Dizionari de Lenghe Furlane

sglonf  /-ò-/  sglonf  [FO]

1. adi. ben plen di aiar, o di une altre sostance, tant che e je une pression interne:  il balon isal avonde sglonf?; cualchi cadavar di bestie [inneade], za sglonf di aghe o di aiar (Carlo Sgorlon, Ombris tal infinît)
   Sin. sglonfât
   Cfr. plen
   
   1. (ancje fig.) jemplât di alc, ancje cence che si produsi pression, ben furnît:  di Sierade e jere plene la arie di blave, sglonf il toblât di fen (Dino Virgili, La division); tu âs un biel cont su la bancje e la sachete sglonfe (Josef Marchet, Lis predicjis dal muini)
      Sin. plen , colm , incolm , folcjât
2. adi. (ancje fig.) cressût di volum:  la Vierte e slusiche tal cîl, e sburte tai butui sglonfs (Dino Virgili, La aghe da pît la cleve); al clamave ducj a cjalâ i raps sglonfs e lusints di most, su la ore de vendeme (Maria Forte, Cjase di Dalban)
   
   1. jemplât di mangjâ:  no pues mangjâ plui, o soi sglonf
      Sin. complen , passût , plen , straplen
   2. taront, gras:  il ministri Salandra, un omenut pitinin e cu la panze sglonfe, che al jere li tra doi carabinîrs cul cjapielon sul cjâf (Alan Brusini, Amîs come prime)
   3. di muscul o sim., deventât plui grues o plui evident pal sfuarç:  il clap a nal molava, i omis a picavin cui braçs sglonfs e la vita in sudour (Novella Cantarutti, Il sâr Menon)
   4. cressût di volum par vie che al è inflamât:  pe etât al veve ancje lui lis sôs magagnis, la panze sglonfe e i dolôrs pe vite (Alan Brusini, Chei di Cjasarse); Vigjut al veve une vergule nere, doi dêts largje e sglonfe (Pieri Menis, Tal bosc di Kebespok); vie pe gnot i vignì la fiere; a buinore al jere dut sglonf (Roberto Ongaro, Il muc)
3. adi. voluminôs:  il vistît sglonf di sede latisine (Maria Forte, Cjase di Dalban); cu li mans sul grim e li manii sglonfi e blancji da li cjamesi che a i plovevin jù da li spali come rosi strachi (Novella Cantarutti, La femina di Marasint); cu la daspe e faseve sù acis e acis, fofis e sglonfis che po dopo e faseve boli (Pieri Menis, Chei di Muraie)
   Sin. larc
4. adi. (fig.) cjapât di une passion, di une emozion, di une sensazion e v.i., ancje cuntune sô manifestazion fisiche:  al mi rispuindè cuntun ridi sfuarçât e cul cûr sglonf (Pieri Somede dai Marcs, Sant Simon: 28 di Otubar 1917); al jere un spietâ dolorôs e tal stes timp sglonf di sperance (Franca Mainardis, Aiar di cjase); i voi di Oletta a jerin sglonfs di lagrimis, ma no veve voie di vaî (Cristina Noacco, Faliscjis)
   Sin. plen
5. adi. (fam.) che nol sopuarte plui, che al è al limit parcè che al è secjât, sustât o stufât:  pre Nocent al crôt che la disperazion mi vedi voltât el çarviel, e al pracure di cuietâmi. "Anìn Titute, anìn Titute!…" "O soi sglonf, pre Nocent, o soi sglonf! […]" (Arturo Feruglio, Viaç a Vignesie); o sin sglonfs come botis di propagande nazionalistiche sfuarçade, vueide e bausarie (Josef Marchet, Blestemis)
   Sin. ingomeât , passût , plen , saceât , stuf
6. adi. (fig.) esagjerât, che al met masse in mostre il benstâ o une cierte cualitât:  [lis grandis cenis] i parevin na sglonfadura, al era deventât dut sglonf in cjasa (Novella Cantarutti, Il spiçot)
7. adi. di stîl, lengaç e v.i., enfatic:  chel inovâl [dai 4 di Novembar] si è jemplât simpri plui di retoriche sglonfe (Marc Stolf, Dopo dai 4 di Novembar, dôs cjançons a son miôr di une)
   Sin. baroc , enfatic , retoric , sflandorôs , tonant
8. s.m. il jessi plen o ce che al è plen:  si impareve la sô madrigne, setade intun vistît che al meteve in mostre dut il sglonf de sô cicine (Gianni Gregoricchio, Trê feminis)
   
   1. inflamazion, part inflamade:  mi è vignût un sglonf tune gjambe (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
      Sin. sglonfidugn