Dizionari de Lenghe Furlane

proprietât  pro|pri|e|tât  [FO]

1. s.f. cualitât tipiche di cdn. o di alc che e fâs che si distingui di chei altris e che al puedi agjî o reagjî intune cierte maniere:  [la teorie de gravitazion universâl di Newton] no je compatibile cu lis proprietâts sperimentalmentri verificadis de lûs (Sergio Cecotti, Teologjie algjebriche)
   Sin. carateristiche , cualitât , podê²
   Var. propietât
   
   1. carateristiche che e permet di produsi cierts efiets:  [la tisane] di pomulis di picecûl, plene di vitaminis e proprietâts curativis (Margherita Timeus, Di Istât il gustâ si met te tace); lis lidriis [dai pestelacs] a àn saponinis triterpenichis che a dan a la plante proprietâts mucolitichis e espetorantis (Silla Stel, Bielis e bunis)
      Sin. cualitât , podê² , facoltât
2. s.f. [TS] filos. cualitât di une sostance che e je essenziâl
   Sin. facoltât , prerogative
3. s.f. [TS] gjeom., mat. consecuence logjiche che e ven de definizion di une entitât
4. s.f. precision tal fevelâ o tal scrivi:  puartâsi fûr fevelant par furlan cuntun fregul di proprietât (Josef Marchet, Autonomie e lengaç); o volevi che si tornàs a publicâ […] La aghe da pît la cleve […], pe bielece de scriture, pe ricjece e proprietât lessicâl (Adrian Cescje, Memoriis di politiche linguistiche)
5. s.f. il jessi paron, dirit di disponi di bens in maniere esclusive di alc, dentri dai limits e dai oblics di leç:  la funzion vassaliche e devente ereditarie e […] l'afidament si trasformarà, un pas daûr di chel altri, in possès e, di chest, in proprietât (Fabian Ros, La invenzion dal stât)
6. s.f. ben che si è parons:  fra avocats, tribunâl e cjartis - a mangjarin une biele fete de proprietât prin ancjemò di metii lis mans parsore (Gianni Gregoricchio, Trê feminis)
   Sin. possediment , patromoni
   
   1. ben imobiliâr, spec. in riferiment a une estension di tiere:  lis cjarandis o lis filis dai morârs a segnavin lis proprietâts (Carlo Sgorlon, Ombris tal infinît); a pene che i jere vignude la ocasion di slargjâ la sô proprietât al comprà la colonie che e començave dulà che e finive la sô braide, cjase e cjamps (Pieri Menis, Sul agâr)
      Sin. font² , tignude
7. s.f. (meton.) i parons, i proprietaris:  la proprietât e à decidût di cjapâ a vore plui dipendents
   Sin. paron , sorestanzie