Dizionari de Lenghe Furlane

plat  plat  [FO]

1. s.m. recipient bas e in gjenar taront là che si mangje:  cul so pas çumpinant e scomençà a distrigâ la taule e a puartâ vie plats e fondinis (Maria Forte, La fie çuete); i tignive une vore a insiorâ la sô cjase di robis vieris, antighis, come armârs, panariis, gratulis, vintulis, cassons, plats di crep piturâts o di peltri, bussui, e vie discorint (Meni Ucel, Culturis)
   
   1. ancje par segnâ contignidôrs de stesse sorte ma plui ingjavâts, là che si mangje robe avonde licuide:  la mignestra a si disfreidava tai plats (Novella Cantarutti, Li Anzuliti)
      Sin. scudiele , fondine
2. s.m. cuantitât di mangjative che e sta dentri di chel contignidôr:  a mangjarin in presse un biel plat di macarons parom (Meni Ucel, I macarons); "Po ben", montant sul cjar al pensà, "vuê o larai a mangjâ un plat di tripis chenti ator… a la Madalene sporcje" (Angelo Covazzi, Il dint)
3. s.m. sorte di robe di mangjâ:  compagnâ un mangjâ cuntune tace di vin al è stât simpri calcolât un mût par esaltâ i plats de nestre cusine (Guglielmo Pitzalis, Mole il bevi!); il "litum" o "lidum" al è un plat puar ma saurît, fat cu lis menadis des jerbis che si cjapavin sù pai cjamps e che po dopo si cueievin inte fersorie (Giorgio Pascoli, Il Litum: jerbis salvadiis te cusine)
   Sin. pitance , mangjâ
   
   1. ognidune des pitancis diviersis che a fasin un past:  un gustâ di gnocis di vot plats
      Sin. buride , puartade
4. s.m. cualsisei robe di forme plui o mancul taronde e basse:  i pareve che al ves pôc lusôr par lei e scrivi, e al sbassà il plat de lampade (Carlo Sgorlon, Prime di sere)
5. s.m. [TS] tecn. in gramofons, zirediscs, stereos e v.i., element là che si poie il disc:  il Tumbar al cjol sù un disc, lu nete cun gracie des impuritâts dal mont cul peçotut a pueste, lu poie biel planc sul plat che al à za cjapade la sô corse (Ivano Urli, La musiche); un plat di un Hi-Fi li che disore al zire un vinîl dai agns '70 (Fabian Ros, E la Groenlande e tacà a sunâ te sô lenghe)
6. s.m. [TS] mus. spec. tal pl., ognidune des dôs laminis di leton, a pene ingjavadis, che si batin une cuintri di chê altre tant che strument a percussion:  un grop "folk": armonichis, violins, plats, trombe, trombon, mandulin e clarinet (Sandro Lano, "Jubilaeum" pal decenâl)
   Sin. covertorie
7. s.m. [TS] zûcs intai zûcs di azart, i bêçs metûts in zûc tal mieç de taule
8. s.m. [TS] sport tal balon, bande di dentri dal pît, doprade par controlâ, passâ o tirâ la bale:  par me se un al fâs un gol cuntun rigôr al pues tirâlu di plat, cul «cucchiaio», di ponte… baste che e vadi dentri (Christian Romanin, Dino Zoff: «O vin lidrîs buinis, o vin di tignîlis di cont»)

Polirematichis e espressions idiomatichis

• puartà in plat loc.v.
• spudâ tal plat che si mangje loc.v.

Proverbis:

• al vâl plui un plat di biel acet che no un plat di rost
• al vâl plui un plat di biele ciere che no un plat di rost
• al vâl plui un plat di bon acet che no un plat di rost
• cuant che si paie, si po ancje lecâ il plat
• miedis e avocats no si spudin tal lôr plat
• no bisugne spudâ sul plat che si mangje
• no si à di spudâ tal plat che si à mangjât
• no si à di spudâ tal so plat
• no si spude mai tal plat che si mangje
• ocjis, cjastinis e vin a son plats di Sant Martin
• ogni plat il so savôr, ogni man il so lavôr
• un plat di mancul e un lusôr di plui