Dizionari de Lenghe Furlane

palote  /-ò-/  pa|lo|te  [CO]

1. s.f. imprest fat cuntune lame largje di açâl o di altri materiâl cuntun un mani lunc, doprât par movi, cjapâ sù, ingrumâ tiere o altris materiâi:  o ai cjapade une scove e une palote sote dal puartin di Limpie, mê cusine, e o ai netade vie dute la nêf de sô stradele (Laurin Zuan Nardin, Il cop)
   Sin. pale¹ , svangje , badîl , sgjavine
   
   1. ancje in riferiment dome ae lame, cence il mani:  une palote di svangje (Alan Brusini, Il colôr dal marcjât)
   2. cuantitât di materiâl cjapât o mot intune volte cun chel imprest:  il Micul [il pizighet] al faseve finte di lavorâ, ma dopo cuatri palotis al lassave dut fer (Alan Brusini, Par stradis lungjis)
      Sin. palotade
2. s.f. imprest ingjavât, ancje dut di len, cul mani curt di cjapâ cuntune sole man, pal solit par cjapâ une cierte cuantitât di grans, farinis e v.i.:  al viodeve a vignî indenant la parone di cjase cu la palote de farine (Riedo Pup, I furlans e la caritât)
   
   1. cuantitât di materiâl cjapât cun chel imprest:  i butà une palote di forment di prionte (Dino Virgili, La aghe da pît la cleve)
      Sin. palotade
3. s.f. (fig., scherç., iron.) dint une vore grant, in particolâr dint incisîf superiôr centrâl:  biel ridint i saltin fûr di chê bocje un pâr di palotis dal diau (Dolfo Zorzut, Se la prime mi cjoleve); al era sot la cuarantina, magron, grant e moru, cun dôs "palotis" di dincj blancs, che cuant che al vierzeva la bocja (pesul cuant che al rideva) al ti feva fin cjapâ un trin (Ovidio Colussi, La pension)

Polirematichis e espressions idiomatichis

• a palotis loc.av., loc.adi.inv.
• cu la palote loc.av., loc.adi.inv.