Dizionari de Lenghe Furlane

cjamp  cjamp  [FO]

1. s.m. toc di tiere coltivade:  a voltis la Lisute si cjapave sù e e lave ancje jê tal cjamp a judâ so pari che al dave di côt al falcet (Maria Forte, La fie çuete); tancj cjamps a jerin stâts vendûts vie pai agns, ma a jerin restâts, di istès i prâts vierts dal Lavio pal fen di une vacje e lis vîts gropolosis dal Costeon, e ancje i cjamps dal Abìs e dal Nasoç. Ma chê tiere e finive in bumbuie e cualchi bolç insom al jere palût (Maria Forte, Cjase di Dalban); Lui mi capìs no mo, culì a van di mieç i lôr interès, i cjamps, lis stalis, i boscs; a riscjaressin di jessi tocjâts (Alan Brusini, Gian Paolo Linda, I forescj); cuant che al sarès muart, i varès lassât la cjase, i cjamps e dut ce che al veve (Cristina Noacco, Faliscjis); par lâ e tornâ i coventavin un pâr di oris. E taiave pai cjamps, dilunc vie trois e stradelis che e cognosseve dome jê (Gianni Gregoricchio, Trê feminis)
   Sin. mitât , peçâl , ordenâl , fîl , furip
   Cfr. stroncje , ordenari , cumiere , agâr , remis , reolç , rivost , jeche , strop , bolç , curt , cjaveç , cjavece , cjaveçâl , frunts , agadôr , agadorie , cunete , fossâl , sgjavin , dorie , çarade , rivâl¹ , culture , steule , vieri¹ , pustot , ort , bearç , braide , broili , prât , passon , teraçade , fonts , podê³ , pascul , ronc , staipe , tamosse , arâ , coltâ , semenâ , sapâ , svangjâ , rompi , ledanâ
   
   1. cuantitât di prodot che e je tun cjamp o che si rive a fâ cuntun cjamp:  fumiti un cjamp di cannabis… parcè no sêstu come ducj chei altris brâfs zovins che a cjolin droghe? (Checo Tam, Sense)
   2. [CO, TS] agr., metrol. misure di superficie tradizionâl, derivade de assegnazion di un tierç de tiere ai barbars in ete tarde romane, gotiche e langobarde che e corispuint a uns 3.500 metris cuadrâts:  dopo la division de sostance cun so fradi siôr Tite di Nearêt di Cuar cu la cuâl i jerin tocjâts un setante cjamps e la cjase a Merêt di Tombe, al jere vignût a stâ culì (Pieri Somede dai Marcs, Pre Josef); "[…] al è stât un ciert Pieri di Sant Salvadôr a viodi se o vendìn chel golet di tiere che o vin là jù de Crôs", "Jo o disarès di sì" al veve rispuindût lui ae svelte. "Isal trop bocon?" "Mi pâr un cjamp, rive e no rive… Mi pâr…" (Maria Forte, Cjase di Dalban)
   3. [CO, TS] agr., metrol. misure di superficie tradizionâl, derivade di altris sistemis di misurazion, cun grandece che e pues svariâ daûr de localitât
2. s.m. zone di planure, dispès ancje maiuscul tant che toponim:  i colôrs frescs de Cjargne, dilunc dal Tiliment di cristal cul soreli che al lacje di lûs la strade e al impie lis clevis jenfri ramaçs di miluçârs e cjantis di aghe, si smocjin ca jù tai vueits dal Cjamp di Osôf (Dino Virgili, Friûl di Siarade)
   Sin. taviele , plane , plan¹ , plagne , planure , campagne
3. s.m. milit. spazi di operazions militârs:  a chel colp improvîs eco tun lamp / plen di spavent e confusion l'è il cjamp (Emilio Nardini, La Batracomiomachie di Omero); inte logjiche de cortine di fier il [Friûl] al jere zone di confin strategjic e cussì une grande part dal so teritori al jere a disposizion dai militârs, sedi cun casermis, cjamps di esercitazion, poligons e v.i. (Max Mauro, Un Friûl difarent: i 90 mhz di Onde Furlane); in bataie Ricart al jere un vêr zigant e sul cjamp al pareve che al fos pardut (Gianluca Franco, Re Ricart in Friûl)
4. s.m. milit. instalazion militâr o sim., massime temporanie:  la Italie ancjemò prin de seconde vuere mondiâl, ma ancjemò di plui intant dal conflit, e jere stade incolmenade di cjamps pal confin, di concentrament, di presonie (Redazion La Patrie dal Friûl, Il boboròs de vuere)
   Sin. baracament , incjampament
5. s.m. sît provisori par passâ la gnot o une cierte dade di timp:  sberlant come acuilis, vuiscjant il cjaval su lis culatis, [i cosacs] a corevin sul cjamp par dret e par ledrôs, su lis gjambis, su la schene e sul cjâf dai prisonîrs pognets (Alan Brusini, Un dai pôcs)
6. s.m. sît organizât des autoritâts o che si da dongje par dibisugne, formât pal plui di tendis o barachis, li che al ven metût in vie provisorie cui che al à pierdût la cjase par vie di taramots, aluvions, vueris e v.i.:  cjamps par sfolâts (Buteghe dal Mont, Luche Nazzi, Guide par un consum just e solidâl)
7. s.m. sport aree o teren destinât ae ativitât sportive:  al è parfin un cjamp di tenis une vore ben tignût (Lelo Cjanton, Cjasiât); nono Gjelin al jere a stâ juste in rimpet dal cjamp di balon e si sentave su la sô cjadreute in bande de sô puarte di cjase e nus cjalave zuiâ (Laurin Zuan Nardin, Il balon)
8. s.m. (fig.) complès di argoments leâts tra di lôr:  no si po tasê de scuviarte che l'à fate tes nestris montagnis di trê esemplârs de famose civuite dai voi neris (Athene Chiaradiae) vêr aveniment straordenari tal cjamp ornitologjic (Achil Telin, La Patrie Ladine, I, 2); cualchi volte ti ven l'aviliment parcè che tu viodis che tai cjamps religjôs, oltri che civîi, i sorestants a no capissin ce che al covente (Francesc Placerean, La glesie di Aquilee e je stade une mari che nus à fats nassi e cressi come popul); la stesse casualitât des cumbinazions, sperimentade intal cjamp leterari, e à dimostrât che la creazion artistiche e pues sei simulade, o propit realizade, dal elaboradôr (Mario Turello, Il brevet); il Logos elenic al fo chel passâ des osservazions di un cjamp fenomenic aes "teoriis" costruidis su principis (Adrian Cescje, Viaç aes origjins dal Logos)
   Sin. aree , setôr¹ , sfere , dissipline
   
