Dizionari de Lenghe Furlane

centri  /cè-/  cen|tri  [FO]

1. s.m. pont che al è tal mieç di alc:  ma chei cu la sô flama là intal centri / dal pet sierant, sôl di suspîrs cocents / si passin (Eusebi Stele, La crudeltât, la tirania di Amôr); ogni particule di aiar e je atrate de fuarce di gravitât viers il centri de Tiere e duncje l'aiar si "ingrume" viers il bas (Stefano Micheletti, Marcellino Salvador, Notis di meteorologjie pal Friûl - Vignesie Julie)
2. s.m. [TS] gjeom. pont che al à la stesse distance di ducj i ponts di une circonference o de superficie di une sfere:  il rai al è il segment che al va dal centri a un cualsisei pont de circonference
   
   1. pont che rispiet a chel une figure plane o tal spazi e presente simetrie
3. s.m. zone che e je tal mieç di un ciert teritori:  colegâ Gurize e Triest a Viene e al centri de Europe (Dree Valcic, Une guide transalpine)
4. s.m. zone che je tal mieç di une citât, che pal solit e je chê plui antighe e plui di rapresentance, li che a son i edificis publics e privâts principâi:  pes stradis dal centri e jere fûr tante int (Jolanda Mazzon, Fûr di timp)
5. s.m. complès urban, paîs, citât:  grant part dal teritori de Basse invezit al è fat di centris medis e piçui (Mauro Pascolini, Andrea Guaran, La planure e la cueste dal Friûl)
   Sin. abitât , centri abitât , localitât , lûc , sît
6. s.m. localitât li che si fâs une cierte ativitât o che e je dedicade a di une cierte funzion:  [Pordenon] al devente simpri plui centri di buteghis, servizis, uficis, fabrichis, e gnûfs mistîrs (Angelo Floramo, Cuintristorie dal Nûfcent 1950-1960); la Badie di Rosacis, prime agostiniane, daspò benedetine, e fo un centri di coltivazion de vît e di conservazion di varietâts (Enrico Peterlunger, Storie curte de vît in Friûl)
   Sin. lûc , sît , sede² , pont
7. s.m. complès di struturis di podê che a dan adun e a gjestissin lis risorsis di une struture plui grande, ancje di un teritori o di un stât:  esigjence di gnûfs rapuarts politics e aministratîfs fra centri e perifariis dentri dai Stâts (Marc Stolf, La Cjarte di Strasburc dal 1981. Une Risoluzion "storiche" e ancjemò di atualitât)
8. s.m. complès di mieçs e personâl ordenât par davuelzi une cierte ativitât:  personis in cure tal Centri di Salût Mentâl di Glemone (Marta Vezzi, La mont di Cjargne, une passion cence etât)
   
   1. locâl li che si fâs la ativitât:  il centri de Caritas si cjate in vie Marinoni, ma par jentrâ tal Spazi pai Zovins si à di rivâ par vie Rivis (Piero Cargenlutti, Un spazi dulà cjatâsi pai zovins de citât)
   2. istitût che al prudele e al organize ativitâts, ricercjis o studis di un ciert setôr:  si à vût resonât su la produzion dai materiâi didatics e su la dibisugne di meti sù un Centri regjonâl di documentazion didatiche (Donato Toffoli, Relazion dal Grup di lavôr "Planificazion linguistiche")
9. s.m. lûc li che si dan adun categoriis particolârs di personis o materiâi, in spiete di une lôr sistemazion definitive:  lu vevin puartât intun centri di acet par minôrs, dulà che al veve spietât un mês (Igor Londero, Delit in vie del Lavoro)
   Sin. pont
10. s.m. tai parlaments a forme di emicicli, setôr di sentis a mieç jenfri chei di çampe e chei di diestre
    
    1. complès dai parlamentârs che si sentin in chel setôr, pal solit moderâts
    2. tindince moderade intun partît o intune fuarce politiche
    3. aree politiche moderade:  su lis causis de sconfite dai partîts dicentri e di çampe, si spere che i responsabii a fasaran autocritiche severe, serene e obietive (Antoni Beline, Politichis 2001: la gnot de reson)
11. s.m. (fig.) element di fonde, element plui impuartant di alc:  il centri de mission de gnove radio al jere chel di dâi ricognossiment al furlan, viodût tant che la lenghe dal popul cuintri de lenghe dal podê (Max Mauro, Un Friûl difarent: i 90 mhz di Onde Furlane); la famee, i gjenitôrs, i fradis a son il centri de vite (AAVV, Sul florî)
    Sin. anime , cantin , cûr , essence , medole , nucli , nusel , vues , pivot
12. s.m. (fig.) puest plui impuartant:  l'umanisim al met al centri dal mont l'om, un om paron dal so destin (Fabian Ros, La invenzion dal stât)
13. s.m. sport tal balon e in altris zûcs di scuadre, pont o zone dal cjamp di zûc centrâl, pal solit segnade cuntun cercli o un discut:  dopo un gol si torne a bati dal centri
    
    1. zûcs, sport ancje in zûcs no di scuadre, part che e je tal mieç dal cjamp o de superficie li che si zuie:  il zuiadôr che al ten il centri [de scachiere] al è su la buine strade par vinci (Nilde Teresa Negro, Zuìn di scacs)
14. s.m. sport tal balon e in altris zûcs di scuadre, zuiadôr o grup di zuiadôrs che a formin la part centrâl de linie di atac
    
    1. te bale tal zei, zuiadôr che al fâs di regjist
    2. tal hockey su piste, zuiadôr che al garantìs il colegament jenfri i doi denant e il tiercin
15. s.m. [TS] anat., fisiol. part di un orghin che e davuelç une funzion particolâr:  studiâ cemût che a lein e a scrivin i fruts dislessics, stant che la lôr malatie e cjape i centris de leture e de scriture tal cerviel (Franc Fari, Il cjâf dai furlans)