie)
   Sin. marimont , tiere
   
   1. la umanitât, dut il gjenar uman:  mantignî la pâs intal mont (Alessandro Pascolini, Un mont cence armis nucleârs. Sfidis sientifichis e tecnologjichis); i svuizars a saressin rivâts istès a limitâ il numar dai lavoradôrs forescj, ma cence masse scandui. No in maniere traumatiche pal non de Svuizare tal mont (Agnul di Spere, In viaç di domenie)
   2. cuntun adi. o une specificazion, une part de tiere in sens gjeografic o gjeopolitic:  inteletuâi cristians di lenghe greghe, slâfs, ebreus, sirians, armens [tal Imperi otoman] a contribuivin ae costruzion di une coinè culturâl di profîl cetant alt, che e savarà dialogâ cul mont ocidentâl e no dome combatilu (Angelo Floramo, L'imperi dai Turcs al rive in Europe, messedant violence e maravee)
   3. cuntun adi. o une specificazion, civiltât o fase di storie umane:  Pella e jere une capitâl fûr di man, scuasit une citât di provincie, a pet dal mont grêc e des grandis civiltâts dal Orient (Carlo Sgorlon, Il dolfin)
   4. cuntun adi. o une specificazion, complès di chei che si diferenziin su la fonde di interès professionâi, politics, sociâi, etnics, religjôs e v.i.:  zovins che a àn bisugne di jentrâ tal mont dal lavôr (Fulvio Mattioni, Il futûr dal Friûl: laude ae "no sotan" economy); o inviai la esperience didatiche di Scuele Furlane cun intindiment sperimentâl e di stimolazion dal mont dal insegnament e di chel politic (Adrian Cescje, Memoriis di politiche linguistiche)
3. s.m. ogni cuarp celest che si pense che al puedi someâsi cu la Tiere:  O domandai a lis alienis informazions sui monts di provignince (Checo Tam, Sense)
   Sin. planet
4. s.m. il vivi cun chei altris, il complès des relazions sociâls:  lontans dal mont, jenfri lis muraiis altis e glaçadis di un convent (Zuan Lurinçon, La Madalene)
   Sin. societât , int¹
5. s.m. realtât limitade percepide in maniere subietive:  forsit al veve pensât che dut il gno mont al varès vût par simpri i confins de valade, di une bande il Clap Grant e di chê altre lis Casermis rossis (Carlo Sgorlon, Il dolfin); la Rosine, intant, no viodeve plui il mont cui stes voi ancje se il dolôr si jere un pôc umiliât (Maria Forte, Cjase di Dalban)
   
   1. complès dai pinsîrs, dai sintiments che a componin la vite interiôr di une persone:  une grinte che i veve fat meti di bande dut il mont dai afiets di prime, come se e fos robe di butâ (Alan Brusini, Par stradis lungjis); cetantis ombris intor di me, ce plen di misteri che al è il gno mont dal insium (Checo Tam, Ombris)
6. s.m. complès di dut ce che al tocje un ciert argoment, une cierte ativitât:  la globalizazion e je rivade tal mont dal balon e ancje a Udin, come par chês altris grandis scuadris (Christian Romanin, Dino Zoff: «O vin lidrîs buinis, o vin di tignîlis di cont»)
   Sin. sfere , cjamp

Polirematichis e espressions idiomatichis

• altri mont loc.s.m.
• lâ pal mont loc.v.
• prometi il mont te sachete loc.v.
• ribaltâ il mont loc.v.
• sbregâ il mont loc.v.
• strucjâsi il mont loc.
• vignî al mont loc.v.
• vignî dal mont de lune loc.v.
• vignî tal mont loc.v.

Proverbis:

• a lâ pal mont no si cjate lis luianiis picjadis
• al è simpri mieç mont di vendi
• al è stât un sôl galantom in chest mont e ancje chel al è muart picjât
• al è stât un sôl galantom in chest mont e lu àn metût in crôs
• al vâl plui il cûr content che no dut l'aur di chest mont
• avâr al è dut il mont
• che al coli il mont, baste che nol coli par me
• che nol nassi al mont cui che nol lavore
• content jo, content dut il mont
• cu la pazience il pedoli al à fat il zîr dal mont
• cuant che il vieli al duar e il zovin al vegle, il mont nol va plui ben
• cuant che la nêf e je su la mont Pinêt, par dut il mont al è frêt
• cuant che lis monts a àn il cjapiel, met jù la pale e cjol sù il ristiel
• cui che al à fat il mont al po disfâlu
• cui che al cognòs il mont e nol è bon al vîf di mincjon
• cui che al vûl vivi e che al vûl stâ ben che al cjoli il mont come che al ven
• cui po e cui pote in chest mont
• cul tignî cont si devente parons di mieç mont
• cul timp si fâs dut: ancje il mont al è fat un pôc par volte
• da la plui grant montagne al ûf de ruie, ce che tal mont al è fat, nol è par nuie
• dut il mont al è paîs
• fâ, savê fâ e dâle di intindi a son lis trê colonis dal mont
• il flôr tal cjamp, lu jude ogni sant; l'om tal mont, Diu lu jude ogni tant
• il mont al cres ma nol invente
• il mont al è biel parcè che al è variabil
• il mont al è biel parcè che al è variât
• il mont al è biel pe sô varietât
• il mont al è come che si sa cjapâlu
• il mont al è di cui che al sa cjapâlu
• il mont al è dut une manovre
• il mont al è fat a scarpet: cui lu gjave e cui lu met
• il mont al è fat a scarpete: se al po te pete
• il mont al è fat a scjale: cui che al va sù e cui che al cale
• il mont al è fat a scjale: cui cres e cui cale
• il mont al è fat a scjale: un pôc si cres e un pôc si cale
• il mont al è mâl scompartît: cui al vai e cui al rît
• il mont al è mieç di vendi e mieç di comprâ
• il mont al è simpri biel par cui che lu sa cjoli
• il mont al è taront e a no savê nadâ si va a fonts
• il mont al è taront e cui che al sa nadâ nol va a fonts
• il mont al è un ospedâl di mats
• il mont al va da se
• il mont al va sôl
• il mont al vûl sei ingjanât
• il mont nol è ben scompartît
• in chest mont a son ducj utii, nissun nol è necessari
• in chest mont al è dut un intivâsi
• in chest mont bisugne nassi fortunâts
• in chest mont dut al jude
• in chest mont no si à altri ben che il mangjâ
• in chest mont no vin di stâ
• la suele gruesse e manten il mont
• muart jo, muart dut il mont
• nancje il mont nol è stât fat dut intune dì
• no si da al mont un vuarp plui grant di chel che nol vûl viodi
• nol è nissun necessari in chest mont
• pal mont no si cjate lis luianiis picjadis
• par stâ ben: cjoli il mont come che al ven
• par vê la pâs in chest mont a vuelin trê robis: une femine par cjase, une passare par vile, une cocule par sac
• prin ton a soreli jevât, cjol il sac e va a marcjât; prin ton a soreli a mont, cjol il sac e va pal mont
• se e ves di vignî la murie dai stupits, si disvuedarès il mont
• se il maridâ si crodès, il mont si disfarès
• se si fos induvinadôrs, no si sarès nissun puar in chest mont