Dizionari de Lenghe Furlane

vecjo  /-è-/  ve|cjo  [FO]

1. adi., s.m. che, cui che al è ben indevant cu la etât, che al è te ultime fase de vite:  i ricuardave simpri so nono, un vecjo alt e sec, dut blanc, legri e onest (Pieri Menis, Sul agâr); cumò che o soi vecjo jo, a comandin i zovins (Alan Brusini, Amîs come prime)
   Sin. anzian , intimpât , madûr , passadot , vieli
   
   1. s.m. (zerg.) tal servizi militâr, soldât che al è dentri di plui timp e che al à autoritât, ancje prepotente, su chei rivâts di pôc:  «Cumò, gamel, busse la cjamese cragnose dal vecjo, a mi, gamel, si disimi signorsì […]» (Alan Brusini, I universitaris)
      Sin. nono
2. adi. che al à une esperience lungje intun cjamp:  un scjap di uciei neris a traviersavin il cîl, svolant in rie come gruis o razis salvadiis, e Eliseo al si sintive resurî l'istint dal vecjo cjaçadôr (Carlo Sgorlon, Prime di sere)
   Sin. espert , navigât , sfrancjât , vieli
3. adi., s.m. di alc, che al à tant timp, che al è stât fat tant timp prime:  tal borc di Ariul e je une vecje cjase, mieze brusade, che par antîc e jere preson (Pieri Menis, Lis leiendis di Buie); dute la sô robe e jere vecje e fruiade, e cul netâle no tornave gnove di sigûr (Carlo Sgorlon, Prime di sere); lis breis che a vevin odôr di vecjo (Checo Tam, Ombris)
   Sin. vieri¹
4. adi. lassât a stagjonâ il so timp, o tant timp:  mangjâ fûr? No, al veve cuets i râfs, il muset e un bon formadi vecjo (Alan Brusini, Gian Paolo Linda, I forescj); a si erin tacâts a li boti, a li veri di vin vecju platadi davour li scansiis ta la cantina (Novella Cantarutti, Li clâfs); al jere sigûr il vin, chel vin vecjo, che i faseve viodi lis striis e zirâ la matricule… (Pieri Menis, Doi pizighets e un lari)
   Sin. invecjât , morestât , sesonât , stagjonât , vieri¹
5. adi. che al jere in vore o doprât o in cjarie o che al veve une cierte cundizion tun passât plui o mancul lontan:  li de vecje dogane si cjatavin i zovins di Viscon, vistûts come i austriacs cuintri apont chei di Trivignan vistûts come i fants e i alpins talians (Checo Tam, I nemîs); [i mucs] a rivavin cu la vecje prepotence e cu la gnove brame di tornâ parons (Maria Forte, Cjase di Dalban); 'Sefine inveze mi à dit che chel no lu cjolarà mai […] e che spiete il so vecjo morôs da la Meriche (Pieri Somede dai Marcs, A la oselade)
6. s.m. ce che al esist za di timp:  e i mûrs: cemût fâ sù gnûf sul vecjo? Cemût plantâ fiers tai claps di Cuar? Miôr sdrumâ dut e fâ come che al va (Lucio Perès, Il mâl dal mûr)
   Sin. vieri¹
7. adi., s.m. (spres.) di ûs, idee, valôr e v.i., che nol è plui considerât atuâl:  la musiche rock e jere propite la miôr di dutis! Altri che il jazz e la musiche classiche, robe di cagons! Altri che il pop e il melodic o la musiche a vecjo vie! (Checo Tam, Joe Tex e Joe Cocker)
   Sin. vieri¹ , passât , lât in vieri
8. s.m. il pari o l'om plui indevant cui agns intune famee, o tal pl. il pari e la mari, soredut se a son o a jerin avonde indevant cui agns:  "I parons nus àn dât la disdete, mio fradi condanât a la galere, i miei vecjos muarts di crepecûr, ipotecade dute la robe par lis spesis dal procès…" (Pieri Somede dai Marcs, Resurezion a Pontinie); Jolande le veve vendude [la cjase] subit dopo che i puars vecjos a jerin lâts (Carlo Sgorlon, Prime di sere); i nevôts, dopo, a tignivin cont il vecjo come un dêt madûr, par no pierdi in famee, prime da la ore, chê sorte di paie li (Riedo Pup, I furlans e la pension)
   Sin. vieli

Polirematichis e espressions idiomatichis

• par vecjo loc.av.
• vecjo dal mistîr loc.adi., loc.s.m.
• vecjo di lune loc.s.m.

Proverbis:

• un mus di vincj agns al è plui vecjo di un om di setante