Dizionari de Lenghe Furlane

madûr  ma|dûr  [AF]

1. adi. di pome, semence o sim., che e je dal dut cressude e formade, che e je tal massim dal so divilup:  e butà il voli sul figâr dal ort; e viodintlu cjamât di fîcs biei e madûrs, a i vignî la aghe in bocje (Luigi Gortani, Meni Fari); une dì a buinore di mieç Setembar, tun profum di ue madure, cuntun aiarin che al vignive jù des monts (Pieri Menis, Sul agâr); il mont al jere biel. Il cjamp zâl di forment madûr, la blave a Sant Roc, la nêf ae sô stagjon (Alan Brusini, Par stradis lungjis)
   Sin. fat²
   
   1. di prodot alimentâr elaborât, che in graciis dal passâ dal timp in ciertis cundizions al à cuistât lis cualitâts miôr che al pues vê
2. adi. di organisim, che al à finît la sô fase di cressite, che al è rivât ae etât adulte e in particolâr che al è pront pe riproduzion
3. adi. di cdn., che al è rivât al plen svilup fisic e inteletuâl, che al è tune etât che no je plui di infanzie o zovinece e che nol è ancjemò te vecjaie:  i vecjuts a tornin fruts e, se no si inmalin, a àn i voi che a slusin di bontât e di gjonde, che la int "madure" e piert dispès cul cressi e cul bacilâ (Cristina Noacco, Faliscjis)
   Sin. grant , adult
   
   1. (eufem.) che al è za te vecjaie:  i arlêfs a son dodis, ducj adults, cualchidun bielzà ben madûr, ma ducj une vore interessâts e atents (Sara Palluello, Di chest an, lezions di furlan te Universitât di Buenos Aires: une storie che e ven di lontan)
4. adi. di cdn., che, cence tignî cont de sô etât, al mostre di vê sintiment, judizi, ecuilibri:  mi viôt plui madûr e avonde pront a frontâ ogni discors e robe che mi ven incuintri (AAVV, Sul florî); al è il moment di lavorâ sul dûr, di mostrâ se il Friûl al à int serie, madure, sperimentade, buine di cjapâ in man e di tignî salt il tamon e lis jevis di comant (Josef Marchet, E cumò?)
   Sin. acuart , caut , dret , ecuilibrât , fat² , fin¹ , franc , judiziôs , misurât , prudent , responsabil , savi , savint , scaltri , svelt , tamesât
5. adi., s.m. [TS] scol. che, cui che al à passât l'esam di maturitât
6. adi. di judizi, opinion, elaborazion teoriche, realizazion tecniche e v.i. che e risulte di un svilup lunc e aromai complet:  il contat vût cul public cu lis rapresentazions provisoriis al à judât a componi un test definitîf madûr (Tarcisio Mizzau, La prime stagjon dal teatri stabil furlan a è pronte a partî)
7. adi. di situazion, circostance e v.i., che e je pronte pal davuelzisi di cierts acjadiments:  "O ai pensât avonde. Cumò o dibot chest al veve di nassi… Al è rivât, a colp, dome il decidi,… ma la robe e jere madure di un pieç […]" (Maria Forte, Cjase di Dalban); il timp de rivelazion nol jere ancjemò madûr (Carlo Sgorlon, Il dolfin)
   Sin. bon , just , momentôs , oportun
   
   1. ancje di persone o comunitât e v.i., che e je pronte par alc:  chel popul nol è ancjemò madûr par nissune unificazion (Josef Marchet, La fuarce dal nestri lengaç)
8. adi. (fig.) che al à bevût masse alcolics e che al è sot dai efiets dal alcul, ancje dongje di altris adietîfs cul stes significât, par rinfuarçâju:  jo no ai sintût nue parcè che i eri cjoc madûr (Marcello Bon, Average Furlan Guy)
   Sin. becât , becât sot di une ale , bevût , çurul , grîs , imbarlumît , impiât , implombât , incarburât , incerât , intrunît , invreasât , legri , ligrut , muardût dal cjan neri , plen , pontât , pontât sot di une ale , taront , ticât , vuitul
9. adi. (fig.) che al à fat sfuarç e al sint une vore di fadie, ancje dongje di altris adietîfs cul stes significât, par rinfuarçâju:  "Ven ca mo Gori, sentiti, fasìn une polse." "Po sì, o soi madûr, al è un soreli che al bruse" (Pieri Somede dai Marcs, Tripoli bel sol d'amore); Lissandri si impensave di vê viodude sô mari scuasit simpri strache madure, daspò di vê sgrifignât a doi cjamputs, di un soreli a chel altri (Franca Mainardis, Il sium di Lissandri)
   Sin. stracuet , strac , cuet¹ , scanât , acanât , discunît , stracât , disfat
   
   1. che al è strac a nivel psicologjic, che nol sopuarte plui alc o cdn.:  ancje chest an o sin rivâts insom. E par gno cont al è «insom» pardabon, che o soi madûr (Josef Marchet, Lis predicjis dal muini); mi pâr che o sês ducj stufs, madûrs [de predicje] che us salte fûr pai voi (Renzo Balzan, Messe grande pai mus)
      Sin. strac , stuf , passût , ingomeât
10. adi. (fig.) di part dal cuarp, inflamade o sglonfe:  e rugne come se o i ves dât une martielade sul dêt madûr (Stefano Gasti, La none di Camčka)
    
    1. s.m. inflamazion o infezion localizade, che e fâs sglonfâ une part dal cuarp:  jo o zonti: e se un madûr al sta par fâsi, / pape di lin, bulinte, di scotâsi (Meni Ucel, Il Strolic furlan pal 1974)
11. adi. (fig.) di cualsisei robe, plene, sglonfe:  denant da li primis montagnis, i vevin jodût, sot di una strissa nera e madura di nûi, un veli grîs che al vigneva indenant (Alberto Luchini, Temporâl)

Polirematichis e espressions idiomatichis

• tignî come un dêt madûr loc.v.
• tignî tant che un dêt madûr loc.v.

Proverbis:

• cuant che il piruç al è madûr, al cole
• cuant che la piruce e je madure, e cole
• il piruç co al è madûr e je ore di mangjâlu
• nol è miluç tant dûr che cul timp nol deventi madûr
• Sant Simon e jude la rave a ven madure, madure o no madure, si le met sot sieradure