Dizionari de Lenghe Furlane

belance  /-à-/  be|lan|ce  [FO, TS]

1. s.f. imprest doprât par misurâ il pês di un cuarp:  la belance dal buteghîr; la belance dal speziâr; pesâ i ingredients cu la belance; meti la tare prin di pesâ cu la belance; gno marît l'è lât in France / a comprâ une belance / par pesâ gno barbe crot / che al pesave un e vot (Zuan Nazzi Matalon, Ottorino Burelli, Sacheburache)
   Var. balance
   Cfr. staderie , plat , puint , spere¹
2. s.f. ecuilibri tra valôrs, soredut economics:  la Bancje di Italie e à stimât che, simpri tal 2013, la belance turistiche dai paiaments e à puartât un avanz di cuasi 13 miliarts di euros (Attilio Celant, Il rûl economic dal turisim in Italie); se […] al ves di alçâsi il deficit dal stât e di pesantîsi inmò di plui la belance dai paiaments, alore la int e començarès a pensâ che, forsit, la storie no je propit come che le vevin piturade (Riedo Pup, Il scandul dal Corpus Domini)
   Sin. belanç
   
   1. sisteme complès di plui fuarcis:  al vûl cirût di unî intun i sfuarçs e il pês di dutis lis comunitâts naturâls par cjalcjâ la belance de politiche europee (Josef Marchet, Europe regjonaliste)
3. s.f. (fig.) sisteme di valutazion, ancje morâl:  meti su la belance sperancis e pôris; dut al dipent di ce bande che si metisi a cjalâle [la situazion politiche], cun ce belance che si la pese e cun ce criteris che si fâs la stime (Josef Marchet, …come che e diseve la gjate di Aquilee)
4. s.f. [TS] pescj. rêt cuadrade tacade pes pichis a dôs astis che si plein e che le tegnin vierte, tiradis sù di un argagn
5. s.f. [TS] tecn. toc dal mecanisim di orlois che al à funzion di pendul
   Sin. belancîr
6. s.f. [CO, TS] astron., astrol. costelazion dal Zodiac, lat. Libra
   
   1. segn zodiacâl che al corispuint a chê costelazion:  lei l'oroscop pe belance

Polirematichis e espressions idiomatichis

• fâ belance loc.v.
• meti il vues su la belance loc.v.