Dizionari de Lenghe Furlane

colm  /-ò-/  colm  [AF]

1. adi. plen dal dut, fin insom:  cassi colmi di bleons (Novella Cantarutti, I voi di Miriscja); un taulinut colm di scartafàs di meti in ordin (Pieri Somede dai Marcs, Sant Simon: 28 di Otubar 1917); inte gnot di Nadâl il cîl al sarà colm di stelis (Tonin Cjapielâr, Il Verbo si è fat cjar)
   Sin. plen , incolm , folcjât
   
   1. che al è complet, che al è al nivel plui alt:  chel al jere stât un moment di passion colme su la place (Maria Forte, Slobar)
2. s.m. part plui alte di alc:  si viodeve ancje di lontan chel çuf di lens, come in cunvigne sul colm de alture coce (Maria Forte, Cjase di Dalban); a son vignûts fin a tîr di bombe a man e le àn butade propit sul colm de tô buse (Alan Brusini, I ribei); la gleseute di S. Pieri, une costruzion dal Cinccent cuntune cjampanute sul colm de façade (Josef Marchet, Lis predicjis dal muini)
   Sin. cime , insom , ponte , pic , spice
   
   1. trâf plui alt dal cuviert, orizontâl, li che si poin, adalt, i biscantîrs:  Leandri al jere daûr a butâ jù un cjastinâr par fâ un colm (Roberto Ongaro, Cretevierte)
3. s.m. pont o nivel plui alt o fuart di un fenomen, di une cundizion, di une sensazion e v.i.:  se jo no voi indenant pe lôr strade, se no puarti al colm ce che lôr a àn scomençât, la lôr fadie e je sterpe e jo no ai imparât nuie (Antoni Beline, La eterne lote dai furlans); tal colm di ogni lune lis striis de Furlanie e chês di Gjermanie si devin cunvigne (Catarine Percude, Lis striis di Gjermanie); ai 27 di Fevrâr, intal colm dal Carnevâl, la citât di Udin e je plene di int rivade ancje des vilis dulintor (Carli Pup, Il Friûl de Joibe Grasse dal 1511)
   Sin. cime , colme , massim , piche , ponte , vertiç , plen , insom , spice

Polirematichis e espressions idiomatichis

• colm di lune loc.s.m.

Proverbis:

• la misure co e je colme e va parsore