dissipline
/-plì-/
di|ssi|pli|ne
[FO]
-
s.f.
setôr specific di studi e di insegnament:
lis neurosiencis si identifichin come un insiemi di dissiplinis sientifichis […] che a doprin diviersis prospetivis par cirî di capî cemût che a funzionin il cerviel e la psiche umane (Franc Fari, Eric Pascul, Autonomie e democrazie, i numars de socializazion umane);
[la lenghe furlane] no pues sei dome materie di insegnament, par cualchi ore de setemane, ma e à di sei ancje lenghe che si insegnin altris dissiplinis (Adrian Cescje, Memoriis di politiche linguistiche)
Sin. materie
-
setôr specific di une ativitât plui largje:
la Civiche academie di art dramatiche "Nico Pepe" che si ocupe di formazion intes variis dissiplinis dal spetacul (Luca Zoratti, Il teatri par furlan);
[la serie televisive +sKlet/XtremeTV] e propon al public un viaç apassionant tra lis dissiplinis sportivis plui origjinâls praticadis in Friûl (ARLeF, www.arlef.it/progjets/sklet-xtremetv/)
-
s.f.
complès des normis che a regolin il compuartament di un component di un grup, imponint la ubidience:
la dissipline di partît e po obleâ i militants a lâ cuintri l'interès de regjon o dal stes principi regjonalistic (Josef Marchet, Diferencis)
-
rispiet des normis, des istruzions, de jerarchie:
al è stât merit so se chês pocjis fuarcis, cence ordin, dissipline e preparazion che si remenavin su la lagune, a deventarin un piçul esercit in stât di tignî bot ai todescs (Giovanni Pillinini, Zuan Batiste Cavedalis - Une vite esemplâr)
-
imposizion rigorose dal rispiet des regulis:
il capelan ur insegnave sul abecedari de Madone Sante Crôs cun pocje pazience e une vore di dissipline (Dino Virgili, La aghe da pît la cleve)
-
s.f.
complès des normis che a regolin un ciert setôr aministratîf:
un regolament specific pe dissipline des ativitâts contributivis (Erika Adami, La lenghe furlane tai mieçs di comunicazion);
[il consei comunâl al è competent par ce che al tocje] la istruzion e l’ordenament dai tribûts, la dissipline gjenerâl des tarifis par doprâ bens e servizis (Aministrazion Publiche, Statût dal Comun di Udin)