materie
/-tè-/
ma|te|ri|e
[FO]
-
s.f.
dut ce che al è fisic, che al compon il mont sensibil, la sostance di un cuarp:
il Principi di Ecuivalence al dîs che dutis lis formis di energjie (e di materie) a interagjissin te stesse maniere cu la gravitazion (Sergio Cecotti, Teologjie algjebriche);
il poete al zuie cu la peraule cussì come il pitôr cui colôrs e il scultôr cu la materie (Walter Tomada, Pierluigi Cappello: «L’om plui concret? Il poete»)
Sin. sostance
-
s.f.
[TS]
filos.
inte filosofie greghe antighe, sostance che e je la fonde di dut ce che al è:
lis sostancis dal mont a son fatis di materie e forme
-
inte filosofie cristiane, realtât dal cuarp oponude al spirt:
il scheme neoplatonic al met il spirt prin de materie, il gjenerâl prin dal particolâr, la potence prin dal pratic e vie indenant (Mario Turello, Il brevet)
-
inte filosofie cartesiane, realtât che e je ancje estension e inerzie e e ubidìs aes leçs de mecaniche, oponude al pinsîr che al è ativitât:
pinsîr e materie
-
inte filosofie kantiane, il sotstrât noumenic dai fenomens
-
inte filosofie e inte sience contemporanie, convenzion par rindi cont di fats che a son daûr a sei indagâts
-
s.f.
setôr o aspiet dal savê o de ativitât umane:
da prinzipi favelavin di pitura. Il diau spiegava tantis cognizions in chista materia, che il pitôr stava sintîlu cu la bocja aviarta (Zuan Luîs Filli, Il diau sul Studeniz);
la Regjon e esercite lis funzions aministrativis intes materiis indulà che e à il podê legjislatîf seont i articui 4 e 5, fale chês che lis leçs de Republiche ur assegne ai Ents locâi (Aministrazion Publiche, Statût Speciâl de Regjon Autonome Friûl-Vignesie Julie)
Sin. argoment
, contignût
, sogjet
, teme2
-
dissipline o sience ogjet di studi o insegnament:
articui za publicâts di materiis che a van de antropologjie ae archeologjie, de inovazion ae sostignibilitât, dal marketing ae economie (Maria Rosita Cagnina, Rêt e ricercje 2);
si pues insegnâ cualsisei materie doprant la lenghe furlane come lenghe veicolâr (Patrizia Pavatti, La tutele de lenghe furlane a scuele)
-
s.f.
secrezion o escrezion infete:
e tirave fûr la butilie de tinture di jodi se e saveve di cualchidun ferît; che e jere ancjemò une robe tant gnove par chei che si pistrignavin cu la tele di ragn e il mâl si butave in materie (Maria Forte, Cjase di Dalban);
se nol fos stât un uficiâl miedi todesc, gno pari nol sarès campât [par une infezion te gjambe]. […] Sintût il câs, il muc al vignì, al tornà plui voltis, fintremai che al rivà a fâ scliçâ fûr la materie (Lucio Perès, Mê none Miute)
Sin. pus