Dizionari de Lenghe Furlane

numar  /-ù-/  nu|mar  [FO]

1. s.m. ent astrat che al rapresente cuantitâts e relazions tra cuantitâts:  siet, cifre juste dal moment che e tignive sevi il trê che il cuatri, i numars divins de perfezion (Sandri Di Suald, Conte di peraulis muartis)
   Var. lumar
   
   1. cuantitât che e corispuint a chel ent:  sù par jù 60.000 feminis a àn pierdude la vite [copadis tant che striis], ma par cualchi studiôs i numars a son plui alts (Antonella Riem Natale, Recension di Neuropsicologia dell’esperienza religiosa)
   2. segn grafic che al rapresente chel ent:  o soi rivade a lei il secont bilietut: "Cu la sperance che cheste pene [regalade dai scuelârs] e scrivi i numars dal sîs insù!" (Gianni Gregoricchio, Trê feminis)
2. s.m. (fam.) tal pl., la matematiche, la aritmetiche:  il mâl al jere che lui, Nando, al veve vût simpri riviel cuintri ducj i numars… che i davin l'inzirli dome a cjalâju (Maria Forte, Cjase di Dalban)
   Sin. cont¹
3. s.m. element, individui e v.i. che al corispuint a une cierte posizion intune serie:  lui nol saveve il todesc e nol rivave nancje a capì cuant che a clamavin il so numar (Cristina Noacco, Faliscjis)
   
   1. posizion intun ordin, intune serie:  il nestri Paîs al è di là dal numar vincj te classifiche [di competitivitât tal setôr turistic] (Attilio Celant, Il rûl economic dal turisim in Italie); dal Consei de Europe e rivà une gnove Racomandazion (la numar 928, dai 7 di Otubar dal 1981) (Marc Stolf, La Cjarte di Strasburc dal 1981. Une Risoluzion "storiche" e ancjemò di atualitât)
   2. singul volum di une racuelte o singule jessude di une publicazion in serie:  za un an tal prin numar di chest sfuei o vin podût profetizâ […] dute la montanade des trombetadis risorzimentâls […] in onôr e glorie dal Cuarantevot (Josef Marchet, Preambul rusin); Friuli d'Oggi al à publicât dilunc cuatri numars un poeme in lenghe furlane di autôr anonim, componût in chescj agns, Muart antighe dal Friûl Friûl (Adrian Cescje, Memoriis di politiche linguistiche)
   3. identificatîf di une cjase, di un ambient, di un apartament e v.i. intune strade o intun complès:  che al vegni a cjase mê, numar vot, dongje la glesie (Pieri Somede dai Marcs, Un testament)
   4. identificatîf in cifris di une linie telefoniche, ancje par segnâ l'utent di chê linie:  "Pronto", i disin, "fevelio cul plevan? " "No", al rispuint lui, "o vês sbaliât numar" (Alan Brusini, Amîs come prime); il numar dal centri de stampe internazionâl nol rispuindeve. Lis telescriventis no vevin nancje corint (Agnul di Spere, Messe di misdì a Varsavie)
4. s.m. biliet cun segnât un numar che al da dirit a vê une posizion di ordin intun servizi:  cjoli il numar pal banc dai formadis
   Sin. biliet
5. s.m. [TS] zûcs ognidun dai elements contrassegnâts di un numar in zûcs tant che lotariis, roulette e v.i.:  e va a cusî a Udin, tal buteghin dal lot a zuiâ trê numars (Josef Marchet, Lis predicjis dal muini); par un numar nol veve fate tombule (Pieri Menis, Chei di Muraie)
6. s.m. grup di une cierte cuantitât di elements, individuis e v.i. caraterizâts di alc in comun:  ognidun di nô, zovin o vieli che al sei, al à di pensâ che vuê un an si po jessi tal numar di chei che a saran lâts a fâ mantiis di bocâl (Josef Marchet, Lis predicjis dal muini); il nestri comun al jere metût tal numar di chei che a vevin int contrarie al Duce (Pieri Somede dai Marcs, Lis votazions)
   Sin. categorie , complès , grup¹ , schirie , scjap , trop²
7. s.m. individui pierdût intal grum, calcolât cence impuartance:  chi, ce che al conte, al è il franc e cence di chel tu sês un numar, ma un numar scart, di chei di butâ vie (Roberto Ongaro, Il muc); lis gnovis barbariis indulà che a ridusin i oms a numar, a machinis (Tarcisio Venuti, La cjase di Toni)
8. s.m. valôr intune scjale di riferiment, pal solit standardizade:  e à lis scarpis numar trentenûf (AAVV, Sul florî); fier di gucje gruesse, numar 12 (Fabian Ros, La rambe)
   Sin. misure , taie
9. s.m. singule prestazion intune esibizion, intun spetacul:  il numar dal ecuilibrist
10. s.m. [TS] gram., ling. categorie che e individue la distinzion jenfri singolâr e plurâl, e in ciertis lenghis ancje duâl, il paucâl e altris:  il talian […] al ten par so cont par nons e adietîfs dome il numar e il gjenar [e no il câs] (Vladimír Petkevič, trad. di Zorç Cadorin, Corpus linguistics)
11. s.m. [TS] mus. ognidun dai rapuarts armonics che si otegnin doprant il monocordi

Polirematichis e espressions idiomatichis

• dâ i numars loc.v.
• dal numar un loc.adi.indef.
• fâ numar loc.v.
• meti i numars in colone loc.v.
• vê ducj i numars loc.v.
• vê i numars loc.v.

Proverbis:

• piel: numar un!