Dizionari de Lenghe Furlane

canâl  ca|nâl  [CO, FO, TS]

1. s.m. cors di aghe artificiâl o cun arzins o struturis artificiâls:  lis viciniis a vevin di proviodi a tignî lis stradis, i canâi e in cierts câs ancje lis fortificazions (Adrian Cescje, Liniis di storie sociâl e economiche dal Friûl 1500 - 1800); a Vignesie i canâi a rapresentin une seconde cualitât di stradis (Arturo Feruglio, Viaç a Vignesie)
   Sin. roie , tai , fossâl ipon.
   Var. cjanâl
2. s.m. [CO, TS] gjeogr. cors di aghe artificiâl che al unìs doi mârs:  al lavorave sot dai inglês sul canâl di Suez, viart di pôc (Gianni Gregoricchio, Barbe Masaniello)
3. s.m. [TS] mar. percors segnât di bois par barcjis e nâfs
4. s.m. gjeogr. toc di mâr tra dôs tieris:  [...] disgracie resinte intal canâl di Sicilie (Tjaša Gruden, Il president talian Mattarella in visite uficiâl in Slovenie: un incuintri li che si à fevelât tant di minorancis. I slovens a critichin la riforme locâl dal F-VJ)
5. s.m. [CO, TS] anat., bot. condot a forme di tubul:  un frutin a vincj mês al à un cjavon cussì grant che nol rivarès a passâ tal canâl dal part (Franc Fari, Il cjâf dai furlans)
   Sin. condot² , tubul , vâs , vie
6. s.m. mieç di comunicazion o di difusion di notiziis, in particolâr te telecomunicazion:  cemût nassino chescj lavôrs, la domande partissie di un canâl televisîf o sêstu tu a proponi il lavôr finît a di une television? (Fabian Ros, Interviste cun Giorgio Cantoni); un dai problemis cu la presince di tancj canâi al è chel de visibilitât: za cumò e je une lote par rivâ a jessi un dai prins nûf canâi tal telecomant (Dree Venier, Fabio Pizzul: Un furlan il prin… a Milan)
   Sin. canâl di informazion
   
   1. cui che al da une informazions:  lu sai di bon canâl (Giulio Andrea Pirona, Ercole Carletti, Giovanni Battista Corgnali, Il Nuovo Pirona); une volte par un canâl stramp a rivarin gnovis di Vitôr (Carlo Sgorlon, Ombris tal infinît)
7. s.m. (fig.) mieç che al puarte alc o che al controle une dinamiche, un moviment:  difûr dai canâi uficiâi, e nassè tal 1952 la Scuele libare furlane (Odorico Serena, Il furlan tes scuelis e te universitât); cirî gnûfs canâi di finanziament
8. s.m. [CO, TS] tecn. condote sgjavade e regolade di une portele che e mene la aghe cuintri des palis dal mulin
9. s.m. [CO, TS] tecn. part ingjavade di un mecanisim, che e conten e e invie il moviment di altris parts:  il canâl de cidule (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
10. s.m. [CO, TS] edil. rie di cops che a son un parsore di chel altri, zirâts de bande ingjavade che e puas racuei la aghe e menâle jù pal cuviert:  al jere rot un canâl, o vin vût di cambiâ sîs cops par gjavâ la gote (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• canâl da la arie loc.s.m.
• canâl dai macarons loc.s.m.
• lassâ cori la aghe pal so canâl loc.v.
• sâl di canâl loc.s.m.