   1. aree di ativitât o di competence:  ognidun de sô prospetive, ma dispès sconfinant tal cjamp une di chel altri o vin dialogât sui temis di chest libri (Antonella Riem Natale, Recension di Neuropsicologia dell’esperienza religiosa)
      Sin. aree , setôr¹ , sfere
9. s.m. [TS] fis. grandece fisiche no materiâl distribuide tal spazi e tal timp, che ogni so pont si pues cubiâlu a un vetôr che al rapresente par solit une fuarce:  il grant salt al è la cuantizazion di chel particolâr cjamp che al è il cjamp gravitazionâl - ven a stâi la cuantizazion de stesse Relativitât Gjenerâl (Sergio Cecotti, Teologjie algjebriche)
10. s.m. [TS] fis. regjon misurabile dal spazi
11. s.m. [TS] cinem. part de sene che e jentre tal angul dal obietîf:  ancje l'episodi finâl - il copament di Cibrán de bande de polizie - al reste fûr cjamp, anzit nol ven nancje citât intal film, cussì come che no si viôt l'omicidi fat di Bocas (Fabian Ros, A esmorga)
12. s.m. [TS] pit., scult. sfont dulà che a son logadis lis figuris di une piture o di un basrilêf:  al abandone il scheme tradizionâl de ripartizion intancj cjamps (Bepi Agostinis, Storie de art in Friûl)
13. s.m. [TS] erald. colôr di sfont intun scût:  la steme e je une acuile di aur coronade in cjamp perlin (Aministrazion Publiche, Statût de Provincie di Udin)
14. s.m. [TS] numism. spazi tra la figure e l'ôr di une medaie o di une monede
15. s.m. [TS] inform. sezion unitarie di informazion parentri di un record

Polirematichis e espressions idiomatichis

• meti in cjamp loc.v.

Proverbis:

• a Sant Martin al vûl il forment tal cjamp o tal mulin
• bêçs in bancje e ledan tal cjamp
• cjamp sierât al è mieç coltât
• cui che al à buine voie di lavorâ, al è plui siôr di cui che al à sîs cjamps di arâ
• cui che al à un sôl cjamp al fâs un ort, cui che al à un sôl fi al fâs un porc
• cui cjamps si fâs la cjase, nome cu la cjase si mangje i cjamps
• il cjamp plen di jerbaç e il prât grintôs a palesin il paron oziôs
• il cjamp plen di jerbatis e il prât grintôs a palesin il paron oziôs
• il flôr tal cjamp, lu jude ogni sant; l'om tal mont, Diu lu jude ogni tant
• il mulin al è un bon cjamp e la glesie une grande famee
• il sorc tal cjamp bisugne che lu judi ogni sant
• ogni cjamp la sô jentrade