Dizionari de Lenghe Furlane

zei  /-è-/  zei  [FO]

1. s.m. recipient, pal solit di vencs, di forme plui o mancul semisferiche e pal solit cuntunun mani semicircolâr parsore:  sul manuvri de biciclete e jere cjariade cun doi zeis plens di verdure (Mario Beltramini, Jo e Graziella); si faseve, la sabide dopo misdì, la spongje e, dopo di vêle striçade dal pignot, le mandavin jù pal poç tal zei dal lidric par che si indurìs vie pe gnot (Pieri Menis, Il cuader de none); Rita e corè fûr cul zei de robe sul braç, clamant a vôs alte Ricardo, biel che la buere e sglonfave e e faseve svoletâ i linzûi come velis di nâf (Carlo Sgorlon, Prime di sere)
   Sin. cagnestri , ceste , cos , zee , sbrinzie
   
   1. contignidôr de stesse sorte, doprât une volte tant che scune, spec. tes fameis puaris:  «Ancje cheste i coventave a chê puare cristiane! », e diseve sô mari, «trê fruts che i stan tun zei e un par strade!» (Pieri Menis, Il fi de Rosse)
2. s.m. (set.) contignidôr, pal solit di bachetis e di vencs, par puartâ cjamis su la schene:  e po fadias osteadas fintant che al ven not / sot il buinç, sot il zei, sot la vacja, simpi sot (Giorgio Ferigo, Taresia di Val Vezil)
   Sin. cosse
   Cfr. fonts , palusset , pavogne , scregne , fiercle
3. s.m. cuantitât di contignût che al sta in chei recipients:  Lise e jere lade sot da la arie a cjoli un zei di lens par fâ fûc (Roberto Ongaro, Il muc); un blec di tiere che e prodûs sì e no un zei di pomodoros o fasûi (Pieri Somede dai Marcs, La veretât e va ben simpri dite)
4. s.m. (fig.) cuantitât indefinide ma bondante di cualsisei robe, sedi concrete che astrate, ancje di personis:  al podarès vê il çurviel par ledrous e vêvi contât un zei di balis (Stiefin Morat, Donald dal Tiliment); nol jere râr il câs che al menàs vie, dut braurôs, un zei di fantatis che a lavoravin tal ricovero (Antoni Beline, Pre Pitin)
5. s.m. (fig., ancje spres.) grup, categorie:  a metevin furlans e altris minorancis tal zei des minorancis linguistichis par dâur une tutele minôr e diferenziade [rispiet aes "minorancis nazionâls"] (Adrian Cescje, Memoriis di politiche linguistiche)
   Sin. sac , numar , trop² , grum
6. s.m. [TS] sport inte bale tal zei, cercli di metal fissât tun tabelon e che al à une rêt cence font là che bisugne butâ la bale par segnâ i ponts
   Sin. cos
   Cfr. cercli , fier , tabelon
   
   1. il pont segnât metint dentri la bale intal zei
7. s.m. [TS] pescj. imprest par cjapâ i pes, fat di vencs o di viminis, in forme di contignidôr viert di une bande, ma a plere strente viers il didentri, di maniere che une volte che il pes al jentre nol rive a vignî fûr:  vie di corse tal cjanêt a crots cu la fossigne, o a tencje cul zei, ta la aghe fin tes lesinis (Dino Virgili, La aghe da pît la cleve)
   Sin. nasse , cosse , caniç , covôl , cudice , nassin , nassit , ragn , nasson
8. s.m. (scherç., eufem.) part dal cuarp che si poie cuant che si sentisi
   Sin. cûl

Polirematichis e espressions idiomatichis

• bale tal zei loc.s.f.
• balon tal zei loc.s.f.
• vê il cjâf come un zei loc.v.

Proverbis:

• cun zeis no si va a cjoli aghe
• ogni zei al à il so cempli