Dizionari de Lenghe Furlane

rest  /-è-/  rest  [FO]

1. s.m. dut ce che al fâs part di alc e che nol è za stât descrit, nomenât, cjapât in considerazion e v.i.:  tantis robis che mi cruziavin, come il lambic de gnot, lis neulis de basse e dut il rest, al jere come se cumò a començassin a poiâsi intune lûs plui cuiete (Stiefin Morat, Kebar krossè); al metè la monture fassiste: cjamese nere, baret cu la pinie e dut il rest (Roberto Ongaro, Il muc); chestis a son lis unichis robis che ti dîs. Volêsi ben: il rest al ven di bessôl (Dino Virgili, La aghe da pît la cleve)
   Sin. restant
   Var. arest²
   
   1. part di alc che inmò no je sucedude, passade, che no je stade fate, dade e v.i.:  Pauli ju menà dentri […] e ur racomandà di platâsi parsore di un palc […]. Li i zovins si comedarin pal rest de gnot (Maria Forte, Cjase di Dalban); tancj di chei fats che barbe Meni al veve passât dut il rest de sô vite a contâju, sentât sul clap di cjase (Alan Brusini, Amîs come prime); «Po ben, cuatri mil e cinccent, siôr Simon… Doi mil cumò e l'arest cuant che al ven Zuan a Sant Ramacul […]» (Maria Forte, La tiere di Lansing)
      Sin. restant
2. s.m. diference di bêçs di tornâ a cui che al à paiât di plui di ce che al veve di dâ:  ve ca il rest, viôt se al è just; spiete, o ai di dâti indaûr il rest
3. s.m. [TS] mat. te division di doi numars intîrs positîfs, ce che al covente par zontâlu al prodot dal divisôr cul risultât par tornâ a vê il dividût:  vincj dividûts trê a fasin sîs cul rest di doi
4. s.m. ce che nol è stât finît, mangjât, vendût e v.i.:  su la taule nude la polente si jere sfredade, la mignestre e restà par chê dì tes scudielis come rescj di une fieste finide par simpri (Pieri Menis, Sul agâr)
   Sin. vanzum , vanzadice
5. s.m. tal pl., ce che al è ancjemò di alc dopo di un dam, une distruzion o dopo dal passâ dal timp:  chê dai Cjargnei e je une civiltât a la forme orientâl de civiltât di «Hallstatt», che al è un paîs culì de Austrie, dulà che a àn cjatât une vore di rescj di cheste int (Francesc Placerean, La nestre storie)
6. s.m. tal pl., cuarp muart o toc di cuarp muart:  cuant che o butavin lis fondis, dispès o cjatavin ancjemò rescj umans: o vevin di blocâ dut e di clamâ la sigurece (Oscar Puntel, Mario Collavino: une bandiere furlane parsore il gnûf World Trade Center di New York)
   Sin. cadavar , cuarp

Polirematichis e espressions idiomatichis

• da rest loc.av.
• pal rest loc.av.

Proverbis:

• cui che no si contente dal onest al piert ancje il rest
• tu fâs ce che tu puedis e lassii a Diu cure dal rest