Dizionari de Lenghe Furlane

vieri¹  /-é-/  vie|ri  [FO]

1. adi. di robe, che e à tant timp, che al è stât fat tant timp prime, che al dure di tant timp:  lampions impiâts a iluminâ creturis di mûrs vieris e sgombâts (Maria Forte, Sul cjar di Pauli Gurin); cuatri strafusariis vieris, clucadis o carulidis (Josef Marchet, Lis predicjis dal muini); il sium vieri dai Batistons di Cleve al jere deventât une realtât (Dino Virgili, La aghe da pît la cleve)
   Sin. vecjo , vieli
   
   1. che al è sucedût timp indaûr:  il discors lu puartave a fevelâ di robis vieris e lontanis (Alan Brusini, Gian Paolo Linda, I forescj)
   2. al pues ancje riferîsi a plantis o plui da râr a bestiis o personis:  i pôi vieris, sul flum, a tremavin tal cîl e ta la aghe come un sium di lontanance infinide (Dino Virgili, La aghe da pît la cleve)
   3. adi., s.m. [BF] ancje riferît a personis, viôt vieli :  e veve assistût so pari vieri e sô cugnade (Franca Mainardis, Il sium di Lissandri); aben che nol fos tant vieri, al jere su la setantine, ducj a ricorevin di lui par conseis, pes lunis, par savê se al lave ben boscât o semenât (Roberto Ongaro, Cretevierte)
2. adi. che al è di une volte e nol è plui atuâl:  la lenghe e à di cori cul mont gnûf se no e mûr parie cul mont vieri (Adrian Cescje, Memoriis di politiche linguistiche); ancje se il tai al jere vieri, Betilde e pareve inmò avonde bon (Maria Forte, La cotule di none Betilde)
   Sin. indaûr , passadon , passât , superât , vecjo , vieli
3. adi. che al jere in cjarie, in funzion o intune cierte cundizion, situazion o relazion timp prime:  No si vûl meti in dubi, par principi, lis buinis intenzions dal gnûf guvier: al è za alc, che il machinist si sei almancul visât che il vieri no 'ndi cumbinave une (Josef Marchet, La scrassigne)
   Sin. vecjo
   
   1. che al è intune cundizion, situazion o relazion di tant timp
4. adi. lassât a stagjonâ il so timp, o tant timp:  il vin vieri al ere masse bon (Pieri Çorut, Pronostic del 1836); une fete di panzete rodolade penze doi centimetris e taiade a daduts, un sclip di asêt blanc, doi ûfs intîrs, une man di latarie vieri gratât (Giorgio Pascoli, Il Litum: jerbis salvadiis te cusine)
   Sin. invecjât , morestât , sesonât , stagjonât
5. s.m. dome sing., ce che al è za di tant timp o che nol è plui atuâl:  no dut il gnûf al è bon e no dut il vieri al è scart (Antoni Beline, La religjon de tiere)
   Sin. vecjo
6. s.m. il timp antîc, viôt par vieri
7. s.m. [TS] agr. cjamp lassât cence culture e deventât prât o prât lassât cressi cence seâ
8. s.m. [TS] pescj. sorte di sac di rêt che si ten ta la aghe e li che si met il pes pescjât par che al resti vîf

Polirematichis e espressions idiomatichis

• lâ in vieri loc.v.
• par vieri loc.v.
• vieri di lune loc.s.m.

Proverbis:

• amôr nol è mai vieri
• amôr vieri nol devente ranzit
• amôr vieri nol ven di rusin
• ardiel vieri al cuince simpri ben
• cali vieri e lat zovin
• cjar viere e fâs bon brût
• cualchi volte e dure plui une vite viere che no une gnove
• cui che al lasse la strade viere pe gnove al sa ce che al lasse ma nol sa ce che al cjate
• cui che al romp di vieri al paie di gnûf
• e vâl plui la cite viere che no la gnove
• femine zovine, vin vieri
• fra il vieri e il novel, al è negozi di lassâi la piel
• gjaline viere a fâs bon brût
• gjaline viere no fâs ûfs
• il cali vieri e il lat zovin
• il claut vieri al sparagne chel gnûf
• il çoc vieri al è chel che al ten dongje dal fûc
• il diaul al sa plui par vieri che no par diaul
• lei libris vieris, bevi vin neri, lâ cun feminis che no son zovinis
• mai bandonâ la strade viere par chê gnove
• no bisugne lassâ la strade viere par chê gnove
• pecjât vieri e pinitince gnove
• scove gnove e scove ben, e je la viere che e manten