Dizionari de Lenghe Furlane

strac  strac  [FO]

1. adi. di cdn. o di une sô part, che al à fat fadie fisiche o psichiche, che al à bisugne di polsâ:  "Lassimi in pâs, ti prei, vuê! Soi strac dal lavôr […]" (Dolfo Zorzut, No je plui vive); o soi vignût tart a durmî… o ai polsât pôc e o soi inmò strac (Pieri Somede dai Marcs, Un pugn di moscjis); il gno turni al è cuasi insom. O ai i voi stracs. O ai bisugne di discjoli un lamp la voglade (Carli Pup, In vuaite); chês vôs che in altris moments no le varessin disturbade, cumò, te mancjance di pâs, a deventavin prepotentis. A jerin gusielis pal sintiment strac (Maria Forte, Cjase di Dalban)
   Sin. acanât , canât , scanât
   Cfr. muart² , disfat , madûr , scunît , flap , debil , vîl , cuet¹
   
   1. ancje di alc di astrat o inanimât, cence fuarce, cence energjie:  il lôr al jere un rapuart strac, sfiliât di dutis lis bandis (Franca Mainardis, Il sium di Lissandri); il Moviment Friûl al jere strac di tancj agns di lotis e strussiis conduradis cence la fuarce eletorâl che i varès coventade (Adrian Cescje, Memoriis di politiche linguistiche); [la Europe] ise destinade a deventâ un desert semenât di rudinaçs, di cadavars e di memoriis inutilis, il cimitieri di une civiltât strache, viele, disvuedade e distudade? (Josef Marchet, Su altris fondis)
   2. che al à pierdût la pazience, che nol sopuarte plui:  la int e jere strache di chest sisteme di robis e lu faseve sintî a fuart (Max Mauro, Un Friûl difarent: i 90 mhz di Onde Furlane)
      Sin. stuf , sglonf , ingomeât , passût , plen , saceât
2. adi. di aspiet, mot, compuartament e v.i., che al pant mancjance di fuarce fisiche o mentâl:  su lis lôr musis patidis al comparive un rideç strac, ma gaiôs (Gianni Gregoricchio, Trê feminis); la sere Mirco al tornave dongje cu la muse strache e segnade (Alan Brusini, Par stradis lungjis)
   Sin. basot , debil , flap , flevar , sbatût
3. adi. (fig.) che nol è fresc, che al tache scuasi a lâ di mâl:  "Gjovanin," i disè une dì un "mi pâr che al è strac chel pes li". (Eddy Bortolussi, Bugadis)
   
   1. (spres.) ancje in riferiment al cuarp di une persone, che nol à frescjece e plenece:  par colpe lôr, si jere slargjât sanc sot il tachil, e, dut, par spartîsi lis cjars strachis di une muche (Maria Forte, La tiere di Lansing)
      Sin. flap , mol¹
4. adi. (fig.) di aghe o di aiar o sim., che al è fer, che nol è net o fresc:  un lunis di matine che tu cjaminis par Marcjât Vieri e che ti rive intor il tuf strac des andronis (Stiefin Morat, Kebar krossè); contentâsi a bevi la aga straca di una poça (Novella Cantarutti, Linda e il re)
5. adi. (fig.) che al da une idee di passivitât, di mancjance di fuarce, di decjadence:  pardut si ingrumavin mutaris strachis di chê nêf ofegade (Maria Forte, La tiere di Lansing)
6. adi. (fig.) cence creativitât, cence estri, cence azion:  in chê comedie dut al jere strac e lent: nol sucedeve pardabon nuie (Pierluigi Visintin, Friûl e furlans te Histoire de ma vie di Giacomo Casanova)
   Sin. basot , debil , flap
7. adi. di tiere, plante o ancje ativitât, che no prodûs:  tornâ a la culture dal ledan; par che la tiere arside, scunide, strache e sfigurade e torni a nudrîsi dai siei elements e a ripiâ la sô vigorie antighe e naturâl (Riedo Pup, I furlans e il ledan); butâ fûr vîts strachis incandidis (Pieri Menis, Sul agâr); afâr strac (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• a strachis loc.av.

Proverbis:

• cui che al è strac nol sint i pulçs
• la lenghe no je mai strache se no sa di vacje