Dizionari de Lenghe Furlane

puarte  /-à-/  puar|te  [FO]

1. s.f. viertidure intun mûr par jentrâ e lâ fûr:  un coni di soreli al jentrave pe puarte (Agnul di Spere, Josefine); al passà la puarte dal repart e si cjatà te jentrade là che a jerin i assensôrs (Amedeo Giacomini, Tal ospedâl)
   Sin. ingrès , jentrade
   Cfr. bocje , lûs , us² , soiâr , antîl , ante , erte , soiâr disore , soiâr disot , pat² , suee , midâl , scûr¹ , volade , bertuele , sieradure , clâf , clostri , saltel , scroc
   
   1. ancje tal pl., ancje in riferiment a struturis fortificadis tes muraiis di fuartecis o citâts:  prin di rivà a puarte Bordolee, al distacà il mus, lu peà daûr e al cjapà il tamon… e si invià (Angelo Covazzi, Domandait al paron); la prime volte che Gjelmo Cuc al jere lât a Udin in biciclete […], in puartis di Glemone il vigjil cui braçs a viert i siere la strade (Alan Brusini, Amîs come prime); a rivin a Udin e a jentrin pes puartis di Sant Lazar (Riedo Pup, Il prin moto)
   2. (fig.) limit di une localitât:  o soi rivât te palacine, su lis puartis di Udin, che a saran stadis cuatri dopomisdì (Josef Marchet, Lis predicjis dal muini)
2. s.f. sierament di chê viertidure:  e veve sierât la puarte a clâf, ma il barcon che al deve sul puiûl al jere viert (Cristina Noacco, Faliscjis); a drete de muraie si podeve lumâ une piçule puarte di len, cuntun clostri rusin e simpri tirât (Franca Mainardis, A ôr dal flum); al jere scjafoiaç e i siei a vevin lassade la puarte de cjamare in sfese, tant di fâ cori un fîl di aiar (Gianni Gregoricchio, Trê feminis)
   Cfr. portele , portelon , scûr¹
3. s.f. intun aeropuart, struture, li che pal solit al è il control di biliets e documents, par li che si passe par imbarcjâsi tal avion
4. s.f. (fig.) ce che al permet di vê un contat, une comunicazion, di tacâ une gnove fase e sim.:  denant di lui si sarès spalancade une puarte che e si vierzeve suntun mont gnûf, su la pâs o forsit sul nuie, ma dut al jere miôr dal moment presint (Franca Mainardis, Aiar di cjase)
   
   1. disponibilitât:  al spietave simpri une peraule che Jolande no si decideve o no voleve butâ fûr. Al jere miôr se le diseve lui, cussì al capive che chê puarte e jere sierade e si meteve il cûr in pâs (Carlo Sgorlon, Prime di sere)
5. s.f. [TS] sport telâr cu la rêt, là che si à di butâ il balon o il disc par marcâ il pont:  al rive il gol di Maxi Gomez, che si cjate tal puest just tal moment just e al met in puarte une bale facile facile (Marc Stolf, L’Udin al vinç ai rigôrs (4-3) cul Celta Vigo e al puarte a cjase il trofeu Quinocho)
   
   1. pâr di palets che i schiadôrs a àn di passâ tal mieç tal slalom
6. s.f. [TS] eletron. interface esterne de unitât centrâl di un ordenadôr che e permet il colegament cuntune unitât periferiche

Polirematichis e espressions idiomatichis

• sierâ fûr de puarte loc.v.
• sierâ la puarte loc.v.
• sierâ la puarte dal cjôt daspò scjampât il purcit loc.v.
• sierâ la puarte su la muse loc.v.
• sierâ la puarte sul nâs loc.v.
• vierzi puartis e barcons loc.v.

Proverbis:

• a bati e a tornâ a bati, si vierç la puarte
• a chei che ur sierin la puarte, il Signôr ur spalanche il puarton
• a vuelin trê robis par salvâsi: bon voli, buine gjambe e puarte vierte
• ai laris no si ur siere lis puartis
• cjan e vilan no sierin mai la puarte
• cuant che a scomencin lis disgraciis bisugne vierzi puartis e barcons
• cuant che dutis lis puartis a son sieradis, si spalanche il puarton
• cuant che il lari al à robât,nol ocor sierâ la puarte
• cuant che l'ostîr al è su la puarte, nol è nissun ta la ostarie
• cui che al jentre ultin che al sieri la puarte
• cui che al reste daûr che al sieri la puarte
• cui che al sta ben di une bande al cjate il mâl pront daûr de puarte
• cui che nol à ce fâ che al meni la puarte
• doi pitocs suntune puarte no stan ben
• i "se" e i "ma" a stan picjâts daûr de puarte
• il Signôr al siere une puarte e al vierç un barcon
• la brût su la puarte e la madone muarte
• la caritât e jes pe puarte e e torne pai barcons
• la clâf di aur e vierç ogni puarte
• la justizie e je dome che su la puarte dal cimitieri
• la poltronarie i vierç la puarte a la miserie
• la puarte e dîs: puarte
• lis clâfs di aur a vierzin dutis lis puartis
• no covente pandii al gjat la puarte de cjanive
• par salvâsi a vuelin trê robis: bon voli, buine gjambe e puarte vierte
• pene e puarte pene
• puarte al vûl dî puarte a cjase
• puarte e à il non cun se
• scove denant de tô puarte
• se il Signôr al siere une puarte, ind vierç cent
• se il Signôr al siere une puarte, ind vierç dôs
• se Sant Pieri nol vierç la puarte, no si po lâ in paradîs
• se si siere une puarte, si vierç une altre
• si dîs a puarte par che il pidignûl al intindi
• si dîs al pidignûl par che la puarte e intindi
• trê feminis par cjase: une vive, une muarte, une picjade daûr de puarte
• une viele, une vuarbe, une picjade daûr de puarte