Dizionari de Lenghe Furlane

sfere  /sfè-/  sfe|re  [AF]

1. s.f. [AF, TS] gjeom. solit gjeometric cu la superficie che e je l'insiemi di ducj i ponts che a àn la stesse distance dal centri:  la perfezion (ultra)gjeometriche, platoniche, de sfere (Mario Turello, La poesie prime dal nuie); o viodei un classic planet a forme di sfere (Checo Tam, Sense)
2. s.f. ogjet in forme di bale regolâr:  [la statue] e rapresentave Zeus in maestât divine in tron cuntune Nike te man drete e une sfere cu la acuile te man çampe (Adrian Cescje, Viaç aes origjins dal Logos)
   
   1. [BF] piçule bale di crep o di veri o di altri materiâl, che a zuin i fruts:  zuiâ cu lis sferis
      Sin. balute
      Var. fere
   2. balon di fobal o ancje di altris sports:  la ale blancje e nere e gjestìs te maniere miôr la sfere, e salte Krejci e cussì e tire cul esterni dal so pît preferît (Marc Stolf, Bologna - Udinese 2-1)
      Sin. bale , balon
3. s.f. [TS] stor., astron., astrol., filos., religj. te concezion antighe dal sisteme solâr, sorte di scus regolâr e concentric di cristal, cun centri la Tiere o il Soreli daûr de concezion gjeocentriche o eliocentriche, sigjilât di un planet, che zirant al produseve il moviment di rivoluzion e che in ciertis concezions religjosis e podeve corispuindi a un nivel di beatitudin o ben a une bariere che lis animis a vevin di passâ par rivâ a Diu:  ogni planet si zire inte sô sfere (Ermes di Colorêt, I, 100)
4. s.f. (fig.) nivel jerarchic:  un artist di prime sfere, chel che al à piturade la capele dal Domo (Costantino Smaniotto, Co l'amôr al cimie); a vegnin fûr di fameis furlanis nobiliârs, a son istruidis, rafinadis, ben educadis, e a gjoldin di une apartignince ae sfere privilegjade de societât (Angelo Floramo, Teresa Zais, un spirt libar tal munistîr)
5. s.f. (fig.) setôr definît li che si puedin calcolâ elements, argoments, fenomens e v.i.:  o varìn un guviar regjonâl che, daûr di ce che al pâr, al varès une sfere di azion e une libertât di moviments avonde largjis (Josef Marchet, Se e larà drete); si po dî che la peraule "templi" e cjape dentri dute o cuasi dute la sfere dal mont religjôs e sacrâl, la sfere de anime, lis domandis e lis rispuestis ultimis, la stesse fonde e concezion de vite (Antoni Beline, I furlans e il templi)
   Sin. cjamp , domini , mont² , setôr¹
6. s.f. viôt spere¹ :  dâ une ritocjade a lis sferis dal orloi dal cjampanîl (Lucio Perès, Toni il cjampanâr)