Dizionari de Lenghe Furlane

rêt  rêt  [FO]

1. s.f., s.m. imprest fat di fîi o cuardis incrosâts par cjapâ pes o ancje uciei e bestiis:  Chichirichi, un grispin di om, saltarin come un zupet, al judave, par pôcs carantans, a picjâ tai ramaçs lis scjaipulis cui riclams, e a distirâ alte la rêt (Maria Forte, Cjase di Dalban); ca e là, par la aga, si viodeva galegjâ cualchi rimusui di cogois, di casons, di fossignis, di uatis, di rêts (Federigo Comelli, Il me paîs); doplis filis di çamars, cui ramaçuts cuinçâts in maniere savinte par platâ i rêts de carete (Adrian Cescje, Memoriis di politiche linguistiche)
   Cfr. trate , parêt , passade , rocul , bressane , olandine , plombine , tratôr³ , strassin , cogol , cogolarie , nasse , cosse , riçâl , vuate , vuaton , sac , rafigne , rafe , ragn , sghirel , peschere , schirâl , nassin , belance
   
   1. (fig.) robe o complès di robis che cu la lôr forme a ricuardin chel imprest:  tal Pasc di Plovit, jenfri i teis vieris de boschete, là che e jere une rêt di ombrene (Dino Virgili, La aghe da pît la cleve)
2. s.f. (fig.) ce che al cjape, al ingjane, al imbroie e v.i.:  si lassavin sburtâ e tirâ, cjapâts ancje lôr te rêt dal so estro, de sô bielece (Alan Brusini, Come tai romançs)
   Sin. vuaite , vuate , ingjan
   
   1. struture o situazion complesse:  une rêt di revocs imberdeâts, delusions, sconfitis, alc di volubil, che si podeve sfrissâ, ma no cjapâ in man e dominâ pardabon (Carlo Sgorlon, Ombris tal infinît)
3. s.f. trame di maiis, pal solit di filistrin o di metal, par sierâ, centâ, parâ e v.i.:  i gnûfs zardins des gnovis vilis dai gnûfs siôrs, […] sierâts di mûrs e di rêts, a somein tancj piçui cimitieris (Riedo Pup, I furlans e il zardin); la rêt dal pulinâr
4. s.f. tiessût a maiis plui o mancul stretis:  a àn milante e milante anei, rincjins cu lis crepis di muart, cjamesis a rêt, vêi, scarpis a ponte e stivalons alts (Checo Tam, La maree nere)
5. s.f. plan di maiis o di fîi di metal incrosâts là che si poie il materàs:  «Podêso dâmi ancje un jet?» al domandà. «O pues dâus une rêt […]» (Carlo Sgorlon, Prime di sere)
6. s.f. supuart par meti lis valîs parsore des sentis dai vagons:  passade la stazion di Reane Eliseo al tirà jù de rêt la valîs di fibre e al si invià de bande de puarte (Carlo Sgorlon, Prime di sere)
7. s.f. sorte di scufe di fîi incrosâts par tignî i cjavei in ordin cuant che si duar o par no che a colin fasint ciertis voris:  cuant che al cusine al met sù la rêt pai cjavei
8. s.f. borse di cuardis o fîi:  e vadin a cjoli il pan cu la rêt di cuarde (Giulio Andrea Pirona, Ercole Carletti, Giovanni Battista Corgnali, Il Nuovo Pirona); cjoli une rêt di narançs
9. s.f. (fig.) complès di int o organizazions che a lavorin in colaborazion:  costruivial ducj i components - ampole di veri, filaments, atacs e v.i. - inte sô oficine o vevial ancje une rêt comerciâl? No lu savìn (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); e dominave sul teritori, cumò lu savìn, la rêt invisibile di Gladio (Adrian Cescje, Tal non di Fausto Schiavi)
   Sin. implant , organizazion , struture
10. s.f. (fig.) complès des liniis des viis di traspuart, des aghis o di altris elements dal paisaç:  al fo sistemât un ordenament aministratîf dut in man dai latins; e fo implantade une rêt di stradis e su lis stradis a nasserin lis borgadis e lis «stazions» (Josef Marchet, Cuintristorie dal Friûl fin sot la Italie)
11. s.f. [TS] sport tal balon, tal hockey e v.i., rêt metude daûr des puartis par tratignî la bale:  l'atacant napolitan si cjate intes cundizions di plaçâ la bale juste sul prin pâl là che chê i sbat intor e po e finìs in rêt (Marc Stolf, Napoli - Udinese 2-1)
    Sin. puarte
    
    1. tal tenis, te bale a svol e v.i., rêt che e divît il cjamp in doi, che la bale e à di passâi parsore
    2. te bale tal zei, la maie dal zei che e frene la bale che e cole
12. s.f. [TS] sient., anat. ogni struture fate di elements che si incrosin, che a son in conession tra di lôr:  inte scusse prefrontâl, e je une rêt neurâl responsabile dal imagazenâ lis esperiencis par categorie (Franco Rosa, Lenghe e sielte de alimentazion di bande dal consumadôr)
13. s.f. [TS] anat., becj., gastr. membrane che e ten lis vissaris, doprade ancje in cusine par insacâ o fâ sù:  la marcundele si fâs sù te rêt di purcit
    Sin. redesele
14. s.f. [TS] mat. sisteme lineâr di curvis planis, superficiis intal spazi o formis di un iperspazi
15. s.f. [TS] mat. inte gjeometrie algjebriche, l'insiemi dai elements che a son individuâts dant doi valôrs numerics ai parametris de ecuazion rapresentative
    
    1. scheme grafic par aplicâ controlâ e risolvi problemis spec. di gjestion industriâl
16. s.f. [TS] eletr. complès di liniis e grops che a fasin un circuit eletric
    
    1. eletr. complès dai sistemis di gjenerazion, trasmission e distribuzion de eletricitât:  i prins panei FV a son stâts metûts cuintri soreli par cjariâ batariis eletrochimichis in stazions radio in lûcs cence corint di rêt (Lorenzo Marcolini, Lis celis organichis nanostruturadis)
17. s.f. [TS] telecom. complès di aparâts di trasmission, ritrasmission e ricezion di informazions a distance, colegâts cun fîi eletrics, fibris otichis e ondis eletromagnetichis:  dute la rêt de radio e trasmeteve la stesse sinfonie di Mendelssohn (Agnul di Spere, Messe di misdì a Varsavie)
    
    1. telecom. singule organizazion o struture che e emet trasmissions:  sburtâ lis trasmissions televisivis par furlan su lis rêts privadis (Max Mauro, Un Friûl difarent: i 90 mhz di Onde Furlane)
       Sin. canâl , stazion , emitente
    2. inform. sisteme formât dal colegament tra ordenadôrs par trasmeti dâts e programs, par cirî informazions e v.i.:  a scomençâ dai agns '90, al è nassût il web e a son stâts realizâts i prins browser che a àn permetût di navigâ in rêt doprant une interface grafiche (Maria Rosita Cagnina, Rêt e ricercje 2)

Polirematichis e espressions idiomatichis

• meti in rêt loc.v.
• rêt idriche loc.s.f.

Proverbis:

• sant Simon, e va la lodule tes rêts a tombolon