Dizionari de Lenghe Furlane

pale¹  pa|le  [FO]

1. s.f. imprest fat cuntune lame largje di açâl o di altri materiâl cuntun un mani lunc, doprât par movi, cjapâ sù, ingrumâ tiere o altris materiâi:  mi àn dade une cariole, une pale e un rali par tirâ place e tamesâ savalon (Pieri Menis, Il gno prin pâr di scarpis); strenzi il mani de pale par svangjâ pocjis jechis (Maria Forte, Cjase di Dalban); al jere di fâ dut cu la pale, no jerin pacaris, nol jere nuie (Matteo Ermacora, La emigrazion furlane in Austrie e in Gjermanie)
   Cfr. palote , svangje , badîl , sgjavine
   
   1. ancje in riferiment dome ae part largje, cence il mani:  si disfave in sudôr parsore l'incuin par slissâ un fier di vuarzine o une pale o un pâr di batadoriis (Josef Marchet, Lis predicjis dal muini)
   2. cuantitât di robe mote cu la pale:  puartimi ca dôs palis di ledan (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
      Sin. palade¹
2. s.f. [TS] mec., tecn. ognidun dai elements luncs di une eliche
3. s.f. [TS] mar., sport part che e va ta la aghe di un rem o dal tamon
4. s.f. [TS] tecn. viôt pale di rût
5. s.f. [TS] art piture sore tabele di len o tele di sogjet sacri metude sore dai altârs des glesiis:  tal 1759 la comunitât di Midun e comissione al pitôr la pale dal altâr maiôr de parochie che e mostre la Madone cul Frutin e Sants consegnade cinc agns dopo (Bepi Agostinis, I tancj arlêfs di Tiepolo e Piazzetta)

Polirematichis e espressions idiomatichis

• fâ di pale e di forcje loc.v.

Proverbis:

• cuant che lis monts a àn il cjapiel, met jù la pale e cjol sù il ristiel
• la pale che si môf si lustre
• la pale e à la ponte di aur parcè che la tiere vergjine e je un tesaur