Dizionari de Lenghe Furlane

fier  /-è-/  fier  [FO]

1. s.m. metal di colôr grîs slusint, che però al pues ossidâsi, dûr se al ven lavorât:  dopo di vê cjatadis, tes monts, lis gjavis di fier, i Celtics a sviluparin la industrie di chest metal (Josef Marchet, Cuintristorie dal Friûl fin sot la Italie); une casse di noiâr cu lis bertuelis e la sieradure di fier lavoradis e stagnadis a la antighe (Pieri Somede dai Marcs, La Madone dai siet dolôrs)
   
   1. [TS] chim. element metalic dal grup dai elements di transizion, bivalent e trivalent, cun numar atomic 26, che in nature al è râr tal stât libar, ma al è in putrops minerâi e si lu segne cul simbul Fe:  altis tensions si otegnin in alternade (AC) cui trasformadôrs a nucli di fier (AC/AC) (Lorenzo Marcolini, Aplicazions des celis organichis nanostruturadis)
   2. biochim. molecule cun chel element, che e à funzions impuartantis te vite dai organisims, in particolâr pal traspuart di ossigjen:  [la ledrepis] e je siore di proteinis, fier, vitaminis e calci (Giorgio Pascoli, Il Litum: jerbis salvadiis te cusine); cjar e pes a furnissin proteinis di alte cualitât e ancje fier (Guglielmo Pitzalis, Mangje san 3)
2. s.m., adi.inv. colôr grîs avonde scûr:  Laurinç al cjalave i voi colôr fier dal "gurizan" (Agnul di Spere, Frêt)
3. s.m. cualsisei robe di fier o ancje di un altri metal:  nancje no mi sarès inacuart che mi veve pontât un fier se no ves viodût un fîl ros [di sanc] che al partive de gjambe (Lucio Perès, Tal Cuar); fûr de prime ostarie di Fontanerosse, intor dai fiers de fereade dal barcon, al jere peât il cjaval (Pieri Menis, Chei di Muraie)
   Cfr. feramente , ferace
   
   1. bachet lunc e fin, a ponte, di fier o ancje di len o di plastiche, par gucjâ:  Tunina a veva fermât i fiers e poât la cjalça sul grim (Novella Cantarutti, Li Anzuliti); un maion neri, lunc e larc, di chei di fier di gucje gruesse, numar 12 (Fabian Ros, La rambe)
      Sin. gucje , fier di gucje , fier di cjalce
   2. cuantitât o rie complete di ponts di gucje che a stan tun di chei bachets:  fâ cuatri fiars di cjalce (Ercole Carletti, La Ave)
   3. imprest par sopressâ, viôt fier di sopressâ :  chê cjamese e varès bisugne di une bote di fier
      Sin. soprès
   4. imprest che si scjalde par riçotâ i cjavei:  si spandevin odôrs sutîi, par esempli chel dal cafè, […] o chel dal vuardi brustulît […] o chel dai cjavei di Jole, riçotâts cul fier scjaldât (Carlo Sgorlon, Il dolfin)
   5. lame di açâl che si tache sot des scarpis par sgliciâ, o stivalet cun chê lame za montade viôt fier di sgliciâ
      Sin. glacin
   6. complès di pontis di metal che si met sot des scarpis o dai scarpons par no sbrissâ su la glace:  ogni Uvier la Uta a mi imprometeva da menâmi jolà sù [tun paisut in mont] e a mi faseva un pâr di cjalci gruessi un deit, e il famei al mi plantava i fiers ta li damindi (Novella Cantarutti, "Uta, Ututa improntiti")
      Sin. sgrif , glacin
   7. protezion di fier che si inclaude sot dai çucui dal cjaval par che no si fruin o par che no si rompin:  i stalîrs si devin da fâ: fen e vene pai cjavai o meti un fier pierdût par strade (Alan Brusini, Come tai romançs)
      Sin. fier di cjaval , fier a baston ipon. , fier glacinât ipon.
      Cfr. inferâ
   8. imprest che si ten te palme de man par gjavâ i grignei di blave de panole:  al specolave cul zei jenfri lis gjambis, sot il puarti, e la blave di l'an passât e sunave sot i dincj dal fier a ogni strente (Dino Virgili, La aghe da pît la cleve)
      Sin. specolin , frucin , disvruiadôr
   9. lamine di fier plantade par tiere fûr de puarte di cjase par netâsi lis suelis de tiere o de nêf:  «[…] Comodaitsi» «O ai i scarpons ducj plens di tiere» «O podês netâsi. Il fier, velu li» (Carlo Sgorlon, Prime di sere)
4. s.m. spec. tal pl., imprescj che a coventin tune vore:  il tecnic si metè di impegn e al provà [di vierzi la cassefuart] cun fiers, clâfs, furducjis, ramondins, atrabolics: nuie ce fâ (Antoni Beline, Pre Pitin); l'ombrenâr al vierç la sô cassute, al cjol lis tanaiis e cualchi fier, al si sente e al si met a justâ une ombrene (Pieri Somede dai Marcs, L'ombrenâr); dut in bandon: il fogolâr distudât, i fiers picjâts tune cjavile rusine (Enrico Martina, Ricuarts e inlusions)
   Sin. argagn , imprest¹ , inzen , ordegn , strument
   
   1. strument di chirurgjie:  tal ospedâl le àn metude subit sot i fiers (Pieri Menis, Cui si jerial impaçât cun Modestute?); met a boli la siringje e i fiers che subit e je ore di ambulatori (Pieri Somede dai Marcs, Vilie di Nadâl (teatri))
   2. cjadene o altri imprest par leâ presonîrs e galiots:  a pene dentri, a tradiment, po no ur puartino vie lis massanghis e ur metin i fiers tes conolis! (Dino Virgili, La aghe da pît la cleve); al sintive, cu la imagjinazion, il scatâ dai fiers intor des conolis dal sassin (Roberto Ongaro, Cretevierte); se ti pescje il tenent, tu vâs dret ai fiers (Pieri Menis, La vuere sul Freikofel)
      Cfr. manete , castagnole
5. s.m. (fig.) arme:  e jerin timps di pocjis peraulis, e dibot lis mans e corevin sui fiers (Felix Marchi, Clarine di Braulins); oh butait chei fiers in aghe / oh fermait chel bastiment! / Al è dentri ancje il mio zovin, / che al si 'nd va tant malcontent (Popolâr, Oh butait chei fiers in aghe)
6. s.m. [TS] sport te ativitât sportive dal golf, ognidune des macis cul cjâf di fier

Polirematichis e espressions idiomatichis

• ai fiers loc.av., loc.adi.inv.
• braç di fier loc.s.f.
• comedons di fier loc.s.m.pl.
• fier di sgliciâ loc.s.m.
• fier di sopressâ loc.s.m.
• meti ai fiers loc.v.
• meti fiers in aghe loc.v.
• meti i fiers in aghe loc.v.
• pierdi un fier loc.v.
• restâ sot i fiers loc.v.
• sot i fiers loc.av.

Proverbis:

• al fari il fier, al cjaliâr il corean, al marangon il len e al miedi i rimiedis
• bisugne bati il fier cuant che al è cjalt
• cul plui bati la strade, la bolp si cjape tal fier
• i muarts a àn i dincj di fier
• il pericul al romp il fier
• la necessitât e romp il fier
• mûr di Invier, mûr di fier
• par un claut si piert un fier e par un fier si piert un cjaval