Dizionari de Lenghe Furlane

vieli  /-é-/  vie|li  [FO]

1. adi. che, cui che al è indenant cui agns, in gjenar riferît a personis:  ancje Tin lu veve cjapât dentri la vuere, vieli come che al jere: bon par vuardeâ cualchi puint e par scovâ ospedâi (Maria Forte, Dome la cjampanute di Sant Bortul); e je restade bessole cul so frutin e sô madone viele (Pieri Somede dai Marcs, Par une lengate)
   Sin. vecjo
   
   1. s.m. persone indevant cui agns:  al jere Pieri de Buse, un vieli sui setantecinc agns ma dret e salt e plen di morbin ancjemò (Meni Ucel, Misure); une dì mi cjatavi intune ostarie e al mi ven dongje un vieli che lu cognossevi di un pieç: un bon om, ma simpri disgraciât (Pieri Somede dai Marcs, Robis che a sucedin)
   2. che al mostre che la etât e je indevant:  al à 56 agns e al scugne tignî il cjâf tes mans se no i scupie. Lu vin fat deventâ grîs e vieli prime da la ore (Riedo Pup, Che al vadi vie)
2. s.m. (fam.) gjenitôr, spec. indevant cui agns, o gjenitôr dal om o de femine che si è maridâts, o persone plui indevant cui agns intune famee:  di lâ vie di cjase no si impensave nancje parcè che no varès vût il cûr di bandonâ i siei viei (Pieri Somede dai Marcs, A jerin lagrimis); dopo che la sô viele e jere lade a paronâ ta chel altri mont, Nart, par un pôc al veve sintût la mancjance dal so comant (Roberto Ongaro, Cretevierte); «Par altri, jo no soi parone di nuie ca dentri. Zuan al à trê fradis, e po dopo al è il vieli, che al comande a bachete» (Carlo Sgorlon, Prime di sere)
   Sin. vecjo
3. s.m. tal pl., lis personis des gjenerazions passadis:  une vorute di furlans si son butâts in chê trie e no fasin nissun onôr a la innomine di int positive e cence fotis, che i nestris viei si vevin cuistade (Josef Marchet, Preambul rusin)
   Sin. vecjo
4. adi. [BF] che al jere in cjarie, in funzion o intune cierte cundizion, situazion o relazion timp prime:  che anzit il plevan vieli - un sant om! - al diseve simpri […]: "Savêso, voaltris Molârs, che o sês la famee plui antighe de plêf?" (Dino Virgili, La Gnot dai Sants)
   Sin. vecjo
   
   1. che al è intune cundizion, situazion o relazion di tant timp:  tant che un vieli uciel di scjaipule, che se lu molais, al fâs une svoletade pal bearç e po al torne di bessôl te sô preson (Josef Marchet, Il manarin tal cûr)
5. adi. [BF] di robe, che e je stade fate di tant timp, che e à agns:  sul mûr, de bande de cort, e je piturade une Madone […] E je vieglone, di agns e agnorums indaûr (Dino Virgili, Cjase Basse); nol è che un caratel vieli e scredel, che dopo muart il mio puôr om nol è stât mai plui doprât (Catarine Percude, La fuiace de Madone)
   Sin. vecjo , vieri¹

Proverbis:

• a àn cjatât scrit te sacre scriture: che a lavorin i viei che a àn la piel dure
• a cjaval vieli i plâs la jerbe frescje
• a mus vieli, jerbe frescje
• al pâr bon un vieli in cjase
• ancje lis bolps vielis si lis cjape
• beade chê cjase che e à un vieli dentri
• ce che al è permetût di zovin, no si po fâlu di vieli
• ce che si impare di zovin no si dispare di vieli
• cjan vieli nol baie dibant
• colomp zovin, gjaline viele
• consei di vieli, aiût di zovin
• conseis di viei a judin i zovins
• cuant che il diaul al devente vieli, al cjol sù la corone
• cuant che il gjal zovin al cjante, il vieli al à za cjantât
• cuant che il lôf al devente vieli, i cjans i pissin intor
• cuant che il vieli al duar e il zovin al vegle, il mont nol va plui ben
• cui che al gjolt di zovin al stente di vieli
• cui che al stente di zovin al gjolt di vieli
• cui che al va a cjaval di zovin al va a pît di vieli
• cui che di zovin si fâs mangjâ, di vieli al scuen lâ a pitocâ
• cui che no lis fâs di zovin lis fâs di vieli
• cui che no si inamore di zovin si inamore di vieli
• cui che nol sparagne di zovin al stente di vieli
• dâi une femine zovine a un vieli al è tant che dâi une cocule a un frut
• e je biele la cjase che e sa dai viei
• i viei a àn lassât i proverbis e a àn mangjade la robe
• i viei a son golôs
• i viei a son suspietôs
• i viei a son testarts
• i viei a tornin fruts
• i viei a vuelin che ancje i zovins a fasin come lôr
• il bo vielon al mûr te stale dal mincjon
• il corli plui al devente vieli e miôr al zire
• il diaul cuant che al devente vieli si fâs eremite
• il diaul le sa lungje parcè che al è vieli
• il diaul le sa tant lungje, par chel al è vieli
• il diaul une volte al puartave e cumò che al è vieli al strissine
• il timp fat di gnot al dure tant che l'amôr dai viei
• il vin al è il lat dai puars viei
• in taule no si devente viei
• la fiere terçane il zovin lu risane e al vieli i fâs sunâ la cjampane
• lis pomis ai fruts e la corone ai viei
• miedi vieli e barbîr zovin
• miedi vieli e ciroic zovin
• no si è mai viei par imparâ
• nol è un çoc cence furmiis, nol è un vieli cence duliis
• o murî zovins o vignî viei
• ognidun al po murî, il vieli al scuen
• plui si devente viei, plui i carnevâi a pesin
• sclope di zovins, miserie di viei
• tra il vieli e il novel si riscje di lassâ la piel
• trê robis impussibilis: fâ stâ fers i fruts, fâ cori i viei, fâ tasê lis feminis
• un matrimoni fra doi zovins al è un matrimoni dal Signôr, un matrimoni fra doi viei al è un matrimoni di mierde, un matrimoni fra un zovin e un vieli al è un matrimoni dal diaul
• un vieli cuntune zovine, al sarès tant che un frutin cuntune cocule
• une viele, une vuarbe, une picjade daûr de puarte