Dizionari de Lenghe Furlane

borse  /bò-/  bor|se  [FO]

1. s.f. sorte di contignidôr di diviers materiâi, tant che tiessût, piel, plastiche, cjarte, par meti e puartâ robe di cualsisei gjenar, ancje in riferiment gjeneric a sacs, russacs, valîs, cartelis e v.i.:  une siorute che e çueteave indenant cu la borse di plastiche plene di spese e spià cun suspiet chei trê frutats (Carlo Tolazzi, La salamandrie tal fûc); e tirà fûr di un scansel une borse e je strucjà tes mans che si implenarin di bêçs (Pieri Menis, Sul agâr); e tornà cuntune borse di fibre maron, di chês che a dopravin i scuelârs agn indaûr. Le poià su la taule, dopo di vê tirât fûr un mac di cjartis (Carlo Sgorlon, Prime di sere)
   Sin. sporte
   Cfr. sac , valîs
   
   1. cuantitât di robe puartade in chel contignidôr:  butâ vie cuatri borsis di vistîts vecjos
2. s.f. contignidôr, di diviersis formis e dimensions, sedi cun funzion pratiche di puartâ alc, sedi cun funzion di acessori di mode, soredut feminine:  se jo o ai une borse di une marcje esclusive, jo (ancje idealmentri) o riten di partignî a un ciert grop sociâl (Sandri Di Suald, Comunicâ la autonomie)
   Sin. borsete
3. s.f. (fig.) cuantitât o disponibilitât o ûs di bêçs:  in chê cjase ducj cîr di raspâ e mai di puartâ dongje, e in chest mût si suie ancje la borse dal Manin (Maria Forte, La tiere di Lansing); un messaç indreçât aes istituzions par che a vierzedin la borse par judâ un mieç di interès public (Max Mauro, Un Friûl difarent: i 90 mhz di Onde Furlane)
   Sin. tacuin
4. s.f. anat. struture anatomiche a forme di sac
   
   1. (pop.) struture anatomiche de piel che e je tor ator dai testicui, ancje tant che esclamazion par mostrâ disacuardi:  "La Famea a è sacra", pal tacuin dai parons / par dâ braçs as minieras e cjar ai canons. / Ma "La Famea a è sacra". La borsa! (Giorgio Ferigo, Taresia di Val Vezil )
5. s.f. (fig.) spec. tal pl., forme sglonfe e flape de piel sot dai voi:  si palpave i voi mieç distudâts daûr lis borsis di piel ruane (Dino Virgili, La aghe da pît la cleve)
6. s.f. cuantitât di bêçs destinâts a une persone tant che compens, premi e sim.:  i partecipants a vevin dirit a un premi di partecipazion e, cun di plui, la pussibilitât di vinci une buine borse di bêçs (Stiefin Morat, Adalt abàs); potenziâ i assegns di ricercje, lis borsis di dotorât e altris iniziativis (Carli Morandin, Interviste a Alberto Felice De Toni)
7. s.f. bancj., fin. ancje cun iniz. maiusc., marcjât public sot control dal stât par tratâ azions, marcjanziis e v.i.:  une aziende che e ven cuotade in Borse e à l'oblic statutari di fâ vuadagn (Christian Romanin, Fevelâ di mancul, fâ di plui e fevelâ par furlan)
   
   1. sede di chel marcjât:  il machenon parchegjât te plaço dal paîs al stonavo come un cjamoç te borso di New York (Fulvio ReddKaa Romanin, Geologicamente impossibile)

Polirematichis e espressions idiomatichis

• borse des animis loc.s.f.
• borse di studi loc.s.f.
• borse nere loc.s.f.
• de borse loc.adi.inv., loc.av.
• molâ i cordons de borse loc.v.
• slargjâ i cordons de borse loc.v.
• smolâ i cordons de borse loc.v.

Proverbis:

• al vâl plui un bon consei che no une borse di bêçs
• bisugne menâ il dint daûr la borse che si sint
• bisugne misurâsi seont la borse
• bon pe bocje, trist pe borse
• cui che al bastone la femine, al bastone la borse
• cui che al fale di cjâf al paie di borse
• cui che al mint la sô borse lu sint
• cui che nol à bêçs te borse che al vedi mîl in bocje
• il grant vuadagn al sfonde la borse
• il mâl de piere al suie la borse
• il masse interès al sfondere la borse
• il trop vuadagn al sfondere la borse
• la femine e je il paradîs dal cuarp, il purgatori de borse, l'infier da la anime
• larc di bocje, strent di borse
• lis feminis a son il paradîs dal cuarp, il purgatori de borse e l'infier da la anime
• o mîl in bocje o bêçs in borse
• pôc e spes al jemple la borse
• se il timp al è seren, ancje cu la borse flape si sta ben
• tal paîs dai laris la man su la borse