Dizionari de Lenghe Furlane

cos  /-ò-/  cos  [CO]

1. s.m. (centr., merid.) recipient di vencs de capacitât di plui o mancul mieç metri cubic:  eco el cos cumò si cjarie / plen incolm. Po i bûs lant vie / planc cul cjar fin sot da la arie / pâr che sintin la ligrie / dei parons par chê cucagne / ben vignude de campagne (Pieri Mation, A crevâ sorc)
   Sin. zei
   Cfr. zei , zee , ceste , cosse
2. s.m. (set.) recipient di vencs che si cjame su la schene:  Mia di Filiçon cul cos da li panoli su la schena (Novella Cantarutti, Il punt); [une vecje] e rivave li di lui ogni setemane cul cos su la schene par cjapâ sù sedons di len, mescui, breis pe polente e altris aminicui cusinaris che e leve a vendi tal marcjât, jù, te Basse (Fabian Ros, L'om che al pierdeve pinsîrs pe strade)
   Sin. cosse , zei
3. s.m. cuantitât di robe o di elements tignûts dentri di chei recipients:  in cjase a jerin za pronts pes gramulis dai aventôrs un zei di trute, un cos di pan, une mont di ûfs dûrs e tant lidric di passi une pline di bûs! (Pieri Menis, Disore e disot)
   
   1. (fig.) cuantitât grande:  brami che steis al mont / infin che us torne cont, / che vebis di stâ in pâs / sence moscjis al nâs, / che fais un cos di fruts, / ducj biei come miluçs (Pieri Çorut, Viaç da Trivignan a S. Lurinç)
4. s.m. (fig.) furniment ingjavât, fat di vencs o di fîl metalic o di altri materiâl, che si met intor dal music des bestiis dumiestiis, par che no muardin o no mangjin cuant che no àn di muardi o di mangjâ:  al cjan bisugne metii il cos e tignîlu pe cuarde (Angelo Covazzi, I dincj)
   Sin. musiâl , musarole , musolarie , musolâr , musarin , musarûl , musâl , musan² , musiûl , musolere
5. s.m. [TS] sport cercli di metal li che e je picjade une rêt, che al è il bersai dai tîrs tal sport de bale tal zei
   Sin. zei

Polirematichis e espressions idiomatichis

• bale tal cos loc.s.f.
• fâ un cjâf come un cos loc.v.
• vê il cjâf come un cos loc.v.