Dizionari de Lenghe Furlane

cûl  cûl  [FO]

1. s.m. part daûr dal cuarp, li che e finìs la schene e che a tachin lis gjambis:  mi plâs par tancj motîfs. Intant e à dai biei lavris. Une biele musute di miluçut. Des bielis gjambis e un biel cûl (Checo Tam, Queen Anastasia); il zovin Cleve si palpave di scuindon la massanghe picjade daûr il cûl (Dino Virgili, La aghe da pît la cleve); al veve simpri i bregons scjars che i lassavin scjampâ la panze, e cualchidun i diseve ridint "Checo, o vendi cûl o comprâ tele" (Maria Forte, Il tei); un plevanon che nissune poltrone cui braçâi e jere avonde al so cûl che al leve a riscjo di tirâsale daûr (Pieri Somede dai Marcs, Il tinel)
   Sin. biel di Rome , daûr , fabrian , floc¹ , florean , martin , posteriôr , preterit , tafanari , tananai , verzot , boro , dote dal Friûl , florio , morghen , pesenâl , sentâ , zei , favar , floreton , funzic , tont
   Cfr. clape , nadie , culate
   
   1. part daûr ancje di bestiis:  al olmà une schirie di lusutis che si impiavin e si studavin a bugadis tant che il cûl des lusignis di Istât (Roberto Ongaro, Il muc)
2. s.m. part di un toc di vistiari che e corispuint a chê part dal cuarp:  al lave ator cul cûl sbregât e i comedons difûr (Josef Marchet, Il salon dal barbîr); jo no ai voie di lâ ator cui tacons tal cûl a barbon vie (Fabian Ros, La rambe)
3. s.m. buse che e costituìs l'ultin trat dai budiei par li che i escrements a van fûr:  dut al è nobil, ancje netâ il cûl di un frut o medeâ une plaie infetade (Antoni Beline, Emigrants pe fede)
   Sin. buse dal cûl , busignele , pedearie , puarte dal budiel
4. s.m. (fig., iperb., volg.) in espressions che a segnin incapacitât, impussibilitât, inoportunitât, basse cualitât e v.i.:  a mieç stradon i capite un moscjin juste tal voli bon. Si ferme a colp al dîs: "Gracie Signôr, e cumò cun ce viodio, cul cûl?" (Alan Brusini, Amîs come prime); «Tu cjantis ben, tu, cui pignûi di Zuan» i diserin une dì. E lui «O cjanti par cui che mi da di mangjâ. Al fâs lavorâ, ma al paie, e al è just e voaltris o fevelais cul cûl» (Maria Forte, La tiere di Lansing)
5. s.m. (fig.) part sot di un contignidôr:  a van te plui grande buteghe di feramente e a sielzin siet padielis: cinc cence cûl, une cence fonts e une sfonderade (Andreina Nicoloso Ciceri, I siet fradis - Racconti popolari friulani I); al veve la coce spelade fin su la cope e lustre che e pareve il cûl lusint di une cjalderie di ram (Pieri Somede dai Marcs, Un cuatri in italian)
   
   1. cuantitât di licuit che al bagne a pene il fonts di un contignidôr:  une tace cuntun cûl di armagnac vanzât (Franco Marchetta, Light my Fire)
   2. prime o ultime part di un insacât:  plui di ce che al restave de polente e dal cûl di un salam, nol veve cjatât (Gianni Gregoricchio, Îr e doman)
6. s.m. (fig., coloc.) fortune:  «Folc us trai, ce cûl!» (Pieri Bonin, Scarabocj); chei che a àn vût, forsit, plui cûl che sintiment a àn ancje fat i bêçs, ta chei agns (Radeschi, La brute fin de Cjadree Grande); torni a fâ un zîr [par cirî dulà lassâ la machine] e o viôt un ca al ven vie. Orpo, ce cûl (Raffaele Serafini, Lassâ la machine a Udin cence bêçs minûts)

Polirematichis e espressions idiomatichis

• aghe al cûl loc.v.
• cjapâ pal cûl loc.v.
• cjapâle tal cûl loc.v.
• cjoli pal cûl loc.v.
• cul cûl loc.av.
• cul cûl insù loc.av., loc.adi.inv.
• cul cûl par aiar loc.av., loc.adi.inv.
• cul cûl par tiere loc.av.
• dâ un pît tal cûl loc.v.
• fâ in cûl loc.v.
• fâ un cûl par ca loc.v.
• fâ un o cul cûl de tace loc.v.
• fâsi il cûl loc.v.
• lâ a fâ in cûl loc.v.
• lâ fûr dal cûl loc.v.
• lâ in cûl loc.v.
• lecâ il cûl loc.v.
• mandâ a fâ in cûl loc.v.
• mandâ a fâsi jemplâ il cûl di ai loc.v.
• mandâ in cûl loc.v.
• menâ il cûl loc.v.
• menâ pal cûl loc.v.
• metile tal cûl loc.v.
• metilu tal cûl loc.v.
• movi il cûl loc.v.
• pierdi i budiei dal cûl pes cumieris loc.v.
• pît tal cûl loc.s.m.
• poiâ il cûl loc.v.
• rompi il cûl loc.v.
• tignî il dêt tal cûl loc.v.
• tirâ il cûl indaûr loc.v.
• vê in cûl loc.v.
• vêle intal cûl loc.v.
• vêle tal cûl loc.v.
• voltâ il cûl loc.v.

Proverbis:

• al timp, al cûr e al cûl nissun no i comande
• bisugne misurâ il cûl cu la bocje
• cjar di cûl no va in cîl
• cuant che al spice il cûl, al fâs marcjât il diaul
• cui che al fevele par daûr, i fevele al cûl
• cui che al met il cûl sore la urtie al sint che i furmie
• cui che al nas disfortunât i tampieste sul cûl ancje sentât
• cui che al vûl cjapâ il gût, bisugne che si bagni il cûl
• cui che le nase le travase, cui che le nûl le trai pal cûl
• cui che mes dîs par daûr jes dîs al cûl
• dal cjaval e dal mûl trê pas daûr dal cûl
• ducj i guscj a son guscj, al diseve il gjat che si lecave il cûl
• fate la gracie si à in cûl il sant
• flât di cûl al va là che al vûl
• il sporc e il malmont a àn il cûl taront
• mats, feminis, paron, timp e cûl fâs ce che al vûl
• no bisugne spietâ la aghe al cûl
• nûl e cûl al fâs ce che al vûl
• ogni pît tal cûl al pare indenant
• pal cûl si impire lis gusielis
• plui si pleisi e plui si mostre il cûl
• plui si sbassisi e plui si mostre il cûl
• se a disin par denant, si sa difindisi; se a disin par daûr, i disin al cûl
• se si vûl piâ pes, bisugne bagnâ il cûl
• soç e mont a fasin il cûl taront
• spice di cûl, bondance di fave
• spice di cûl, murie di feminis
• sporc e mont a fasin il cûl taront
• taiât che mi àn il cjâf, o ai in cûl che mal tornin a tacâ sù
• trombe di cûl, sanitât di cuarp: cui che nol trombe al è muart